Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Cronicas 28:1-27

28  Duapulo ti tawen ni Acaz+ idi nangrugi nga agturay, ket iti sangapulo ket innem a tawen nagturay idiay Jerusalem,+ ket saanna nga inaramid no ania ti umiso kadagiti mata ni Jehova kas ken David nga amana.+  No di ket nagna iti daldalan ti ar-ari ti Israel,+ ket uray pay dagiti sinukog+ nga estatua inaramidna maipaay kadagiti Baal.+  Ket isu nangpataud iti asuk a sakripisio+ idiay ginget ti anak ni Hinnom+ ket pinuoranna ti annakna+ iti apuy, maitunos iti nakarimrimon+ a bambanag dagiti nasion a pinagtalaw ni Jehova manipud sanguanan ti annak ti Israel.+  Ket regular a nagisakripisio+ ken nangpataud iti asuk a sakripisio kadagiti nangato a disso+ ken iti rabaw dagiti turod+ ken iti sirok ti tunggal kita ti nabaludbod a kayo.+  Gapuna isu inyawat ni Jehova a Diosna iti ima+ ti ari ti Siria,+ iti kasta kinabilda ket nangalada kenkuana iti dakkel a bilang dagiti kautibo ket impanda ida idiay Damasco.+ Ken kasta met nga isu nayawat iti ima ti ari ti Israel,+ iti kasta kinabilna buyogen ti dakkel a pananggudas.  Iti kasta ni Peca+ nga anak ni Remalias+ nangpapatay idiay Juda iti sangagasut ket duapulo a ribu iti maysa nga aldaw, amin a mamaingel a lallaki, gapu iti panangbaybay-ada ken Jehova+ a Dios dagidi ammada.  Kanayonanna, ni Zicri, maysa a nabileg a lalaki ti Efraim,+ pinapatayna ni Maasias nga anak ti ari ken ni Azricam a panguluen ti sangakabbalayan ken ni Elcana nga isu ti sumaruno iti ari.  Mainayon pay, nangkautibo ti annak ti Israel iti dua gasut a ribu iti kakabsatda, babbai, annak a lallaki ken annak a babbai; ken kasta met nga adu a ginam-ud ti innalada kadakuada a kas samsam, a kalpasan dayta inyegda ti ginam-ud idiay Samaria.+  Ket adda idi maysa a mammadto ni Jehova sadiay nga agnagan Oded. Gapuna napan iti sanguanan ti buyot nga um-umay idi iti Samaria ket kinunana kadakuada: “Adtoy! Gapu idi iti pungtot+ ni Jehova a Dios dagidi ammayo maibusor iti Juda nga inyawatna ida iti imayo, iti kasta nangpapataykayo iti tengngada buyogen ti panagpungtot+ unay a dimmanon agingga iti langlangit.+ 10  Ket ita ti annak ti Juda ken ti Jerusalem pampanunotenyo a pagbalinen nga ad-adipen a lallaki+ ken ad-adipen a babbai maipaay kadakayo. Nupay kasta, saan aya nga adda kadakayo dagiti kaso ti pannakabasol a maikaniwas ken Jehova a Diosyo? 11  Ket ita imdengandak ket isubliyo dagiti kautibo a tiniliwyo manipud iti kakabsatyo,+ ta maibusor kadakayo ti sumsumged nga unget ni Jehova.”+ 12  Iti kasta sumagmamano a lallaki kadagiti pannakaulo+ ti annak ti Efraim,+ ni Azarias nga anak ni Jehohanan, ni Berekias nga anak ni Mesillemot ken ni Jehizkias nga anak ni Sallum ken ni Amasa nga anak ni Hadlai, timmakderda a maibusor kadagidiay um-umay manipud kampania militar, 13  ket kinunada kadakuada: “Dikay iserrek ditoy dagiti kautibo, ta agbanagto dayta iti pannakabasol a maikaniwas ken Jehova iti biangtayo. Pampanunotenyo a nayonan dagiti basoltayo ken ti pannakabasoltayo, ta naruay ti pannakabasol nga adda kadatayo,+ ket adda sumsumged nga unget+ maibusor iti Israel.” 