Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

2 Ar-ari 8:1-29

8  Ket ni met laeng Eliseo nagsao iti babai a makin-anak iti pinaungarna,+ a kunkunana: “Tumakderka ket mapanka, sika agraman ti sangakabbalayam, ket agtaengka kas ganggannaet iti sadinoman a mabalinmo a pagtaengan kas ganggannaet;+ ta ni Jehova nangayab iti maysa a nakaro a bisin,+ ket, malaksid pay, dumtengto dayta iti rabaw ti daga iti pito a tawen.”+  Gapuna timmakder ti babai ket inaramidna ti maitunos iti sao ti lalaki ti pudno a Dios ket napan,+ isu agraman ti sangakabbalayanna,+ ket nagtaeng kas ganggannaet iti daga dagiti Filisteo+ iti pito a tawen.  Ket naaramid iti ngudo ti pito a tawen a ti babai nagsubli manipud iti daga dagiti Filisteo ket napan tapno umkis iti ari+ maipaay iti balayna ken maipaay iti talonna.  Ita ti ari agsasao idi ken Gehazi+ a katulongan ti lalaki ti pudno a Dios, a kunkunana: “Isalaysaymo kaniak, pangngaasim, ti amin a naindaklan a bambanag nga inaramid ni Eliseo.”+  Ket naaramid a bayat nga isalsalaysayna iti ari no kasano a pinaungarna daydiay natay,+ ay ket, adtoy ti babai a makin-anak iti pinaungarna um-umkis idi iti ari maipaay iti balayna ken maipaay iti talonna.+ Dagus a kinuna ni Gehazi: “Apok+ nga ari, isu daytoy ti babai, ket isu daytoy ti anakna a pinaungar ni Eliseo.”  Iti kasta ti ari nagimtuod iti babai, ket insalaysayna kenkuana ti napasamak.+ Kalpasanna ti ari nangted kenkuana iti maysa nga opisial ti palasio,+ a kunkunana: “Isublim ti isuamin a kukuana ken amin dagiti bunga ti talon manipud iti aldaw a panangpanawna ti daga agingga ita.”+  Ket ni Eliseo immay iti Damasco;+ ket masakit idi ni Ben-hadad+ nga ari ti Siria. Gapuna naipadamag kenkuana, a naikuna: “Ti lalaki ti pudno a Dios+ immay agingga ditoy.”  Iti kasta ti ari kinunana ken Hazael:+ “Mangitugotka iti sagut+ ita imam ket mapanka ket sabtem ti lalaki ti pudno a Dios, ket masapul nga agimtuodka+ ken Jehova babaen kenkuana, a kunaem, ‘Makaungarakto kadi iti daytoy a sakit?’”  Gapuna napan ni Hazael a sumabet kenkuana ket nangitugot iti sagut iti imana, tunggal kita met laeng ti naimbag a banag ti Damasco, ti awit ti uppat a pulo a kamelio, ket immay ket nagtakder iti sanguananna ket kinunana: “Ti anakmo,+ ni Ben-hadad, ti ari ti Siria, imbaonnak kenka, a kunkunana, ‘Makaungarakto kadi iti daytoy a sakit?’” 10  Idin kinuna kenkuana ni Eliseo: “Mapanka, sawem kenkuana, ‘Makaungarkanto a di bumurong,’ ket impakita kaniak ni Jehova+ a matayto a di bumurong.”+ 11  Ket pinerrengna ken tinaginayonna a kasta agingga iti punto a nabainan. Kalpasanna nagsangit+ ti lalaki ti pudno a Dios. 12  Gapu itoy kinuna ni Hazael: “Apay nga agsangsangit ti apok?” Iti daytoy kinunana: “Agsipud ta pagaammok unay no ania a panangdangran+ ti aramidemto iti annak ti Israel. Dagiti nasarikedkedan a lugarda iyawatmonto iti apuy, ket dagiti napili a lallakida papatayemto babaen ti kampilan, ket dagiti ubbingda lasanglasangemto,+ ket dagiti masikog a babbaida gisaygisayemto.”+ 13  Kalpasan dayta kinuna ni Hazael: “Ania koma ti adipenmo, a maysa laeng nga aso,+ tapno kabalinanna nga aramiden daytoy naindaklan a banag?” Ngem kinuna ni Eliseo: “Ni Jehova impakitanaka kaniak kas ari iti Siria.”