Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Cronicas 3:1-17

3  Kamaudiananna rinugian ni Solomon nga ibangon ti balay ni Jehova+ idiay Jerusalem iti Bantay Moria,+ a nagparangan [ni Jehova] ken David nga amana,+ iti disso nga insagana ni David idiay pagirikan ni Ornan+ a Jebuseo.  Iti kasta rinugianna ti agibangon iti maikadua a bulan iti maikadua nga aldaw, iti maikapat a tawen ti panagturayna.+  Ket dagitoy a banag insaad ni Solomon kas pamuon iti panangibangon iti balay ti pudno a Dios, ti kaatiddog iti kasiko sigun iti immun-una a rukod nga innem a pulo a kasiko, ket ti kaakaba duapulo a kasiko.+  Ket ti beranda+ nga adda iti sango ti nagatiddogan duapulo a kasiko iti sango ti nagakabaan ti balay, ket ti kangatona sangagasut ket duapulo; ket iti uneg kinalupkopanna dayta iti puro a balitok.  Ket ti dakkel a balay+ inabbonganna iti kayo a parwa, a kalpasan dayta kinalupkopanna iti nasayaat a balitok,+ ket kalpasanna namataud iti dayta iti ladladawan ti kayo a palma+ ken kawkawar.+  Kanayonanna, kinalupkopanna ti balay iti napateg a bato a pangpapintas;+ ket ti balitok,+ balitok a naggapu iti pagilian ti balitok.  Ket kinalupkopanna ti balay, dagiti pasanggir, dagiti arsadanan ken dagiti didingna ken dagiti ruanganna iti balitok;+ ket nangikitikit iti kerkerubin kadagiti diding.+  Ket inaramidna ti balay ti Kasasantuan,+ a ti kaatiddogna mainaig iti kaakaba ti balay duapulo a kasiko, ken ti mismo a kaakabana duapulo a kasiko;+ ket kalpasanna kinalupkopanna iti nasayaat a balitok iti gatad nga innem a gasut a talento.  Ket ti dagsen maipaay kadagiti lansa+ limapulo a siklo a balitok; ket dagiti siled iti pangatepan kinalupkopanna iti balitok. 10  Kalpasanna nangaramid iti balay ti Kasasantuan iti dua a kerubin+ kas iti pannakaaramid ti ladladawan, ket kinalupkopanna ida iti balitok.+ 11  No maipapan iti paypayak dagiti kerubin,+ duapulo a kasiko ti kaatiddogda, ti maysa a payak a lima a kasiko dumanon agingga iti diding ti balay, ket ti sabali a payak a lima a kasiko dumanon agingga iti payak ti sabali a kerubin.+ 12  Ket ti payak ti maysa a kerubin a lima a kasiko dumanon agingga iti diding ti balay, ket ti sabali a payak a lima a kasiko nakisinnabat iti payak ti sabali a kerubin.+ 13  Dagiti payak dagitoy a kerubin nayukradda a duapulo a kasiko; ket agtaktakderda kadagiti sakada a dagiti rupada nakasango iti uneg. 14  Kanayonanna, ti kortina+ inaramidna manipud asul a sinulid+ ken delana a natinaan iti lumabaga a purpura ken carmesi ken napino nga abel, ket nangiborda kadagiti kerubin iti dayta.+ 15  Kalpasanna nangaramid iti sanguanan ti balay iti dua nga adigi,+ tallopulo ket lima a kasiko ti kaatiddogda, ket ti paratok+ nga adda iti tuktok ti tunggal maysa lima a kasiko. 16  Kanayonanna, nangaramid kadagiti kawar+ iti estilo ti kuentas ket inkabilna ida kadagiti tuktok dagiti adigi, ket nangaramid iti sangagasut a granada+ ket inkabilna ida kadagiti kawar. 17  Ket impasdekna dagiti adigi iti sango ti templo, maysa iti makannawan ken maysa iti makannigid, a kalpasan dayta pinanagananna daydiay makinkannawan iti Jaquin ken daydiay makinkannigid iti Boaz.+

Footnotes