Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Ar-ari 17:1-41

17  Iti maikasangapulo ket dua a tawen ni Acaz nga ari ti Juda, ni Hosea+ nga anak ni Elah nagbalin nga ari idiay Samaria+ iti Israel iti siam a tawen.  Ket intuloyna nga aramiden no ania ti dakes kadagiti mata ni Jehova, isuna laeng ta saan a kas iti ar-ari ti Israel nga immun-una ngem isu.+  Maibusor idi kenkuana a simmang-at ni Salmaneser+ nga ari ti Asiria,+ ket nagbalin nga adipenna ni Hosea ket nangrugi nga agbayad kenkuana iti impuesto.+  Nupay kasta, ti ari ti Asiria nakasarak iti kumplot+ iti biang ni Hosea, ta nangibaon kadagiti mensahero a mapan ken So nga ari ti Egipto+ ken saanna nga impan ti impuesto iti ari ti Asiria kas iti immun-una a tawtawen. Gapuna isu impupok ti ari ti Asiria ket pinagtalinaedna a sibabalud iti balay a pagikulongan.+  Ket simmang-at ti ari ti Asiria maibusor iti intero a daga ken simmang-at idiay Samaria ket nanglakub+ a maibusor iti dayta iti tallo a tawen.  Iti maikasiam a tawen ni Hosea, ti ari ti Asiria kinautibona ti Samaria+ ket kalpasanna inturongna ti Israel iti pannakaidestiero+ idiay Asiria ket pinagnanaedna ida idiay Hala+ ken idiay Habor iti karayan Gozan+ ken kadagiti siudad dagiti Medo.+  Ket naaramid dayta agsipud ta nagbasol ti annak ti Israel+ a maikaniwas ken Jehova a Diosda, a nangaon kadakuada iti daga ti Egipto manipud sidong ti ima ni Faraon nga ari ti Egipto,+ ket nangrugida nga agbuteng kadagiti sabali a didios;+  ket nagtultuloyda a nagna kadagiti paglintegan+ ti nasnasion a pinagtalaw ni Jehova iti sanguanan ti annak ti Israel, ken kadagiti paglintegan ti ar-ari ti Israel nga inaramidda;  ket binirok ti annak ti Israel ti bambanag a saan nga umiso maipaay ken Jehova a Diosda+ ket nangbangbangonda a mismo iti nangato a disdisso+ kadagiti amin a siudadda, manipud iti torre+ dagiti managwanawan agingga iti nasarikedkedan a siudad; 10  ket nangipaspasdekda maipaay iti bagbagida kadagiti sagrado a munmon+ ken kadagiti sagrado a teddek+ iti rabaw ti tunggal nangato a turod+ ken iti sirok ti tunggal nabaludbod a kayo;+ 11  ket sadiay kadagiti amin a nangato a disso nagtultuloyda a mangpataud iti asuk a sakripisio kas met laeng kadagiti nasion+ nga indestiero ni Jehova gapu kadakuada, ket nagar-aramidda iti dakes a bambanag tapno pagrurodenda+ ni Jehova; 12  Ket nagtultuloyda nga agserbi kadagiti makadurmen nga idolo;+ a maipapan kadagita kinuna kadakuada ni Jehova: “Dikay aramiden daytoy a banag”;+ 13  ket ni Jehova pinakpakdaaranna+ ti Israel+ ken ti Juda+ babaen kadagiti amin a mammadtona+ ken tunggal managsirmata,+ a kunkunana: “Agbaw-ingkayo manipud dakes a daldalanyo+ ket salimetmetanyo dagiti bilinko,+ dagiti paglintegak,+ maitunos iti isuamin a linteg+ nga imbilinko kadagidi ammayo+ ken impatulodko kadakayo babaen kadagiti adipenko a mammadto”;+ 14  ket saanda a nagimdeng no di ket intultuloyda a pinatangken dagiti lengngesda+ kas kadagiti lengnges dagidi ammada a saan a