Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Cronicas 26:1-23

26  Kalpasanna dagiti amin nga umili+ ti Juda innalada ni Ozias,+ nga agtawen idi iti sangapulo ket innem, ket pinagbalinda+ nga ari a mangsandi ken amana nga Amazias.+  Isu idi ti nangbangon manen iti Elot+ ket kalpasanna insublina dayta iti Juda kalpasan a nakikaiddan ti ari kadagidi ammana.+  Sangapulo ket innem ti tawen ni Ozias+ idi nangrugi nga agturay, ket iti limapulo ket dua a tawen nagturay idiay Jerusalem. Ket ti nagan ti inana Jecolia+ ti Jerusalem.  Ket inar-aramidna no ania ti umiso kadagiti mata ni Jehova,+ maitunos iti amin nga inaramid ni Amazias nga amana.+  Ket nagtultuloy a nagannayas a mangbirok+ iti Dios idi kaaldawan ni Zacarias, ti manangisuro iti panagbuteng iti pudno a Dios;+ ket, iti al-aldaw a panangbirokna ken Jehova, isu pinagbalin ti pudno a Dios a narang-ay.+  Ket rimmuar ket nakirupak kadagiti Filisteo+ ket dinuprakna ti pader ti Gat+ ken ti pader ti Jabne+ ken ti pader ti Asdod,+ a kalpasan dayta nangbangon kadagiti siudad idiay teritoria ti Asdod+ ken iti tengnga dagiti Filisteo.  Ket isu intuloy a tulongan ti pudno a Dios+ maibusor kadagiti Filisteo ken maibusor kadagiti Arabiano+ nga agnanaed idi idiay Gurbaal ken ti Meunim.+  Ket nangrugi dagiti Ammonita+ a mangted iti impuesto+ ken Ozias. Iti kamaudiananna nagsaknap ti panagdindinamagna+ uray pay agingga idiay Egipto, ta nangipakita iti pigsa a nalabes unay.  Mainayon pay, nangbangon ni Ozias kadagiti torre+ idiay Jerusalem iti sibay ti Makinsuli a Ruangan+ ken iti sibay ti Ruangan ti Ginget+ ken iti sibay ti Suray, ket pinatibkerna ida. 10  Kanayonanna, nangbangon kadagiti torre+ idiay let-ang, ket nangkutkot iti adu a pagurnongan ti danum (ta adda idi adu unay a dinguen a nagbalin a kukuana), ken kasta met idiay Sefela+ ken iti tanap. Adda dagiti mannalon ken dagiti agay-aywan iti kaubasan iti bambantay ken idiay Carmelo, ta isu managayat idi iti panagtalon. 11  Mainayon pay, naaddaan ni Ozias iti puersa a makigubgubat, dagidiay mapan iti panagserbi iti militar a binuybuyot,+ sigun iti bilang ti pannakaipasalistada+ babaen ti ima ni Jeiel a sekretario+ ken ni Maasias nga opisial iti sidong ti panangaywan+ ni Hananias a kameng dagiti prinsipe ti ari.+ 12  Ti intero a bilang dagiti pannakaulo ti balbalay dagiti amma,+ dagiti mamaingel,+ nabileg a lallaki,+ ket dua ribu innem a gasut. 13  Ket iti sidong ti panangaywanda dagiti puersa ti buyot tallo gasut ket pito a ribu lima gasutda a lallaki a makigubgubat nga addaan iti bileg ti maysa a puersa militar a tumulong iti ari maibusor iti kabusor.+ 14  Ket nagtultuloy ni Ozias a nangisagana maipaay kadakuada, maipaay iti intero a buyot, iti kalkalasag+ ken gaygayang+ ken kabkabal ti ulo+ ken nagsasaip a kabkabal+ ken kadagiti bai+ ken batbato ti pallatibong.+ 15  Kanayonanna, nangaramid idiay Jerusalem kadagiti makina a pakigubat, ti partuat dagiti inheniero, tapno maikabil dagita iti rabaw dagiti torre+ ken iti rabaw dagiti nagsulian, a pangibiat kadagiti pana ken dadakkel a batbato. Gapuna ti panagdindinamagna+ nagrakurak iti adayo unay, ta nakaskasdaaw ti pannakatulongna agingga a pimmigsa. 16  Nupay kasta, apaman a pimmigsa, timmangsit ti pusona+ agingga a mismo iti punto a mangdadael,+ iti kasta nagtignay a di simamatalek maibusor ken Jehova a Diosna ket simrek iti templo ni Jehova tapno agpuor iti insienso iti rabaw ti altar ti insienso.+ 17  Dagus a simrek a simmaruno kenkuana ni Azarias a padi ken kaduana ti papadi ni Jehova, walopulo a mamaingel a lallaki. 18  Kalpasanna timmakderda a maibusor ken Ozias nga ari+ ket kinunada kenkuana: “Saanmo a biang,+ O Ozias, ti agpuor iti insienso ken Jehova, no di ket biang ti papadi nga annak ni Aaron,+ dagidiay nasantipikar, ti agpuor iti insienso. Rummuarka iti santuario; ta nagtignayka a di simamatalek, ket saan nga agpaay dayta iti aniaman a dayag+ kenka iti biang ni Jehova a Dios.” 19  Ngem nakapungtot ni Ozias+ bayat nga adda paginsiensuan+ iti imana a maipaay iti panangpuor iti insienso, ket, bayat ti panagpungtotna unay maibusor iti papadi, ti met laeng kukutel+ limtaw+ iti mugingna iti sanguanan ti papadi iti balay ni Jehova iti abay ti altar ti insienso. 20  Idi bimmaw-ing a sumango kenkuana ni Azarias a panguluen a padi ken ti amin a papadi, ay ket, sadiay isu nagkukutel iti mugingna!+ Gapuna sigaganat a rinugianda nga ipanaw sadiay, ket isu nagapura met a rummuar, agsipud ta kinabil ni Jehova.+ 21  Ket ni Ozias+ nga ari nagtalinaed a maysa nga agkukutel agingga iti aldaw ti ipapatayna, ket nagnanaed iti maysa a balay a nailaksid kadagiti annongen, kas agkukutel;+ ta naisina iti balay ni Jehova, bayat a ni Jotam nga anakna ti namangulo iti balay ti ari, nga uk-ukomenna dagiti umili ti daga. 22  Ket ti dadduma pay kadagiti pasamak ni Ozias,+ ti umuna ken ti maudi, insurat ni Isaias+ nga anak ni Amoz+ a mammadto. 23  Kamaudiananna nakikaidda ni Ozias kadagidi ammana; ket ngarud intabonda a kadua dagidi ammana, ngem iti talon a pagitabonan a kukua ti ar-ari,+ ta kinunada: “Isu maysa nga agkukutel.” Ket ni Jotam+ nga anakna nangrugi nga agturay a mangsandi kenkuana.

Footnotes