Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

1 Samuel 9:1-27

9  Ita adda idi ti maysa a lalaki ti Benjamin, ket ti naganna Kis,+ ti anak ni Abiel, ti anak ni Zeror, ti anak ni Becorat, ti anak ni Afias, a Benjaminita,+ maysa a lalaki a mannakabalin iti kinabaknang.+  Ket naaddaan idi iti anak nga agnagan Saul,+ agtutubo ken nataer, ket awan lalaki iti annak ti Israel a natataer ngem isu; manipud kadagiti abagana nga agpangato isu nataytayag ngem iti amin nga umili.+  Ket napukaw dagiti asna+ a kukua ni Kis nga ama ni Saul. Gapuna ni Kis kinunana ken Saul nga anakna: “Mangikuyogka, pangngaasim, iti maysa kadagiti katulongan ket tumakderka, inka, sapulem dagiti asna.”  Ket linasatna dagiti nakabambantay a rehion ti Efraim+ ket limmasat iti daga ti Salisa,+ ket saanda a nasarakan ida. Ket limmasatda iti daga ti Saalim, ngem awanda sadiay. Ket isu limmasat iti daga dagiti Benjaminita, ket saanda a nasarakan ida.  Isuda dimtengda iti daga ti Zuf; ket ni Saul, iti biangna, kinunana iti katulonganna a kaduana: “Umayka, ket agsublita, tapno saan nga isardeng ni amak ti panangasikaso kadagiti asna ket pudno a pakaringgoranna ti maipapan kadata.”+  Ngem kinunana kenkuana: “Adtoy, pangngaasim! Adda maysa a lalaki ti Dios+ iti daytoy a siudad, ket ti lalaki madaydayaw. Amin a sawenna pumudno a di bumurong.+ Mapanta ita sadiay. Bareng maibagana kadata ti dalanta a masapul a papananta.”  Gapu itoy kinuna ni Saul iti katulonganna: “Ket no mapanta, anianto ti iyegta iti lalaki?+ agsipud ta awanen ti tinapay kadagiti pagkargaanta, ket, kas sagut,+ awan ti maiyegta iti lalaki ti pudno a Dios. Ania ti adda kadata?”  Gapuna ti katulongan simmungbat ken Saul iti naminsan pay ket kinunana: “Adtoy! Adda kakapat ti maysa a siklo+ a pirak iti imak, ket itedkonto iti lalaki ti pudno a Dios, ket ibagananto kadata ti dalanta.”  (Kadagidi nagkauna a tiempo iti Israel kastoy ti panagsao ti tao iti ipapanna panangsapul iti Dios: “Umaykayo, ket mapantayo iti pumaparmata.”+ Ta ti mammadto ita nga aldaw maaw-awagan iti pumaparmata kadagidi nagkauna a tiempo.) 10  Kalpasanna kinuna ni Saul iti katulonganna: “Naimbag ti saom.+ Umayka, mapanta.” Ket napanda iti siudad nga ayan ti lalaki ti pudno a Dios. 11  Bayat a sumangsang-atda iti sasang-atan nga agturong iti siudad, isuda nakasarakda kadagiti babbai a rumrummuar a sumakdo iti danum.+ Gapuna kinunada kadakuada: “Adda kadi iti daytoy a lugar ti pumaparmata?”+ 12  Kalpasanna simmungbatda kadakuada ket kinunada: “Adda. Adtoy! Adda iti masanguanam. Darasemon, agsipud ta immay iti siudad ita nga aldaw, ta adda sakripisio+ ita nga aldaw maipaay kadagiti umili iti nangato a disso.+ 13  Apaman a makagtengkayo iti siudad, masarakanyonto a madagdagus sakbay a sumang-at iti nangato a disso a mangan; agsipud ta saan a mangan dagiti umili agingga iti iyaayna, ta isu ti mangbendision iti sakripisio.+ Umuna kalpasan dayta dagidiay naawis mabalindan ti mangan. Ket ita sumang-atkayo, agsipud ta isu—ita met laeng masarakanyonto.” 