14  Iti kasta dagiti armado+ a lallaki pinanawanda dagiti kautibo+ ken ti samsam iti sanguanan dagiti prinsipe+ ken ti intero a kongregasion. 15  Idin timmakder dagiti lallaki a naituding sigun kadagiti naganda+ ket tinengngelda dagiti kautibo, ket amin dagidiay lamolamo kadakuada kinawesanda iti naggapu iti ginam-ud. Gapuna kinawesanda ida+ ket impaayanda ida kadagiti palloka ket pinakanda ida+ ken inikkanda ida iti inumen+ ket sinapsapuanda ida. Kanayonanna pay, no kas pagarigan adda asinoman nga agdiwengdiweng, impasakayda ida+ kadagiti asno ket impanda ida idiay Jerico,+ ti siudad dagiti kayo a palma,+ iti sibay ti kakabsatda. Kalpasan dayta nagsublida idiay Samaria.+ 16  Iti dayta a tiempo nagbaon ni Ari Acaz+ iti ar-ari ti Asiria+ tapno isu tulonganda. 17  Ket naminsan manen a simrek a mismo dagiti Edomita+ ket kinabilda ti Juda ket nangalada kadagiti kautibo. 18  No maipapan kadagiti Filisteo,+ rinubbuotda dagiti siudad ti Sefela+ ken ti Negeb+ ti Juda ket kinautiboda ti Bet-semes+ ken ti Ajalon+ ken ti Gederot+ ken ti Soco+ ken dagiti agpampannuray nga ilina ken ti Timna+ ken dagiti agpampannuray nga ilina ken ti Gimzo ken dagiti agpampannuray nga ilina; ket nagnaedda sadiay. 19  Ta ni Jehova pinagpakumbabana+ ti Juda maigapu ken Acaz nga ari ti Israel, agsipud ta binay-anna a rumang-ay ti kinalulok idiay Juda,+ ket adda idi ti panagtignay a buyogen ti nakaro a di kinamatalek ken Jehova. 20  Iti kamaudiananna ni Tilgat-pilneser+ nga ari ti Asiria immay a maibusor kenkuana ket isu riniribukna,+ ket saanna a pinapigsa. 21  Ta binakasan ni Acaz ti balay ni Jehova+ ken ti balay ti ari+ ken dagiti prinsipe+ ket iti kasta nagisagut iti ari ti Asiria;+ ngem awan naitulong dayta kenkuana. 22  Nupay kasta, iti tiempo a panangriribukna kenkuana, isu ad-adda pay a nagtignay a di simamatalek ken Jehova, a dayta ket, inaramid ni Ari Acaz.+ 23  Ket nangrugi nga agisakripisio iti didios+ ti Damasco+ a mangkabkabil idi kenkuana, ket kinunana: “Agsipud ta tultulongan ida ti didios dagiti ari ti Siria,+ agisakripisioakto kadakuada, tapno matulongandak.”+ Ket isuda nagbalinda kenkuana a pakaigapuan ti pannakaitibkolna ken ti intero nga Israel.+ 24  Kanayonanna pay, inummong a sangsangkamaysa ni Acaz dagiti aruaten+ ti balay ti pudno a Dios ket pinutedputedna dagiti aruaten ti balay ti pudno a Dios,+ ket inserrana dagiti ruangan+ ti balay ni Jehova, ket nangaramid kadagiti altar maipaay kenkuana iti tunggal suli idiay Jerusalem.+ 25  Ket kadagiti amin a siudad, dagiti mismo a siudad ti Juda, nangaramid kadagiti nangato a disso+ a pangpataudan iti asuk a sakripisio kadagiti sabali a didios,+ iti kasta pinagrurodna+ ni Jehova a Dios dagidi ammana. 26  No maipapan iti dadduma pay kadagiti pasamakna+ ken amin a dalanna, ti umuna ken ti maudi, sadiay naisuratda iti Libro+ ti Ar-ari ti Juda ken ti Israel. 27  Kamaudiananna nakikaidda ni Acaz kadagidi ammana, ket intabonda iti siudad, idiay Jerusalem, ta saanda nga impan kadagiti lugar a pagitabonan ti ar-ari ti Israel.+ Ket ni Ezekias nga anakna nangrugi nga agturay a mangsandi kenkuana.

Footnotes