Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Samuel 26:1-25

26  Idi agangay dagiti lallaki a taga Zif+ immayda ken Saul idiay Gabaa,+ a kunkunada: “Saan aya nga aglemlemmeng ni David iti turod ti Haquila,+ a nakasango iti Jesimon?”+  Ket timmakder ni Saul+ ket simmalog a napan iti let-ang ti Zif, ket naikuyog kenkuana ti tallo ribu a lallaki,+ dagidiay napili ti Israel, a mangsapul ken David idiay let-ang ti Zif.  Ket nagkampo ni Saul iti turod ti Haquila, a sumango iti Jesimon, iti igid ti dalan, bayat a ni David agnanaed idi idiay let-ang. Ket nakitana a simmurot kenkuana ni Saul iti let-ang.  Gapuna nangibaon ni David kadagiti managsimisim+ tapno maammuanna a pudno nga immay ni Saul.  Idi agangay timmakder ni David ket napan iti lugar a nagkampuan ni Saul, ket nakita ni David ti disso a nagiddaan ni Saul, ken kasta met ni Abner+ nga anak ni Ner a panguluen ti buyotna; ket nakaidda ni Saul iti uneg ti kampo+ a dagiti tattao nagkampoda iti intero nga aglikmutna.  Idin simmungbat ni David ket kinunana ken Ahimelec a Heteo+ ken ni Abisai+ nga anak ni Zeruia,+ ti kabsat ni Joab: “Siasino ti makipagsalogto kaniak a mapan ken Saul iti kampo?” Iti daytoy kinuna ni Abisai: “Siak makipagsalogakto kenka.”+  Ket ni David napan a kaduana ni Abisai kadagiti tattao iti rabii; ket, adtoy! nakaidda a matmaturog ni Saul iti uneg ti kampo a ti pikana situtugkel iti daga iti uluananna, ket ni Abner ken dagiti tattao nakaiddada iti intero nga aglikmutna.  Ni Abisai kinunana ita ken David: “Ti Dios insukona ita nga aldaw ti kabusormo ita imam.+ Ket ita bay-annak, pangngaasim, a tugkelak a sumalpot agingga iti daga babaen ti pika iti maminsan laeng, ket saankonto a piduaen nga aramiden dayta kenkuana.”  Nupay kasta, ni David kinunana ken Abisai: “Dika dadaelen, ta siasino ti nangyunnat iti imana maibusor iti pinulotan ni Jehova+ ket nagtalinaed nga awanan basol?”+ 10  Ket intultuloy a kunaen ni David: “Kas sibibiag ni Jehova,+ kabilento a mismo ni Jehova;+ wenno dumtengto ti aldawna+ ket kasapulanto a matay, wenno sumalogto a mapan iti bakal,+ ket sigurado a mapunasto.+ 11  Narigat a pagarupen,+ iti biangko, manipud panangmatmat ni Jehova,+ nga iyunnatko ti imak+ maibusor iti pinulotan ni Jehova!+ Gapuna ita alaem, pangngaasim, ti pika nga adda iti uluananna ken ti puronggo ti danum, ket mapantan.” 12  Iti kasta innala ni David ti pika ken ti puronggo ti danum iti uluanan ni Saul, ket kalpasanna napandan; ket awan ti asinoman a nakakita+ wenno asinoman a nakaimutektek wenno asinoman a nakariing, ta nakaturogda amin, agsipud ta nargaan a turog+ manipud ken Jehova ti immapay kadakuada. 13  Idin bimmallasiw ni David iti sabali a bangir ket nagtakder iti tapaw ti bantay iti adayo, a nakalawlawa ti nagbaetanda. 14  Ket rinugian ni David a pukkawan dagiti tattao ken ni Abner nga anak ni Ner, a kunkunana: “Saanka kadi a sumungbat, Abner?” Ket ni Abner+ nangrugi a sumungbat ken agkuna: “Siasinoka a nangpukkaw iti ari?” 15  Ket ni David kinunana ken Abner: “Saanka kadi a lalaki? Ket siasino ti kas kenka iti Israel? Apay, ngarud, a saanmo a binantayan ti apom nga ari? Ta simrek ti maysa kadagiti tattao tapno dadaelenna ti ari nga apom.+ 16  Daytoy a banag nga inaramidmo saan a nasayaat. Kas sibibiag ni Jehova,+ dakayo a lallaki maikarikayo a matay,+ agsipud ta saanyo a binantayan+ ti apoyo, ti pinulotan ni Jehova.+ Ket ita kitaem no sadino ti ayan ti pika ti ari ken ti puronggo ti danum+ nga adda idi iti uluananna.” 17  Ket nangrugi a mailasin ni Saul ti timek ni David ket kinunana: “Timekmo kadi daytoy, anakko a David?”+ Iti daytoy kinuna ni David: “Timekko, apok nga ari.” 18  Ket innayonna: “Apay a kastoy a ti apok kamkamatenna ti adipenna,+ ta ania aya ti inaramidko, ket ania a kinadakes ti adda iti imak?+ 19  Ket ita ti apok nga ari, pangngaasim, umimdeng koma iti sasao ti adipenna: No ni Jehova ti nanggargari kenka a bumusor kaniak, makasay-up koma iti daton a bukbukel.+ Ngem no ti annak ti tao,+ mailunodda iti sango ni Jehova,+ agsipud ta pinagtalawdak ita nga aldaw manipud pannakarikna a naisinggalutak iti tawid ni Jehova,+ a kunkunada, ‘Inka, agserbika iti sabali a didios!’+ 20  Ket ita dika bay-an nga agtinnag ti darak iti daga iti sanguanan ni Jehova;+ ta ti ari ti Israel rimmuar a mangsapul iti maymaysa a timel,+ no kasano a ti maysa agkamat iti tukling iti bambantay.”+ 21  Kinuna ni Saul kalpasanna: “Nagbasolak.+ Agsublika, anakko a David, ta saankanton a dangran, gapu iti kinapudno a nagpateg ti kararuak+ kadagita matam itoy nga aldaw. Adtoy! Nagtignayak a simamaag ket nagbiddutak iti kasta unay.” 22  Idin simmungbat ni David ket kinunana: “Adtoy ti pika ti ari, ket umay koma ti maysa kadagiti agtutubo a lallaki ket alaenna. 23  Ket ni Jehova ti mangsupapakto iti tunggal maysa ti bukodna a kinalinteg+ ken ti bukodna a kinamatalek, ta ita nga aldaw inyawatnaka ni Jehova iti imak, ket saanko a kinayat nga iyunnat ti imak maibusor iti pinulotan ni Jehova.+ 24  Ket, adtoy! no kasano a naindaklan ti kararuam itoy nga aldaw kadagiti matak, kasta koma a naindaklan ti kararuak kadagiti mata ni Jehova,+ tapno ispalennak iti isuamin a rigat.”+ 25  Gapu itoy ni Saul kinunana ken David: “Benditoka koma, anakko a David. Saan laeng nga agaramidkanto a di bumurong no di ket mangabakkanto met a di bumurong.”+ Ket napan ni David iti dalanna; ket no maipapan ken Saul, nagsubli iti lugarna.+

Footnotes