Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

2 Ar-ari 9:1-37

9  Ket ni Eliseo a mammadto, iti biangna, nangayab iti maysa kadagiti annak+ dagiti mammadto ket kalpasanna kinunana kenkuana: “Bariksam dagiti lomom+ ket alaem ita imam daytoy a gorgorita+ ti lana ket mapanka idiay Ramot-galaad.+  No nakastrekkan sadiay, kitaem sadiay ni Jehu+ nga anak ni Jehosafat nga anak ni Nimsi; ket masapul a sumrekka ket patakderem manipud tengnga ti kakabsatna a lallaki ket ipanmo iti kaunggan a siled.+  Ket masapul nga alaem ti gorgorita ti lana ket ibukbokmo iti ulona+ ket kunaem, ‘Daytoy ti kinuna ni Jehova: “Pulotanka+ kas ari+ iti Israel.”’ Ket luktamto ti ruangan ket pumanawka ket saanka nga aguray.”  Ket ti katulongan, ti katulongan ti mammadto, napan idiay Ramot-galaad.  Idi a simrek, ay ket, situtugaw sadiay dagiti panguluen ti puersa militar. Kinunana ita: “Adda sao nga ipaayko kenka,+ O panguluen.” Gapu itoy kinuna ni Jehu: “Maipaay iti siasino kadakami amin?” Idin kinunana: “Maipaay kenka, O panguluen.”  Gapuna timmakder ket simrek iti balay; ket imbukbokna ti lana iti ulona ket kinunana kenkuana: “Daytoy ti kinuna ni Jehova a Dios ti Israel, ‘Pulotanka kas ari+ iti ili ni Jehova,+ awan sabali, iti Israel.  Ket masapul a kabilem ti balay ni Acab nga apom, ket masapul nga ibalesko+ ti dara dagiti adipenko a mammadto ken ti dara dagiti amin nga adipen ni Jehova iti ima ni Jezebel.+  Ket masapul a mapukaw ti intero a balay ni Acab; ket masapul a gessatek ken Acab+ ti asinoman nga umisbo iti pader+ ken asinoman nga awan gawgawayna ken awan patpategna+ iti Israel.  Ket masapul nga ibilangko ti balay ni Acab a kas iti balay ni Jeroboam+ nga anak ni Nebat ken kas iti balay ni Baasa+ nga anak ni Ahias. 10  Ket ni Jezebel lamutento dagiti aso+ iti benneg ti daga idiay Jezrael, ket awanto ti asinoman a mangitabon kenkuana.’” Iti kasta linuktanna ti ruangan ket pimmanaw.+ 11  No maipapan ken Jehu, rimmuar a napan kadagiti adipen ni apona, ket rinugianda a kunaen kenkuana: “Naimbag kadi ti isuamin?+ Apay nga immay kenka daytoy mauyong+ a tao?” Ngem kinunana kadakuada: “Dakayo pagaammoyo unay ti lalaki ken ti kita ti panagsaona.” 12  Ngem kinunada: “Ulbod dayta! Ibagam kadakami, pangngaasim.” Idin kinunana: “Kastoy ken kasdiay ti panagsaona kaniak, a kunkunana, ‘Daytoy ti kinuna ni Jehova: “Pulotanka kas ari iti Israel.”’”+ 13  Gapu itoy sidadaras nga innalada tunggal maysa ti kawesna+ ket inkabilda dayta iti babaenna iti rabaw dagiti sidadaya a tukad, ket rinugianda a puyoten ti tangguyob+ ket kinunada: “Ni Jehu nagbalinen nga ari!”+ 14  Ket ni Jehu+ nga anak ni Jehosafat nga anak ni Nimsi+ nakikumplot+ a maibusor ken Jehoram. Ket ni met laeng Jehoram agbambantay idi iti Ramot-galaad,+ isu agraman ti intero nga Israel, gapu ken Hazael+ nga ari ti Siria. 15  Idi agangay nagsubli ni Jehoram+ nga ari tapno mapaimbag idiay Jezrael+ manipud kadagiti sugat nga impalak-am kenkuana dagiti Sirio idi isu nakirupak ken Hazael nga ari ti Siria.+ Kinuna ita ni Jehu: “No umannugot ti kararuayo,+ dikay bay-an a ti asinoman rummuar nga aglibas manipud iti siudad tapno mapan ken agipadamag idiay Jezrael.” 16  Ket rinugian ni Jehu ti aglugan ken mapan idiay Jezrael; ta agid-idda idi sadiay ni Jehoram, ket ni met laeng Ocozias+ nga ari ti Juda simmalog tapno kitaenna ni Jehoram. 17  Ket ti managwanawan+ sitatakder idi iti rabaw ti torre+ idiay Jezrael,+ ket nakitana ti agallo-allon a reprep dagiti tattao ni Jehu bayat nga isu um-umay, ket dagus a kinunana: “Adda agallo-allon a reprep dagiti tattao a makitkitak.” Gapu iti dayta kinuna ni Jehoram: “Mangalaka iti maysa a kabaliero ket ibaonmo a sumabet kadakuada, ket kunaenna koma, ‘Adda kadi talna?’”+ 18  Iti kasta napan ti maysa a sumasakay iti kabalio tapno sumabet kenkuana ket kinunana: “Daytoy ti kinuna ti ari, ‘Adda kadi talna?’” Ngem kinuna ni Jehu: “Ania ti pakaibiangam iti ‘talna’?+ Mapanka iti likudak!” Ket ti managwanawan+ impadamagna, a kunkunana: “Ti mensahero dimteng agingga kadakuada, ngem saan a nagsubli.” 