nangwatwat iti pammati+ ken Jehova a Diosda; 15  ket intuloyda a linaksid dagiti alagadenna ken ti tulagna+ a pinatalgedanna kadagidi ammada ken dagiti pammalagipna+ a pinangpakdaarna kadakuada, ket simmurotda kadagiti ubbaw nga idolo+ ket isuda nagbalinda nga ubbaw,+ iti mismo a panangtulad kadagiti nasion nga adda iti intero nga aglikmutda, a maipapan kadakuada binilin ida ni Jehova a saanda nga agaramid iti kas kadakuada;+ 16  Ket intultuloyda a pinanawan ti amin a bilbilin+ ni Jehova a Diosda ket inyaramidanda ti bagbagida kadagiti sinukog nga estatua,+ dua a kigaw a baka,+ ket nangaramidda iti sagrado a teddek,+ ket rinugianda ti agruknoy iti isuamin a buyot ti langlangit+ ken agserbi ken Baal;+ 17  ket intuloyda nga impalasat ti annakda a lallaki ken ti annakda a babbai iti apuy+ ket nagipadpadlesda+ ken nagsapsapulda kadagiti partaan,+ ket inlaklakoda+ ti bagbagida tapno aramidenda no ania ti dakes kadagiti mata ni Jehova, tapno isu pagrurodenda;+ 18  Gapuna nagpungtot unay ni Jehova+ maibusor iti Israel, iti kasta inikkatna ida iti imatangna.+ Awan ti impalubosna nga aniaman a matedda no di ti tribu ni Juda laeng.+ 19  Uray ti mismo a Juda saanna a sinalimetmetan dagiti bilin ni Jehova a Diosda,+ no di ket nagnada kadagiti paglintegan ti Israel+ nga inaramidda. 20  Gapuna linaksid ni Jehova ti isuamin a bin-i+ ti Israel ket intultuloyna a pinarigat ida ken inyawat ida iti ima dagiti manangkamkam, agingga a napagtalawna ida iti sanguananna.+ 21  Ta rinay-abna ti Israel manipud iti balay ni David, ket pinagbalinda nga ari ni Jeroboam nga anak ni Nebat; ket insina ni Jeroboam+ ti Israel manipud isusurot ken Jehova, ket pinagbasolna ida iti dakkel a basol.+ 22  Ket nagna ti annak ti Israel iti amin a basbasol ni Jeroboam nga inaramidna.+ Saanda a simmina kadakuada, 23  agingga nga inikkat ni Jehova ti Israel iti imatangna,+ kas iti sinaona babaen kadagiti amin nga adipenna a mammadto.+ Gapuna ti Israel napan manipud iti bukodna a daga iti pannakaidestiero idiay Asiria agingga itoy nga aldaw.+ 24  Iti kasta ti ari ti Asiria nangyeg iti tattao manipud Babilonia+ ken Cuta ken Avva+ ken Hamat+ ken Sefarvaim+ ket pinagnaedna ida kadagiti siudad ti Samaria+ imbes a ti annak ti Israel; ket rinugianda a tagikuaen ti Samaria ken pagnaedan dagiti siudadna. 25  Ket naaramid iti panangrugi ti panagnaedda sadiay a saanda a nagbuteng+ ken Jehova. Gapuna nangibaon ni Jehova kadagiti leon+ iti tengngada, ket nagbalinda a mammapatay iti tengngada. 26  Gapuna nagpaipanda iti sao iti ari ti Asiria, a kunkunada: “Dagiti nasion nga indestierom ken kalpasanna insaadmo kadagiti siudad ti Samaria saanda nga ammo ti relihion ti Dios ti daga, iti kasta isu agtultuloy a mangibaon kadagiti leon iti tengngada;+ ket, adtoy! pappapatayenda ida, yantangay awan ti makaammo iti relihion ti Dios ti daga.” 27  Gapu iti dayta imbilin ti ari ti Asiria, a kunkunana: “Papanenyo sadiay ti maysa kadagiti padi+ nga inturongyo iti pannakaidestiero manipud sadiay, tapno mapan ken agnaed sadiay ket isurona kadakuada ti relihion ti Dios ti daga.” 28  Iti kasta dimteng ti maysa kadagiti papadi nga inturongda iti pannakaidestiero manipud Samaria ket nangrugi a nagnaed idiay Bethel,+ ket nagbalin a mannursuroda no kasano ti rebbeng a panagbutengda ken Jehova.