14  Iti kasta simmang-atda iti siudad. Bayat ti idadatengda iti tengnga ti siudad, ay ket, rumrummuar idi ni Samuel a sumabet kadakuada tapno sumang-at iti nangato a disso. 15  No maipapan ken Jehova, linuktanna ti lapayag+ ni Samuel iti aldaw sakbay nga immay ni Saul, a kinunana: 16  “Inton bigat iti agarup kastoy nga oras ibaonkonto kenka ti maysa a lalaki manipud daga ti Benjamin,+ ket masapul a pulotam+ kas panguluen iti ilik nga Israel; ket masapul nga isalakanna ti ilik iti ima dagiti Filisteo,+ agsipud ta nakitak ti pannakaparigat ti ilik, ta dimteng kaniak ti ikkisda.”+ 17  Ket ni met laeng Samuel nakitana ni Saul, ket ni Jehova, iti biangna, simmungbat kenkuana: “Adtoy ti lalaki a kinunak kenka, ‘Daytoy ti mangmedmedto iti ilik iti uneg dagiti pagbeddengan.’”+ 18  Idin ni Saul immasideg ken Samuel iti tengnga ti ruangan ket kinunana: “Ibagam kaniak, pangngaasim, Sadino kadi ti balay ti pumaparmata?” 19  Ket ni Samuel simmungbat ken Saul ket kinunana: “Siak ti pumaparmata. Sumang-atka iti masanguanak agingga iti nangato a disso, ket masapul a makipangankayo kaniak ita nga aldaw,+ ket palubosankanto iti bigat, ket isuamin nga adda ita pusom ibagakto kenka.+ 20  No maipapan kadagiti asna a napukaw kenka tallo nga aldaw ti napalabasen,+ dika isaad ta pusom+ kadakuada, ta nasarakandan. Ket siasino ti pagpaayan ti isuamin a matarigagayan iti Israel?+ Saan kadi a kenka ken iti intero a balay ni amam?” 21  Gapu itoy simmungbat ni Saul ket kinunana: “Saan aya a maysaak a Benjaminita ti kabassitan+ kadagiti tribu ti Israel,+ ket ti pamiliak kanunumuan iti amin a pampamilia ti tribu ti Benjamin?+ Ngarud apay a sinaom kaniak ti banag a kas itoy?”+ 22  Kalpasanna ni Samuel innalana ni Saul ken ti katulonganna ket impanna ida iti siled a panganan ket impaayanna ida iti lugar a pannakaulo+ dagidiay naawis; ket agarup tallopuloda a lallaki. 23  Idi agangay kinuna ni Samuel iti kosinero: “Itedmo ti bingay nga intedko kenka, a maipapan iti dayta kinunak kenka, ‘Ipaknim.’” 24  Iti kasta ti kosinero innalana ti luppo ken ti adda iti dayta, ket inkabilna iti sango ni Saul. Ket kinunana: “Adtoy ti nailasin. Ikabilmo iti sangom. Kanem, agsipud ta agingga iti naituding a tiempo inlasinda dayta maipaay kenka tapno makipanganka kadagidiay naawis.” Gapuna ni Saul nakipangan ken Samuel iti dayta nga aldaw. 25  Kalpasanna simmalogda iti siudad manipud nangato a disso,+ ket intultuloyna ti nakisao ken Saul iti tuktok ti balay.+ 26  Idin bimmangonda a nasapa, ket naaramid nga apaman a nagbannawagen inayaban ni Samuel ni Saul iti tuktok ti balay, a kunkunana: “Tumakderka, tapno palubosanka.” Gapuna timmakder ni Saul ket isuda a dua, isu ken ni Samuel, napanda iti ruar. 27  Bayat a sumalsalogda iti igid ti siudad kinuna a mismo ni Samuel ken Saul: “Sawem iti katulongan+ nga umun-unan ngem kadata”—gapuna isu immun-unan—“ket, no maipapan kenka, agintekka ita tapno maipangngegko kenka ti sao ti Dios.”

Footnotes