Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Samuel 20:1-42

20  Ket nagtaray ni David+ manipud Naiot sadi Rama. Nupay kasta, dimteng ket kinunana iti sango ni Jonatan: “Ania ti inaramidko?+ Ania ti biddutko, ket ania a basol ti naaramidak iti sango ni amam, ta sapsapulenna ti kararuak?”  Gapu itoy kinunana kenkuana: “Narigat a pagarupen a kasta!+ Saankanto a matay. Adtoy! Saanto a mangaramid ni amak iti dakkel a banag wenno bassit a banag ket saanna nga ibutaktak iti lapayagko;+ ket iti ania a rason nga ilimed kaniak ni amak daytoy a banag?+ Saan a mapasamak daytoy.”  Ngem nagsapata ni David+ kas kanayonan ket kinunana: “Sigurado a maammuanto ni amam a nakasarakak iti pabor kadagita matam,+ ket ngarud kunaenna, ‘Dikay ipakaammo daytoy ken Jonatan ta amangan no masaktan.’ Ngem, iti kinapudnona, kas sibibiag ni Jehova+ ken kas sibibiag ta kararuam,+ adda laeng maysa nga addang iti nagbaetanmi ken patay!”+  Ket ni Jonatan kinunana ken David: “Aniaman a sawen ta kararuam aramidek maipaay kenka.”  Gapu itoy ni David kinunana ken Jonatan: “Adtoy! Baro a bulan inton bigat,+ ket siak, di masaaw, rebbeng nga agtugawak a mangan a kadua ti ari; ket sika papanawennakto, ket aglemmengakto+ iti tay-ak agingga iti rabii iti maikatlo nga aldaw.  No sapulennak latta ni amam, ngarud kunaemto, ‘Sipapasnek ni David a nagkiddaw kaniak iti pammalubos a lumangan tapno agtaray a mapan idiay Betlehem+ a siudadna, agsipud ta adda tinawen a sakripisio sadiay a maipaay iti intero a pamilia.’+  No kastoy ti panagsaona, ‘Awan parikut!’ kaipapananna ti talna iti adipenmo. Ngem no makaunget latta, ammuem a naikeddengnan ti dakes.+  Ket ipaaymonto ti naayat a kinamanangngaasi iti adipenmo,+ ta iti tulag+ ni Jehova ti nangikuyogam iti adipenmo. Ngem no adda biddut kaniak,+ sika a mismo ti mangpapatay kaniak, ta apay a rebbeng nga iyegnak pay laeng ken amam?”  Iti daytoy kinuna ni Jonatan: “Narigat a pagarupen dayta no maipapan kenka! Ngem no maammuak latta a naikeddengen ni amak ti dakes a dumteng kenka, saankonto aya nga ibaga kenka?”+ 10  Idin ni David kinunana ken Jonatan: “Siasino ti mangibaganto kaniak no nagubsang ti isungbat kenka ni amam?” 11  Kalpasanna ni Jonatan kinunana ken David: “Umayka ngarud, ket rummuarta a mapan iti tay-ak.” Gapuna rimmuarda a dua a napan iti tay-ak. 12  Ket ni Jonatan kinunana ken David: “Ni Jehova a Dios ti Israel+ [agbalin koma a saksi]+ nga usisaekto ni amak iti agarup kastoy nga oras inton bigat, wenno iti maikatlo nga aldaw, ket no kaay-ayona ni David, saanakto aya ngarud nga agbaon kenka ket sigurado nga ibutaktakko dayta iti lapayagmo? 13  Kasta koma ti aramiden ni Jehova ken Jonatan ken kasta koma ti inayonna iti dayta,+ no, kas pagarigan kasla naimbag ken amak nga aramiden ti dakes maibusor kenka, pudno a saanko nga ibutaktak iti lapayagmo ket papanawenka, ket pudno unay a saanka a mapan a sitatalna. Ket adda koma kenka ni Jehova,+ a kas ti kaaddana idi ken amak.+ 14  Ket saanmonto kadi, no sibibiagak pay laeng,+ wen, saanmonto kadi a watwaten maipaay kaniak ti naayat a kinamanangngaasi ni Jehova, tapno saanak a matay?+ 15  Ket saanmonto a gessaten ti bukodmo a naayat a kinamanangngaasi iti kaaddam iti sangakabbalayak agingga iti tiempo a di nakedngan.+ Inton gessaten ni Jehova dagiti kabusor ni David, tunggal maysa manipud iti rabaw ti daga, 16  saanto met a magessat ti nagan ni Jonatan iti balay ni David.+ Ket singirento dayta ni Jehova iti ima dagiti kabusor ni David.” 17  Gapuna ni Jonatan nagsapata manen ken David gapu iti ayatna kenkuana; ta inayatna a kas iti panagayatna iti bukodna a kararua.+ 18  Ket kinuna kenkuana ni Jonatan: “Baro a bulan inton bigat,+ ket sigurado a sapulsapulendakanto, agsipud ta bakantento ti tugawmo. 19  Ket sigurado nga iti maikatlo nga aldaw sapulsapulendakanto iti kasta unay; ket umaykanto iti disso a naglemmengam+ iti aldaw ti panagtrabaho, ket agyankanto iti asideg daytoy a bato ditoy. 20  Ket no maipapan kaniak, mangibiatakto iti tallo a pana iti maysa a sikigan dayta, nga ipaturongkonto ida iti maysa a puntiria. 21  Ket, adtoy! Ibaonkonto ti katulongan, a kunaek, ‘Inka, sapulem dagiti pana.’ No espesipiko a kunaek iti katulongan, ‘Adtoy! Adda dagiti pana iti daytoy a sikigam, alaem ida,’ ngarud umayka, ta kaipapananna ti talna kenka ket awan ti dakes a mapasamak, kas sibibiag ni Jehova.+ 22  Ngem no kastoy ti kunaek iti barito, ‘Adtoy! Adayo pay kenka dagiti pana,’ mapanka, ta pinapanawnaka ni Jehova. 23  Ket no maipapan iti sao a sinaota,+ siak ken sika, ay ket, adda koma ni Jehova iti nagbaetanta agingga iti tiempo a di nakedngan.”+ 24  Ket naglemmeng ni David iti tay-ak.+ Ket dimteng ti baro a bulan, ket nagtugaw ti ari maipaay iti pannangan.+ 25  Ket situtugaw idi ti ari iti tugawna kas kadagidi dadduma a gundaway, iti tugaw iti denna ti diding; ket sisasango kenkuana ni Jonatan, ket situtugaw ni Abner+ iti sibay ni Saul, ngem bakante ti lugar ni David. 26  Ket ni Saul saan a pulos nagsao iti aniaman iti dayta nga aldaw, ta kinunana iti bagina: “Adda napasamak iti kasta isu saan a nadalus,+ ta saan pay a nadalusan.” 27  Ket naaramid iti aldaw kalpasan ti baro a bulan, iti maikadua nga aldaw, a ti lugar ni David nagtultuloy a bakante. Gapu itoy ni Saul kinunana ken Jonatan nga anakna: “Apay a ti anak ni Jesse+ saan nga immay iti pannangan uray idi kalman wenno ita nga aldaw?” 28  Gapuna ni Jonatan simmungbat ken Saul: “Sipapasnek a nagkiddaw kaniak ni David iti pammalubos a lumangan tapno mapan idiay Betlehem.+ 29  Ket kinunana kaniak, ‘Palubosannak, pangngaasim, agsipud ta addaankami iti sakripisio ti pamilia iti siudad, ket ti bukodko a kabsat ti nangbilin kaniak. Gapuna ita, no nakasarakak iti pabor kadagita matam, palusposannak, pangngaasim, tapno makitak ti kakabsatko.’ Dayta ti makagapu a saan a nakaumay iti lamisaan ti ari.” 30  Idin bimmara ti unget+ ni Saul maibusor ken Jonatan ket kinunana kenkuana: “Sika nga anak ti rebelioso a babaonen a babai,+ saanko kadi a pagaammo unay a ti anak ni Jesse pilpiliem iti bukodmo a pannakaibabain ken iti pannakaibabain ti nailemmeng a paspaset ni inam?+ 31  Ta iti amin nga al-aldaw a sibibiag ti anak ni Jesse iti daga, sika ken ti panagarim saanto a maipasdek a sititibker.+ Gapuna agbaonka ket pasukonmo a maiyeg kaniak, ta isu naikeddeng iti ipapatay.”+ 32  Nupay kasta, ni Jonatan simmungbat ken Saul nga amana ket kinunana kenkuana: “Apay koma a mapapatay?+ Ania ti inaramidna?”+ 33  Iti kasta inggayang kenkuana ni Saul ti pika tapno kabilenna;+ ket naammuan ni Jonatan a naikeddengen ni amana a papatayenna ni David.+ 34  Dagus a timmakder ni Jonatan manipud lamisaan a sibabara ti ungetna,+ ket saan a nangan iti tinapay iti maikadua nga aldaw kalpasan ti baro a bulan, ta nasaktan maigapu ken David,+ agsipud ta impababa ti bukodna nga ama.+ 35  Ket naaramid iti bigat a rimmuar ni Jonatan a napan idiay tay-ak iti naituding a pagyanan ni David,+ ket kaduana ti maysa nga agtutubo a katulongan. 36  Ket kinunana iti katulonganna: “Agtarayka, pangngaasim, sapulem dagiti pana nga ibiatko.”+ Nagtaray ti katulongan, ket isu imbiatna ti pana tapno lumabes kenkuana. 37  Idi dimteng ti katulongan agingga iti lugar ti pana nga imbiat ni Jonatan, rinugian ni Jonatan ti agpukkaw iti likudan ti katulongan ken agkuna: “Saan aya nga adayo pay kenka ti pana?”+ 38  Ket intultuloy ni Jonatan ti nagpukkaw iti likudan ti katulongan: “Agganatka! Darasem ti agtignay! Dika agintek!” Ket pinidut ti katulongan ni Jonatan dagiti pana ket kalpasanna immay iti apona. 39  No maipapan iti katulongan, saanna nga ammo ti aniaman; da Jonatan ken David laeng a mismo ti makaammo maipapan iti banag. 40  Kalpasan dayta inted ni Jonatan dagiti igamna iti katulongan a kukuana ket kinunana kenkuana: “Inka, ipanmo ida iti siudad.” 41  Napan ti katulongan. No maipapan ken David, rimkuas manipud iti asideg nga agpaabagatan. Kalpasanna impasagna ti rupana iti daga+ ket nagruknoy iti namitlo; ket rinugianda nga agkan+ ti maysa ken maysa ken sangitan ti maysa ken maysa, agingga a nakarkaro ti naaramidan ni David.+ 42  Ket ni Jonatan kinunana ken David: “Mapanka a sitatalna,+ yantangay nagsapatata,+ a duata, iti nagan ni Jehova, a kinunata, ‘Adda koma ni Jehova iti nagbaetanta ken iti nagbaetan ti putotmo ken ti putotko agingga iti tiempo a di nakedngan.’”+ Iti kasta timmakder ni David ket napanen, ket ni met laeng Jonatan simrek iti siudad.

Footnotes