Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Samuel 25:1-44

25  Idi agangay natay ni Samuel;+ ket naguummong a sangsangkamaysa ti intero nga Israel ket dinung-awanda+ ket intabonda iti balayna idiay Rama.+ Kalpasanna timmakder ni David ket simmalog a napan idiay let-ang ti Paran.+  Ita adda idi ti maysa a lalaki idiay Maon,+ ket ti trabahona adda idiay Carmelo.+ Ket naindaklan unay ti lalaki, ket addaan iti tallo ribu a karnero ken sangaribu a kalding; ket pukpukisanna+ idi dagiti karnerona idiay Carmelo.  Ket ti nagan ti lalaki Nabal,+ ket ti nagan ti asawana Abigail.+ Ket ti asawa a babai nasayaat ti sariritna+ ken napintas ti langana, ngem ti asawa a lalaki nagubsang ken dakes iti ar-aramidna;+ ket isu Calebita.+  Ket nangngeg ni David idiay let-ang a pukpukisan+ ni Nabal dagiti karnerona.  Gapuna nangibaon ni David iti sangapulo nga agtutubo a lallaki ket kinuna ni David kadagiti agtutubo a lallaki: “Sumang-atkayo iti Carmelo, ket mapankayto ken Nabal ket iti naganko imtuodenyo kenkuana ti maipapan ti kasasaadna.+  Ket daytoy ti kunaenyonto iti kabsatko, ‘Nasayaatka koma+ ken nasayaat met koma ti sangakabbalayam ket ti isuamin nga adda kenka nasayaatda koma.  Ket ita nangngegko nga addaanka kadagiti mamukpukis. Ita dagiti pastor a kukuam addada idi kadakami.+ Saanmi ida a sinemsem,+ ket awan a pulos ti napukaw a kukuada iti amin nga al-aldaw a kaaddada idi iti Carmelo.  Imtuodam dagiti bukodmo nga agtutubo a lallaki, ket ibagadanto kenka, tapno dagiti agtutubok a lallaki makasarakda koma iti pabor kadagita matam, agsipud ta immaykami iti nasayaat nga aldaw. Itedmo laeng, pangngaasim, kadagiti adipenmo ken iti anakmo a David ti aniaman a masarakan ta imam.’”+  Iti kasta dimteng dagiti agtutubo a lallaki ni David ket nagsaoda ken Nabal maitunos kadagitoy amin a sasao iti nagan ni David ket kalpasanna nagurayda. 10  Gapu itoy sinungbatan ni Nabal dagiti adipen ni David ket kinunana: “Siasino ni David,+ ken siasino ti anak ni Jesse? Kadagitoy nga aldaw umad-adu dagiti adipen a suminsina, tunggal maysa manipud sanguanan ti apona.+ 11  Ket kasapulan kadi nga alaek ti tinapayko+ ken ti danumko ken ti naparti a karnek a ginerretko maipaay kadagiti mamukpukisko ket itedko kadagiti lallaki a saanko nga ammo uray ti naggapuanda?”+ 12  Kalpasan dayta dagiti agtutubo a lallaki ni David nagbueltada iti dalanda ket nagsublida ken immayda ket impadamagda kenkuana maitunos kadagitoy amin a sasao. 13  Dagus a kinuna ni David kadagiti tattaona: “Ibarikesyo tunggal maysa ti kampilanna!”+ Gapuna imbarikesda tunggal maysa ti kampilanna ket uray met ni David imbarikesna ti bukodna a kampilan; ket rinugianda ti sumang-at a sumarsaruno ken David, agarup uppat a gasut a lallaki, bayat a dua gasut ti nagtugaw iti sibay ti gargaret.+ 14  Kabayatanna, ti maysa kadagiti agtutubo a lallaki impadamagna ken Abigail, asawa ni Nabal, a kunkunana: “Adtoy! Nangibaon ni David kadagiti mensahero manipud let-ang a kumablaaw iti naimbag ken apomi, ngem nangibugkaw kadagiti pammabalaw+ kadakuada. 15  Ket nasayaat unay idi kadakami dagiti lallaki, ket saandakami a sinemsem, ket saankami a nagkurang iti uray maysa a banag iti amin nga al-aldaw ti pannakipagnapagnami kadakuada bayat ti kaaddami idi iti tay-ak.