Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Ar-ari 2:1-25

2  Ket naaramid nga idi ni Jehova alaennan nga ipangato ni Elias+ iti maysa nga allawig nga agturong iti langlangit,+ da Elias ken Eliseo+ napanda manipud Gilgal.+  Ket rinugian ni Elias a kunaen ken Eliseo: “Agtugawka ditoy, pangngaasim, agsipud ta ni met laeng Jehova imbaonnak agingga idiay Bethel.” Ngem kinuna ni Eliseo: “Kas sibibiag ni Jehova+ ken kas sibibiag ta kararuam,+ saankanto a panawan.”+ Gapuna simmalogda a napan idiay Bethel.+  Idin ti annak dagiti mammadto+ nga adda idiay Bethel rimmuarda a mapan ken Eliseo ket kinunada kenkuana: “Pudpudno kadi nga ammom nga ita nga aldaw alaen ni Jehova ti apom manipud kinaulona kenka?”+ Gapu itoy kinunana: “Pagaammok met unay dayta.+ Agulimekkayo.”  Kinuna ita kenkuana ni Elias: “Eliseo, agtugawka ditoy, pangngaasim, agsipud ta ni met laeng Jehova imbaonnak idiay Jerico.”+ Ngem kinunana: “Kas sibibiag ni Jehova ken kas sibibiag ta kararuam, saankanto a panawan.” Gapuna dimtengda idiay Jerico.  Idin ti annak dagiti mammadto nga adda idiay Jerico immasidegda ken Eliseo ket kinunada kenkuana: “Pudpudno kadi nga ammom nga ita nga aldaw alaen ni Jehova ti apom manipud kinaulona kenka?” Gapu itoy kinunana: “Pagaammok met unay dayta. Agulimekkayo.”+  Kinuna ita kenkuana ni Elias: “Agtugawka ditoy, pangngaasim, agsipud ta ni met laeng Jehova imbaonnak idiay Jordan.”+ Ngem kinunana: “Kas sibibiag ni Jehova ken kas sibibiag ti kararuam, saankanto a panawan.”+ Gapuna napanda a dua.  Ket adda idi limapulo a lallaki iti annak dagiti mammadto a napan ken nagtalinaed a sitatakder a makitkita iti adayo;+ ngem, no maipapan kadakuada a dua, nagtakderda iti igid ti Jordan.  Idin innala ni Elias ti opisial a kawesna+ ket linukotna ket inablatanna ti dandanum, ket in-inut a nabisngayda iti daytoy a turong ken iti dayta a turong, iti kasta bimmallasiwda a dua iti namaga a daga.+  Ket naaramid nga apaman a nakaballasiwda, ni met laeng Elias kinunana ken Eliseo: “Kiddawem no ania ti rebbeng nga aramidek maipaay kenka sakbay a maalaak kenka.”+ Iti daytoy kinuna ni Eliseo: “Pangngaasim, a ti dua a kapaset+ iti espiritum+ umay koma kaniak.”+ 10  Iti kasta kinunana: “Nakarigrigat a banag ti kiniddawmo.+ No makitanak inton maalaak kenka, mapasamakto kenka ti kasta; ngem no saannak a makita, saanto a mapasamak dayta.” 11  Ket naaramid a bayat a magmagnada, nga agsasaoda bayat ti pannagnada, ay ket, adtoy! maysa a gumilgil-ayab a karuahe a pakigubat+ ken gumilgil-ayab a kabkabalio, ket pinagsinada ida a dua; ket ni Elias nagpangato iti allawig nga agturong iti langlangit.+ 12  Kabayatanna amin kitkitaen idi ni Eliseo dayta, ket ipukpukkawna: “Amak, amak,+ ti pakigubat a karuahe ti Israel ken dagiti kumakabaliona!”+ Ket isu saannan a nakita. Iti kasta iniggamanna dagiti bukodna a kawes ket pinisangna ida iti dua a kapaset.+ 13  Kalpasan dayta pinidutna ti opisial a kawes+ ni Elias a nagtinnag manipud kenkuana, ket nagsubli ket nagtakder iti takdang ti Jordan. 14  Kalpasanna innalana ti opisial a kawes ni Elias a nagtinnag manipud kenkuana ket inablatanna ti dandanum+ ket kinunana: “Sadino ti ayan ni Jehova a Dios ni Elias, Isu a mismo?”+ Idi inablatanna ti dandanum, in-inut ngarud a nabisngayda iti daytoy a turong ken iti dayta a turong, iti kasta bimmallasiw ni Eliseo. 15  Idi a ti annak dagiti mammadto nga adda idiay Jerico nakitada isuna iti pangadaywen, rinugianda a kunaen: “Ti espiritu+ ni Elias nagtaeng ken Eliseo.” Iti kasta immayda a sumabet kenkuana ket nagruknoyda+ kenkuana agingga iti daga. 16  Ket kinunada kenkuana: “Adtoy, ita, adda a kadua dagiti adipenmo ti limapulo a lallaki, mamaingel a tattao. Bay-am ida a mapan, pangngaasim, ket sapulenda ni apom. Mabalin nga inngato ti espiritu+ ni Jehova ket kalpasanna impalladawna iti rabaw ti maysa kadagiti bantay wenno iti maysa kadagiti ginget.” Ngem kinunana: “Dikay ibaon ida.” 17  Ket isu ginuyguyugoyda agingga a nabainan, iti kasta kinunana: “Agbaonkayo.” Nagbaonda ita iti limapulo a lallaki; ket nagsapsapulda iti tallo nga aldaw, ngem saanda a nasarakan. 18  Idi nagsublida kenkuana, isu agnanaed idi idiay Jerico.+ Idin kinunana kadakuada: “Saan aya a kinunak kadakayo, ‘Dikay mapan’?” 19  Idi agangay dagiti lallaki ti siudad kinunada ken Eliseo: “Adtoy, ita, ti kasasaad ti siudad nasayaat,+ kas makitkita ti apok; ngem ti danum+ dakes, ket ti daga mangpatpataud kadagiti pannakaalis.”+ 20  Iti kasta kinunana: “Iyegandak iti bassit a baro a malukong ket mangikabilkayo iti asin iti dayta.” Gapuna inyegda dayta maipaay kenkuana. 21  Idin isu rimmuar a mapan iti ubbog ti danum ket pinuruakanna iti asin+ ket kinunana: “Daytoy ti kinuna ni Jehova, ‘Pagbalinek a makapasalun-at daytoy a danum.+ Awanton ti ipapatay wenno aniaman a panangpataud kadagiti pannakaalis nga ibunga dayta.’” 22  Ket ti danum agtultuloy a napaimbag agingga itoy nga aldaw,+ sigun iti sao ni Eliseo a sinaona. 23  Ket simmang-at manipud sadiay a mapan idiay Bethel.+ Bayat a sumangsang-at iti dalan, adda babassit nga ubbing a lallaki+ a rimmuar manipud iti siudad ken nangrugi a manglais+ kenkuana ken nagtultuloy a nagkuna kenkuana: “Sumang-atka, sika a kalbo!+ Sumang-atka, sika a kalbo!” 24  Kamaudiananna isu timmaliaw iti likudanna ket nakitana ida ket indawdawatna ti pakadaksanda+ iti nagan ni Jehova. Idin rimmuar ti dua a kabaian nga oso+ manipud iti kakaykaywan ket rinangrangkayda ti uppat a pulo ket dua nga ubbing iti bilangda.+ 25  Ket intultuloyna ti napan manipud sadiay nga agturong idiay Bantay Carmelo,+ ket manipud sadiay isu nagsubli idiay Samaria.

Footnotes