Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Timoteo 5:1-25

5  Dika palaluan a dillawen ti maysa a lakay.+ Iti kasupadina, makipakaasika kenkuana a kas ama, kadagiti ub-ubing a lallaki a kas kakabsat a lallaki,  kadagiti babbaket+ a kas inna, kadagiti ub-ubing a babbai a kas kakabsat a babbai+ buyogen ti isuamin a kinadalus.  Padayawam dagiti balo a babbai a pudpudno a balo.+  Ngem no ti asinoman a balo a babai addaan iti annak wenno appoko, sursuruen koma nga umuna dagitoy ti panangannurot iti nadiosan a debosion iti bukodda a sangakabbalayan+ ket agtultuloyda a mangibayad iti maiparbeng a pangsubad kadagiti nagannakda+ ken kadagiti apongda, ta makaay-ayo daytoy iti imatang ti Dios.+  Ita ti babai a pudpudno a balo ken napanawan a taltalipungawen+ insaadna ti namnamana iti Dios+ ket agtultuloy kadagiti panagararaw ken panagkararag iti rabii ken aldaw.+  Ngem daydiay maigamer iti linalasag a panagpennek+ natay+ nupay isu sibibiag.  Gapuna itultuloymo nga ipaay dagitoy a bilin,+ tapno awan koma ti pakababalawanda.+  Pudno unay no ti asinoman saanna nga ipaay ti kasapulan dagidiay kukuana,+ ken nangnangruna dagidiay kameng ti sangakabbalayanna,+ pinaglikudanna+ ti pammati+ ket isu dakdakes ngem ti tao nga awanan pammati.  Mailista koma ti maysa a balo a babai a saan a nakurkurang ngem innem a pulo ti tawenna, asawa ti maymaysa a lalaki,+ 10  adda pangsaksi a naited kenkuana gapu iti nasayaat nga ar-aramid,+ no nangpadakkel iti annak,+ no nangsangaili kadagiti ganggannaet,+ no binugguanna ti saksaka dagiti sasanto,+ no pinabang-aranna dagidiay adda iti rigat,+ no sinurotna a sigaganetget ti tunggal naimbag nga aramid.+ 11  Iti sabali a bangir, dika patgan dagiti ub-ubing a balo a babbai, ta no dagiti seksual a rasukda umapay iti nagbaetanda ken iti Kristo,+ kayatda ti makiasawa, 12  maukomda agsipud ta saanda a tinagipateg ti immuna nga ebkas ti pammatida.+ 13  Kabayatanna masursuroda met ti di makumikom, nga umalla-allatiwda iti balbalay; wen, saan laeng a di makumikom, no di ket manangidanondanon ken mannakibiangda pay iti ar-aramid ti sabsabali a tattao,+ a sarsaritaenda ti bambanag a saanda a rebbeng. 14  Gapuna tarigagayak a dagiti ub-ubing a balo a babbai makiasawada,+ nga agipasngayda iti annak,+ nga agaywanda iti sangakabbalayan, a saanda nga ikkan ti bumusbusor iti pakagutugotan a mangrabngis.+ 15  Iti kinapudnona, sumagmamanon ti naisiasi tapno sumurotda ken Satanas. 16  No ti asinoman a mamati a babai addaan kadagiti balo a babbai, palag-ananna koma ida,+ ket saan koma a mapadagsenan ti kongregasion. Iti kasta mapalag-anan dayta dagidiay pudpudno a balo.+ 17  Dagiti lallakay a mangidaulo+ iti nasayaat a wagas maibilangda koma a maikari iti mapamindua a dayaw,+ nangnangruna dagidiay agtrabaho a sipipinget iti panagsao ken panangisuro.+ 18  Ta kuna ti kasuratan: “Dika busalan ti toro no agirik iti bukbukel”;+ kasta met: “Ti mangmangged maikari kadagiti tangdanna.”+ 19  Dika awaten ti pammabasol maibusor iti maysa a lakay, malaksid laeng iti pammaneknek ti dua wenno tallo a saksi.+ 20  Iti sanguanan dagiti amin nga umim-imatang tubngarem+ dagiti tattao a mangyugali iti panagbasol,+ tapno agbuteng met ti dadduma.+ 21  Iti sanguanan ti Dios ken ni Kristo Jesus ken dagiti napili nga anghel sipapasnek a bilinenka+ a salimetmetam dagitoy a banag nga awan nasaksakbay a panagipato, a saanka nga agaramid iti aniaman maitunos iti pagannayasan nga adda dasdasiganna.+ 22  Dika pulos ipatay a sidadarasudos dagiti imam+ iti asinoman a tao;+ dika met agbalin a mannakiraman kadagiti basol ti sabsabali;+ taginayonem a nadalus ta bagim.+ 23  Dika uminumen iti danum, no di ket agusarka iti bassit nga arak+ maigapu ita rusokmo ken kadagiti masansan a panagsaksakitmo. 24  Dagiti basol ti dadduma a tattao silalatak a maiparangarang,+ a mangiturong a mismo iti pannakaukom, ngem no maipapan iti dadduma a tattao dagiti basolda maiparangarang met a maud-udi.+ 25  Iti kasta met laeng a pamay-an silalatak a maiparangarang ti nasayaat nga ar-aramid+ ket dagidiay saan a kasta saan a mabalin nga ilemmeng.+

Footnotes