19  Gapuna nangibaon iti maikadua a sumasakay iti kabalio, nga, idi dimteng kadakuada, kinunana: “Daytoy ti kinuna ti ari, ‘Adda kadi talna?’” Ngem kinuna ni Jehu: “Ania ti pakaibiangam iti ‘talna’?+ Mapanka iti likudak!” 20  Ket ti managwanawan impadamagna, a kunkunana: “Dimteng agingga kadakuada, ngem saan a nagsubli; ket ti panagpataray kasla iti panagpataray ni Jehu+ nga apoko ni Nimsi,+ ta sirurungsot nga agpatpataray.”+ 21  Iti kasta kinuna ni Jehoram: “Mangisingkawka!”+ Gapuna naisingkaw ti karuahena a pakigubat ket ni Jehoram nga ari ti Israel ken ni Ocozias+ nga ari ti Juda rimmuarda, tunggal maysa iti bukodna a karuahe a pakigubat. Bayat ti panagtultuloyda a rummuar a sumabet ken Jehu, isu nasarakanda iti benneg ti daga ni Nabot+ a Jezraelita. 22  Ket naaramid nga apaman a ni Jehoram nakitana ni Jehu, dagus a kinunana: “Adda kadi talna, Jehu?” Ngem kinunana: “Ania koma a talna+ ti adda bayat nga adda dagiti pannakiabig ni Jezebel+ nga inam ken ti adu a panagkulamna?”+ 23  Dagus a nagbaw-ing ni Jehoram babaen kadagiti imana, tapno agtalaw koma, ket kinunana ken Ocozias: “Adda panangallilaw,+ Ocozias!” 24  Ket ni met laeng Jehu nanggammat iti bai+ ket pinanana ni Jehoram iti nagbaetan dagiti takiag, iti kasta ti pana simmalput iti pusona, ket nakusbo iti karuahena a pakigubat.+ 25  Kinunana ita ken Bidkar nga ayudantena:+ “Bagkatem; ipuruakmo iti benneg ti talon ni Nabot a Jezraelita;+ ta laglagipem: Siak ken sika nagsakayta kadagiti karuahe nga addaan kabkabalio iti likudan ni Acab nga amana, ket intag-ay a mismo ni Jehova daytoy a pammakdaar+ maibusor kenkuana: 26  ‘“Pudno unay a ti dara+ ni Nabot ken ti dara ti annakna+ nakitak idi kalman,” kuna ni Jehova, “ket pudno unay a supapakankanto+ iti daytoy a benneg ti daga,” kuna ni Jehova.’ Gapuna ita, bagkatem; ipuruakmo iti benneg ti daga maitunos iti sao ni Jehova.”+ 27  Ket nakita a mismo dayta ni Ocozias+ nga ari ti Juda ket nagtalaw a dimmalan iti balay ti minuyongan.+ (Idi agangay isu kinamat ni Jehu ket kinunana: “Isu met! Kabilenyo!” [Gapuna kinabilda] bayat nga adda iti karuahe iti dalan a sumang-at idiay Gur, nga adda iti denna ti Ibleam.+ Ket intuloyna ti panagtalawna nga agturong idiay Megiddo+ ket natay sadiay.+ 28  Kalpasanna inlugan dagiti adipenna iti maysa a karuahe nga agturong idiay Jerusalem, ket iti kasta intabonda iti tanemna a kadua dagidi ammana iti Siudad ni David.+ 29  Ket iti maikasangapulo ket maysa a tawen idi ni Jehoram+ nga anak ni Acab a ni Ocozias+ nagbalin nga ari iti Juda.) 30  Idi agangay dimteng ni Jehu idiay Jezrael,+ ket nangngeg dayta ni Jezebel+ a mismo. Ket pinintaanna+ dagiti matana iti nangisit a pinta ket inarkosanna a nakapimpintas ti ulona+ ket timmannawag iti tawa.+ 31  Ket ni met laeng Jehu simrek iti ruangan. Kinunana ita: “Naimbag kadi ti kasasaad ni Zimri+ a mammapatay iti apona?” 32  Iti kasta intangadna ti rupana a tumurong iti tawa ket kinunana: “Siasino ti makikadua kaniak? Siasino?”+ Madagdagus a timmannawag kenkuana ti dua wenno tallo nga opisial ti palasio.+ 33  Gapuna kinunana: “Itinnagyo!”+ Iti kasta intinnagda, ket ti dadduma iti darana nagparsiak iti pader ken kadagiti kabalio; ket isu pinayatpayatanna+ ita. 34  Kalpasan dayta isu simrek ket nangan ken imminum ket kalpasanna kinunana: “Dakayo a lallaki, pangngaasiyo, asikasuenyo daytoy nailunod+ a tao ket itabonyo, ta isu ti anak a babai ti ari.”+ 35  Idi napanda tapno itabonda, awan ti nasarakanda nga aniaman kenkuana no di ti bangabanga ken ti saksaka ken dagiti dakulap ti im-ima.+ 36  Idi nagsublida ken imbagada kenkuana, kinunana: “Dayta ti sao ni Jehova a sinaona babaen+ ken adipenna nga Elias a Tisbita, a kunkunana, ‘Iti benneg ti daga ti Jezrael kanento dagiti aso ti lasag ni Jezebel.+ 37  Ket ti natay a bagi ni Jezebel pudno unay nga agbalinto a kas ganagan+ iti rabaw ti talon iti benneg ti daga ti Jezrael, tapno saanda koma a kunaen: “Isu daytoy ni Jezebel.”’”+

Footnotes