+ 14  Kalpasan dayta isu napan manipud ken Eliseo ket dimteng iti bukodna nga apo, a nagkuna kenkuana kalpasanna: “Ania ti kinuna kenka ni Eliseo?” Iti daytoy kinunana: “Kinunana kaniak, ‘Makaungarkanto a di bumurong.’”+ 15  Ket naaramid iti sumaganad nga aldaw nga isu nangala iti maysa nga abbong ti idda ket insawsawna iti danum ket inyukradna iti rupana,+ iti kasta isu natay.+ Ket ni Hazael+ nangrugi nga agturay a mangsandi kenkuana. 16  Ket iti maikalima a tawen ni Jehoram+ nga anak ni Acab nga ari ti Israel, bayat a ni Jehosafat idi ti ari ti Juda, ni Jehoram+ nga anak ni Jehosafat nga ari ti Juda nagbalin nga ari. 17  Tallopulo ket dua ti tawenna idi nagbalin nga ari, ket iti walo a tawen nagturay idiay Jerusalem.+ 18  Ket nagna iti dalan ti ar-ari ti Israel,+ kas iti inaramid dagiti kameng ti balay ni Acab;+ ta nagbalin nga asawana ti anak a babai ni Acab,+ ket inar-aramidna no ania ti dakes kadagiti mata ni Jehova. 19  Ket ni Jehova saanna idi a kayat a rebbeken ti Juda+ maipagapu ken David nga adipenna,+ kas iti inkarina kenkuana a kanayon a mangted kenkuana ken iti annakna iti maysa a pagsilawan.+ 20  Idi kaaldawanna immalsa ti Edom+ manipud sidong ti ima ti Juda, ket kalpasanna namagturay kadakuada iti maysa nga ari.+ 21  Iti kasta ni Jehoram limmasat a napan idiay Zair, kasta met dagiti amin a karuahe a naikuyog kenkuana. Ket naaramid nga isu timmakder iti rabii ket kinabilna dagiti Edomita a nangpalikmut kenkuana ken dagiti panguluen ti karkaruahe; ket nagtalaw a napan dagiti tattao kadagiti toldada. 22  Ngem intultuloy ti Edom ti iyaalsana manipud sidong ti ima ti Juda agingga itoy nga aldaw. Iti daydin a nangrugi nga umalsa ti Libna+ iti dayta a tiempo. 23  Ket ti dadduma pay kadagiti pasamak ni Jehoram ken amin nga inaramidna, saanda aya a naisurat iti libro+ dagiti pasamak iti al-aldaw ti ar-ari ti Juda? 24  Kamaudiananna nakikaidda ni Jehoram kadagidi ammana+ ket naitabon a kadua dagidi ammana idiay Siudad ni David.+ Ket ni Ocozias+ nga anakna nangrugi nga agturay a mangsandi kenkuana. 25  Iti maikasangapulo ket dua a tawen ni Jehoram nga anak ni Acab nga ari ti Israel, ni Ocozias nga anak ni Jehoram nga ari ti Juda nagbalin nga ari.+ 26  Duapulo ket dua ti tawen ni Ocozias idi nangrugi nga agturay, ket iti makatawen nagturay idiay Jerusalem.+ Ket ti nagan ti inana Athalia+ nga apoko a babai ni Omri+ nga ari ti Israel. 27  Ket nagna iti dalan ti balay ni Acab+ ket inar-aramidna no ania ti dakes kadagiti mata ni Jehova,+ kas iti balay ni Acab, ta isu maysa a kabagian ti balay ni Acab babaen ti pannakiasawa.+ 28  Iti kasta kimmuyog ken Jehoram nga anak ni Acab iti pannakigubat ken Hazael+ nga ari ti Siria idiay Ramot-galaad,+ ngem dagiti Sirio kinabilda+ ni Jehoram. 29  Gapuna ni Jehoram+ nga ari nagsubli tapno mapaimbag idiay Jezrael+ manipud kadagiti sugat nga impalak-am kenkuana dagiti Sirio idiay Rama idi nakirupak ken Hazael nga ari ti Siria. No maipapan ken Ocozias+ nga anak ni Jehoram nga ari ti Juda, simmalog tapno kitaenna ni Jehoram nga anak ni Acab idiay Jezrael, ta masakit idi.

Footnotes