+ 16  Nagbalinda a maysa a pader+ iti likmutmi agpadpada iti rabii ken iti aldaw, iti amin nga al-aldaw a kaaddami kadakuada, a mangipaspastor iti arban. 17  Ket ita ammuem ken kitaem no ania ti aramidem, ta naikeddengen ti didigra+ maibusor ken apomi ken maibusor iti intero a balayna, yantangay nalabes unay ti kinaawan kaes-eskanna a tao+ a kasasao.” 18  Madagdagus a nagganat ni Abigail+ ket nangala iti dua gasut a tinapay ken dua a dadakkel a karamba nga arak+ ken lima a karnero a naparti+ ken lima a sea a sukat ti kinirog+ a bukel ken sangagasut a bibingka a pasas+ ken dua gasut a bibingka ti pinilpil a higos+ ket imparabawna ida kadagiti asno. 19  Kalpasanna kinunana kadagiti agtutubona a lallaki: “Lumasatkayo nga umun-una ngem siak.+ Adtoy! Sumarunoak kadakayo.” Ngem awan imbagana ken asawana a Nabal. 20  Ket napasamak a bayat a sisasakay idi iti asno+ ken sililimed a sumalsalog iti bantay, ay ket, adda ni David ken dagiti tattaona a sumalsalog a sumabet kenkuana. Gapuna sinabatna ida. 21  No maipapan ken David, naikunana: “Naan-anay a pannakaupay ti nagpaayan ti panangsaluadko iti isuamin a kukua daytoy a tao idiay let-ang ket awan uray maysa a banag iti isuamin a kukuana ti napukaw,+ ket kaskasdi supapakannak iti dakes kas pangsubad iti naimbag.+ 22  Kasta koma ti aramiden ti Dios kadagiti kabusor ni David ket kasta koma ti inayonna iti dayta+ no adda asinoman nga iteddak agingga iti bigat+ manipud iti isuamin a kukuana nga umisbo iti pader.”+ 23  Idi a ni Abigail naimatanganna ni David, madagdagus a nagganat ket dimsaag iti asno ket inruknoyna ti rupana iti sanguanan ni David ket nagrukob+ agingga iti daga. 24  Kalpasanna nagruknoy kadagiti sakana+ ket kinunana: “Maiparabaw koma kaniak a mismo, O apok, ti biddut;+ ket, pangngaasim, bay-am nga agsao ti adipenmo a babai kadagita lapayagmo,+ ket umimdengka iti sasao ti adipenmo a babai. 25  Pangngaasim, saan koma nga isaad ti apok ti pusona iti daytoy awan kaes-eskanna+ a tao a ni Nabal, ta, kas iti naganna, kasta isuna. Nabal ti naganna, ket adda kenkuana ti kinakuneng.+ No maipapan kaniak nga adipenmo a babai, saanko a nakita dagiti agtutubo a lallaki ti apok nga imbaonmo. 26  Ket ita, apok, kas sibibiag ni Jehova+ ken kas sibibiag ta kararuam,+ inggawidnaka ni Jehova+ a sumrek iti panagbasol iti dara+ ken mangusar iti bukodmo nga ima a pakaisalakanam.+ Ket ita dagiti kabusormo ken dagidiay agtartarigagay iti pannakadangran ti apok agbalinda koma a kas ken Nabal.+ 27  Ket ita no maipapan itoy a sagut a bendision+ nga inyeg ti adipenmo a babai iti apok, maitedto kadagiti agtutubo a lallaki a magmagna kadagiti addang+ ni apok. 28  Pakawanem, pangngaasim, ti salungasing ti adipenmo a babai,+ agsipud ta di bumurong a ti apok iyaramidanto ni Jehova iti agpaut a balay,+ agsipud ta dagiti gubat ni Jehova ti iruprupak ti apok;+ ket no maipapan iti kinadakes, saanto a masarakan kenka iti intero nga al-aldawmo.+ 29  No tumakder ti maysa a tao tapno kamatennaka ken sapulenna ta kararuam, ti kararua ti apok sigurado a mabungonto iti supot ti biag+ ken Jehova a Diosmo;+ ngem, no maipapan iti kararua dagiti kabusormo, ipallatibongnanto dayta a kasla naggapu iti uneg ti lungog ti pallatibong.