+ 29  Nupay kasta, tunggal sabali a nasion nagbalin a managaramid iti bukodna a dios,+ a kalpasanna inkabilda iti balay dagiti nangato a disso nga inaramid dagiti Samaritano, tunggal sabali a nasion, kadagiti siudadda a pagnanaedanda. 30  Ket dagiti lallaki ti Babilonia, iti biangda, inaramidda ti Succot-benot, ket dagiti lallaki ti Cut,+ iti biangda, inaramidda ti Nergal, ket dagiti lallaki ti Hamat, iti biangda, inaramidda ti Asima. 31  No maipapan kadagiti Aveo,+ inaramidda ti Nibhaz ken ti Tartac; ket pupuoran idi dagiti Sefarvita+ ti annakda iti apuy+ ken Adramelec ken Anammelec a didios ti Sefarvaim. 32  Ket nagbalinda a managbuteng ken Jehova ket manipud iti kaaduan kadagiti umili nagaramidda maipaay kadakuada iti papadi+ dagiti nangato a disso, ket nagbalinda a managserbi maipaay kadakuada iti balay dagiti nangato a disso. 33  Nagbalinda a managbuteng ken Jehova,+ ngem nagbalinda a managdayaw iti bukodda a didios,+ maitunos iti relihion dagiti nasion a manipud kadakuada inturongda ida iti pannakaidestiero.+ 34  Agingga itoy nga aldaw ar-aramidenda ti maitunos kadagiti immun-una a relihionda.+ Awan ti nagbuteng ken Jehova+ ket awan ti mangar-aramid iti maitunos kadagiti paglinteganna ken kadagiti hudisial a pangngeddengna+ ken iti linteg+ ken iti bilin+ nga imbilin ni Jehova iti annak ni Jacob,+ a ti naganna pinagbalinna nga Israel;+ 35  idi a ni Jehova namatalged kadakuada iti tulag+ ket imbilinna kadakuada, a kunkunana: “Dikay agbuteng kadagiti sabali a didios,+ ket dikay agruknoy kadakuada wenno uray agserbi kadakuada wenno uray agisakripisio kadakuada.+ 36  No di ket ni Jehova, a nangaon kadakayo iti daga ti Egipto babaen iti dakkel a pannakabalin ken siuunnat a takiag,+ isu Daydiay rebbeng a pagbutnganyo,+ ket rebbeng nga agruknoykayo kenkuana,+ ket rebbeng nga agisakripisiokayo kenkuana.+ 37  Ket dagiti alagaden+ ken dagiti hudisial a pangngeddeng+ ken ti linteg ken ti bilin nga insuratna nga agpaay kadakayo,+ rebbeng nga annadanyo nga aramiden a kanayon;+ ket dikay agbuteng kadagiti sabali a didios. 38  Ket ti tulag a pinatalgedak kadakayo, dikay lipaten;+ ket dikay agbuteng kadagiti sabali a didios.+ 39  No di ket ni Jehova+ a Diosyo ti rebbeng a pagbutnganyo, yantangay isu ti mangispalto kadakayo iti ima dagiti amin a kabusoryo.”+ 40  Ket saanda a nagtulnog, no di ket inaramidda ti maitunos iti immun-una a relihionda.+ 41  Ket nagbalin dagitoy a nasion a managbuteng ken Jehova,+ ngem nagserserbida iti bukodda a kinitikitan a ladladawan. No maipapan nga agpadpada iti annakda ken appokoda, isuda ar-aramidenda ti kas iti inaramid dagidi ammada agingga itoy nga aldaw.

Footnotes