Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Ar-ari 18:1-37

18  Ket naaramid iti maikatlo a tawen ni Hosea+ nga anak ni Elah nga ari ti Israel a ni Ezekias+ nga anak ni Acaz+ nga ari ti Juda nagbalin nga ari.  Duapulo ket lima ti tawenna idi nangrugi nga agturay, ket iti duapulo ket siam a tawen nagturay idiay Jerusalem. Ket ti nagan ti inana Abi nga anak ni Zacarias.+  Ket intuloyna nga aramiden no ania ti umiso kadagiti mata ni Jehova,+ maitunos iti amin nga inaramid ni David nga amana.+  Isu ti nangikkat kadagiti nangato a disso+ ken nangtukkotukkol kadagiti sagrado a munmon+ ken nangpukan iti sagrado+ a teddek ken nangrumekrumek iti gambang a serpiente+ nga inaramid ni Moises;+ ta agingga kadagidi nga aldaw nagtultuloy ti annak ti Israel a nangpataud iti asuk a sakripisio+ iti dayta, ket maaw-awagan idi iti gambang a serpiente nga idolo.+  Nagtalek ken Jehova a Dios ti Israel;+ ket kalpasan kenkuana awan idin ti kas kenkuana iti amin nga ar-ari ti Juda,+ uray pay dagidiay immun-una ngem isu.+  Ket intultuloyna ti kimpet ken Jehova.+ Saan a simiasi iti isusurot kenkuana, no di ket intuloyna a sinalimetmetan dagiti bilinna nga imbilin ni Jehova ken Moises.+  Ket adda idi kenkuana ni Jehova.+ Sadinoman a papananna, agtignay a simamanakem;+ ket nagrebelde iti ari ti Asiria ken saan a nagserbi kenkuana.+  Isu ti nangkabil kadagiti Filisteo+ agingga idiay Gaza+ ken kasta met kadagiti teritoriana, manipud iti torre+ dagiti managwanawan agingga iti nasarikedkedan a siudad.  Ket naaramid iti maikapat a tawen ni Ari Ezekias, awan sabali, ti maikapito a tawen ni Hosea+ nga anak ni Elah nga ari ti Israel, a simmang-at ni Salmaneser+ nga ari ti Asiria maibusor iti Samaria ket rinugianna a lakuben dayta.+ 10  Ket nakautiboda dayta+ iti ngudo ti tallo a tawen; iti maikanem a tawen ni Ezekias, awan sabali, ti maikasiam a tawen ni Hosea nga ari ti Israel, ti Samaria ket nakautibo.+ 11  Kalpasan dayta ti ari ti Asiria+ indestierona ti Israel+ idiay Asiria ket inkabilna ida idiay Hala+ ken idiay Habor+ iti karayan Gozan ken kadagiti siudad dagiti Medo,+ 12  gapu iti kinapudno a saanda nga inimdengan+ ti timek ni Jehova a Diosda, no di ket sinalsalungasingda ti tulagna,+ ti met laeng isuamin nga imbilin+ ni Moises+ nga adipen ni Jehova. Saanda a nagimdeng wenno uray nagtungpal. 13  Ket iti maikasangapulo ket uppat a tawen ni Ari Ezekias, ni Senaquerib+ nga ari ti Asiria+ simmang-at a maibusor kadagiti amin a nasarikedkedan a siudad ti Juda ket innalana ida. 14  Gapuna ni Ezekias nga ari ti Juda nagbaon iti ari ti Asiria idiay Laquis, a kunkunana: “Nagbasolak. Agbaw-ingka manipud ibubusor kaniak. Aniaman ti ipataymo kaniak awitekto.”+ Iti kasta ti ari ti Asiria nangipatay ken Ezekias nga ari ti Juda iti tallo gasut a pirak a talento+ ken tallopulo a balitok a talento. 15  Gapuna inted ni Ezekias ti isuamin a pirak a masarakan iti balay ni Jehova+ ken kadagiti gameng ti balay ti ari.+ 16  Iti dayta a tiempo pinukan ni Ezekias dagiti ruangan ti templo ni Jehova+ ken dagiti bautek a kinalupkopan+ ni Ezekias nga ari ti Juda ket kalpasanna intedna ida iti ari ti Asiria. 17  Ket ti ari ti Asiria+ imbaonna da Tartan+ ken Rabsaris ken Rabsaque+ manipud Laquis+ a mapanda ken Ari Ezekias agraman napigsa a puersa militar agingga idiay Jerusalem, tapno sumang-atda koma ken dumtengda iti Jerusalem. Gapuna simmang-atda ket dimtengda ket nagtakderda a siiintek iti abay ti kalasugan+ ti makinngato a ban-aw,+ nga adda iti kangrunaan a kalsada ti tay-ak ti managlaba.+ 18  Ket rinugianda ti agpukkaw iti ari, ngem rimmuar a napan kadakuada ni Eliakim+ nga anak ni Hilkias, nga agay-aywan iti sangakabbalayan, ken ni Sebnah+ a sekretario ken ni Joa nga anak ni Asaf nga agilislista. 19  Iti kasta kinuna kadakuada ni Rabsaque:+ “Pangngaasiyo, sawenyo ken Ezekias, ‘Daytoy ti kinuna ti naindaklan nga ari,+ ti ari ti Asiria: “Ania daytoy panagtalek a nagtalkam?+ 20  Kinunam (ngem sao dayta dagiti bibig), ‘Adda pammatigmaan+ ken kinamannakabalin maipaay iti gubat.’ Ita siasino ti nangikabilam ti panagtalekmo, iti kasta nagrebeldeka+ kaniak? 21  Ita, adtoy! inkabilmo ti panagtalekmo iti saranay daytoy naparpar a runo,+ iti Egipto,+ a, no ti maysa a tao isadagna koma ti bagina iti dayta, sigurado a tumudok iti dakulapna ket salputenna dayta. Kasta ni Faraon+ nga ari ti Egipto kadagidiay amin a mangikabkabil ti panagtalekda kenkuana. 22  Ket no kas pagarigan kunaenyo kaniak, ‘Ni Jehova+ a Diosmi ti nangikabilanmi ti panagtalekmi,’+ saan kadi nga isuna daydiay a dagiti nangato a dissona+ ken dagiti altarna inikkat ni Ezekias,+ idinto ta kunana iti Juda ken Jerusalem, ‘Iti sanguanan daytoy nga altar rebbeng nga agruknoykayo idiay Jerusalem’?”’+ 23  Ita, ngarud, makipinnustaka,+ pangngaasim, iti apok nga ari ti Asiria, ket bay-am a mangtedak kenka iti dua ribu a kabalio tapno kitaek no kabalinam, iti biangmo, ti mangikabil kadagiti sumasakay kadakuada.+ 24  Kasano, ngarud, a mapagtallikudmo ti rupa ti maysa a gobernador dagiti kabassitan nga adipen ni apok,+ idinto ta sika, iti biangmo, ikabilmo ti panagtalekmo iti Egipto maipaay kadagiti karuahe+ ken maipaay kadagiti kumakabalio?+ 25  Ita awan aya ti pammalubos manipud ken Jehova a simmang-atak a maibusor iti daytoy a disso tapno dadaelek? Kinuna kaniak ni Jehova a mismo,+ ‘Sumang-atka a maibusor iti daytoy a daga, ket masapul a dadaelem.’” 26  Gapu itoy ni Eliakim+ nga anak ni Hilkias ken ni Sebnah+ ken ni Joa+ kinunada ken Rabsaque:+ “Makisaoka kadagiti adipenmo, pangngaasim, iti pagsasao ti Siria,+ ta maawatanmi; ket dika makisao kadakami iti pagsasao dagiti Judio+ kadagiti lapayag dagiti umili nga adda iti pader.” 27  Ngem kinuna kadakuada ni Rabsaque: “Ni aya apom ken sika ti nangibaonan kaniak ni apok tapno sawek dagitoy a sasao? Saan aya a kadagiti lallaki a situtugaw iti rabaw ti pader, tapno kanenda ti bukodda nga ibleng+ ken inumenda ti bukodda nga isbo a kaduadakayo?”+ 28  Ket intuloy ni Rabsaque ti agtakder ken agpukkaw iti natbag a timek iti pagsasao dagiti Judio;+ ket nagsao ken kinunana: “Denggenyo ti sao ti naindaklan nga ari,+ ti ari ti Asiria. 29  Daytoy ti kinuna ti ari, ‘Dikay bay-an nga allilawennakayo ni Ezekias, ta saannakayo a kabaelan nga ispalen iti imak.+ 30  Ket dikay bay-an ni Ezekias a pagtalekennakayo ken Jehova,+ a kunkunana: “Di bumurong nga ispalennatayto ni Jehova,+ ket daytoy a siudad saanto a maited iti ima ti ari ti Asiria.”+ 31  Dikay imdengan ni Ezekias; ta daytoy ti kinuna ti ari ti Asiria: “Sumukokayo kaniak, ket rummuarkayo nga agturong kaniak, ket mangankayo tunggal maysa manipud bukodna a puon ti ubas ken tunggal maysa manipud bukodna a kayo a higos+ ket uminumkayo tunggal maysa iti danum ti bukodna a pagurnongan ti danum,+ 32  agingga nga umayak ket pudno nga ipankayo iti maysa a daga a kas iti bukodyo a daga,+ maysa a daga ti bukbukel ken baro nga arak, maysa a daga ti tinapay+ ken dagiti kaubasan,+ maysa a daga dagiti kayo nga olibo-a-lana ken diro;+ ket agtultuloykayo nga agbiag tapno saankayo a matay. Ket dikay imdengan ni Ezekias, ta guyugoyennakayo, a kunkunana, ‘Ni met laeng Jehova ispalennatayto.’+ 33  Ti kadi didios dagiti nasion naispalda+ iti aniaman a pamay-an tunggal maysa ti bukodna a daga manipud iti ima ti ari ti Asiria?+ 34  Sadino ti ayan ti didios ti Hamat+ ken Arpad?+ Sadino ti ayan ti didios ti Sefarvaim,+ Hena+ ken Ivva?+ Naispalda kadi ti Samaria manipud iti imak?+ 35  Siasino iti amin a didios dagiti daga ti nakaispal iti dagada manipud iti imak,+ tapno ispalento ni Jehova ti Jerusalem manipud iti imak?”’”+ 36  Ket nagtalinaed a siuulimek dagiti umili+ ket saanda a sinungbatan+ iti maysa a sao, ta ti bilin idi ti ari ket, kunana: “Dikay sungbatan.”+ 37  Ngem ni Eliakim+ nga anak ni Hilkias, nga agay-aywan iti sangakabbalayan, ken ni Sebnah+ a sekretario ken ni Joa+ nga anak ni Asaf nga agilislista immayda ken Ezekias a dagiti kawesda naray-ab+ ket imbagada kenkuana dagiti sao ni Rabsaque.

Footnotes