Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

2 Cronicas 11:1-23

11  Idi dimteng ni Rehoboam idiay Jerusalem,+ dagus nga inummongna ti balay ni Juda ken Benjamin,+ sangagasut ket walopulo a ribu a napili a lallaki a nabaneg maipaay iti gubat,+ tapno makirupakda iti Israel tapno isublida ti pagarian ken Rehoboam.  Idin ti sao ni Jehova dimteng ken Semaias+ a lalaki ti pudno a Dios, a kunkunana:  “Sawem ken Rehoboam nga anak ni Solomon nga ari ti Juda+ ken iti intero nga Israel idiay Juda ken Benjamin, a kunaem,  ‘Daytoy ti kinuna ni Jehova: “Dikay sumang-at ken makirupak iti kakabsatyo.+ Agsublikayo tunggal maysa iti balayna, ta daytoy a banag napasamak iti bukodko a panangtignay.”’”+ Gapuna nagtulnogda iti sao ni Jehova ket nagsublida manipud ipapan a maibusor ken Jeroboam.+  Ket nagtultuloy nga agnaed ni Rehoboam idiay Jerusalem ket nangbangon kadagiti nasarikedkedan a siudad idiay Juda.  Iti kasta binangonna manen ti Betlehem+ ken ti Etam+ ken ti Tecoa,+  ken ti Bet-zur+ ken ti Soco+ ken ti Adullam,+  ken ti Gat+ ken ti Maresah+ ken ti Zif,+  ken ti Adoraim ken ti Laquis+ ken ti Azeca,+ 10  ken ti Zora+ ken ti Ajalon+ ken ti Hebron,+ dagiti nasarikedkedan a siudad, nga adda idiay Juda ken Benjamin. 11  Kanayonanna, pinatibkerna dagiti nasarikedkedan a lugar+ ket nangikabil kadakuada iti papanguluen+ ken ab-abasto a taraon ken lana ken arak, 12  ket iti amin a nadumaduma a siudad dadakkel a kalasag+ ken gaygayang;+ ket pinatibkerna ida iti napalalo unay. Ket nagtultuloy a kukuana ti Juda ken Benjamin. 13  Ket ti met laeng papadi ken dagiti Levita nga adda iti intero nga Israel nagtakderda iti sibayna manipud kadagiti amin a teritoriada. 14  Ta dagiti Levita pinanawanda dagiti pagpaarabanda+ ken ti sanikuada+ ket kalpasanna immayda iti Juda ken Jerusalem,+ agsipud ta inikkat+ ida ni Jeroboam+ ken ti annakna manipud panagakem a kas papadi ken Jehova. 15  Ket maipaay iti bagina nangisaad iti papadi maipaay kadagiti nangato a disso+ ken maipaay kadagiti sukog-kalding a sairo+ ken maipaay kadagiti kigaw a baka nga inaramidna.+ 16  Ket simmaruno kadakuada manipud kadagiti amin a tribu ti Israel immay a mismo iti Jerusalem+ dagidiay nangipapaay iti pusoda a mangsapul ken Jehova a Dios ti Israel tapno agisakripisioda+ ken Jehova a Dios dagidi ammada. 17  Ket pinappapigsada ti kinaari ti Juda+ ken pinatpatalgedanda ni Rehoboam nga anak ni Solomon iti tallo a tawen, ta nagnada iti dalan ni David ken ni Solomon iti tallo a tawen.+ 18  Kalpasanna innala ni Rehoboam kas asawana ni Mahalat nga anak a babai ni Jerimot nga anak ni David, ken anak a babai ni Abihail nga anak a babai ni Eliab+ nga anak ni Jesse. 19  Idi agangay nangipasngay kenkuana iti annak, da Jeus ken Semarias ken Zaham. 20  Ket kalpasan kenkuana innalana ni Maaca+ nga apoko a babai ni Absalom.+ Idi agangay impasngayna kenkuana da Abias+ ken Atai ken Ziza ken Selomit. 21  Ket ni Rehoboam ad-adda ti panagayatna ken Maaca nga apoko a babai ni Absalom ngem iti amin a sabsabali nga assawana+ ken kamkamalalana; ta adda sangapulo ket walo nga assawa nga innalana, kasta met nga innem a pulo a kamalala, iti kasta nagbalin nga ama ti duapulo ket walo nga annak a lallaki ken innem a pulo nga annak a babbai. 22  Gapuna ni Rehoboam insaadna ni Abias nga anak ni Maaca kas pannakaulo, kas panguluen iti kakabsatna, ta pinanunotna a pagbalinenna nga ari. 23  Nupay kasta, nagtignay a buyogen ti pannakaawat+ ket nangiwaras iti sumagmamano manipud iti amin nga annakna kadagiti amin a daga ti Juda ken Benjamin,+ kadagiti amin a nasarikedkedan a siudad,+ ket inikkanna ida iti naruay a taraon+ ket inkagumaanna ti mangala iti nakaad-adu nga assawa a babbai maipaay kadakuada.+

Footnotes