+ 30  Ket mapasamakto nga, agsipud ta aramidento ni Jehova iti apok ti naimbag maipaay kenka maitunos iti isuamin a sinaona, sigurado a parebbengannakanto a kas panguluen iti Israel.+ 31  Ket saan koma nga agbalin daytoy kenka a pakaigapuan ti panagbariring wenno pakaitibkolan ti puso ti apok, agpadpada babaen ti panangibukbok iti dara nga awan gapgapuna+ ken babaen ti panangisalakan kenkuana ti mismo nga ima ni apok.+ Ket sigurado a ni Jehova agaramidto iti naimbag iti apok, ket lagipemto+ ti adipenmo a babai.” 32  Gapu itoy ni David kinunana ken Abigail: “Bendito koma ni Jehova a Dios ti Israel,+ a nangibaon kenka itoy nga aldaw a sumabet kaniak! 33  Ket mabendisionan koma ti kinasimbengmo,+ ken mabendisionanka koma sika a nangpawil kaniak itoy nga aldaw a sumrek iti panagbasol iti dara+ ken mangusar iti bukodko nga ima a pakaisalakanak.+ 34  Ket, iti sabali a bangir, kas sibibiag ni Jehova a Dios ti Israel, a nangigawid kaniak a mangdangran kenka,+ no saanka a nagganat tapno makaumayka a sumabet kaniak,+ sigurado nga agingga iti aglawag ti bigat awan koma ti natedda ken Nabal nga asinoman nga umisbo iti pader.”+ 35  Gapuna inawat ni David manipud imana ti inyegna kenkuana, ket kinunana kenkuana: “Sumang-atka a sitatalna+ agingga iti balaymo. Kitaem, immimdengak iti timekmo tapno maipaayak iti konsiderasion+ ti kinataom.” 36  Idi agangay simrek ni Abigail a napan ken Nabal, ket sadiay isu agpadpadaya iti balayna kas iti padaya ti ari;+ ket agragragsak idi ti puso ni Nabal iti unegna, ket kasta unay ti pannakabartekna;+ ket awan ti imbagana kenkuana, bassit wenno dakkel, agingga iti aglawag ti bigat. 37  Ket naaramid iti bigat, idi nagmawmawen ti arak ken Nabal, nga imbaga kenkuana ti asawana dagitoy a banag. Ket natay ti pusona+ iti unegna, ket isu nagbalin a kasla bato. 38  Kalpasan dayta agarup sangapulo nga aldaw ti naglabas ket idin kinabil ni Jehova+ ni Nabal, iti kasta natay. 39  Ket nangngeg ni David a natay ni Nabal, ket ngarud kinunana: “Bendito koma ni Jehova, a nangtaming iti legal+ a kaso ti pannakaumsik+ tapno wayawayaannak iti ima ni Nabal ken nangigawid iti adipenna manipud kinadakes,+ ket ti kinadakes ni Nabal insubli ni Jehova iti rabaw ti bukodna nga ulo!”+ Ket nagbaon ni David ket indatagna ken Abigail nga alaenna a kas asawana.+ 40  Gapuna dagiti adipen ni David dimtengda ken Abigail idiay Carmelo ket nagsaoda kenkuana, a kunkunada: “Ni met laeng David imbaonnakami kenka tapno alaendaka a kas asawana.” 41  Dagus a timmakder ket nagruknoy a ti rupana dumanon iti daga+ ket kinunana: “Adtoy ti adipenmo a babai a kas adipen a mangbuggo iti saksaka+ dagiti adipen ti apok.”+ 42  Idin nagganat ni Abigail+ ket timmakder ket napan a nakasakay+ iti asno nga adda lima a babaonen a babbai a sumarsaruno iti likudanna; ket kimmuyog kadagiti mensahero ni David ket kalpasanna nagbalin nga asawana. 43  Ni David innalana met ni Ahinoam+ manipud Jezrael;+ ket dagiti babbai nagbalinda, isuda a dua, nga assawana.+ 44  No maipapan ken Saul, intedna ni Mical+ nga anakna a babai, asawa ni David, ken Palti+ nga anak ni Lais, a naggapu idiay Galim.+

Footnotes