Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Samuel 17:1-58

17  Ket dagiti Filisteo+ inummongda a sangsangkamaysa dagiti pakarsoda maipaay iti gubat. Idi naummongda a sangsangkamaysa idiay Socoh,+ a kukua ti Juda, idin nagpakarsoda iti nagbaetan ti Socoh ken Azeca,+ idiay Efes-dammim.+  No maipapan ken Saul ken dagiti lallaki ti Israel, naguummongda a sangsangkamaysa ket nagpakarsoda iti nababa a tanap ti Elah,+ ket naguurnosda iti pannakibakal a sumabet kadagiti Filisteo.  Ket dagiti Filisteo agtaktakderda idi iti bantay iti daytoy a sikigan, ket dagiti Israelita agtaktakderda idi iti bantay iti dayta a sikigan, a nagbaetanda ti ginget.  Ket ti maysa a kampeon nangrugi a rummuar manipud kadagiti pakarso dagiti Filisteo, a ti naganna Goliat,+ manipud Gat,+ a ti katayagna innem a kasiko ken sangadangan.+  Ket adda kabal a gambang iti ulona, ket nakawesan iti nagsasaip a kabal, a naatip-atip a siksik, ket ti dagsen ti nagsasaip a kabal+ lima a ribu a siklo a gambang.  Ket adda gambang a sarapa ti gurong iti ngatuen dagiti sakana ken maysa a gayang+ a gambang iti baet dagiti abagana.  Ket ti kayo nga urong ti pikana kas iti pagpulipolan dagiti trabahador iti pagabelan,+ ket ti tadem ti pikana innem a gasut a siklo a landok; ket ti agaw-awit iti dakkel a kalasag agmarmartsa idi iti masanguananna.  Idin nagtakder a siiintek ket rinugianna a pukkawan dagiti linia ti bakal ti Israel+ ken kunaen kadakuada: “Apay a rummuarkayo nga aguurnos iti pannakibakal? Saan aya a siak ti Filisteo ket dakayo ad-adipen+ a kukua ni Saul? Mangpilikayo iti maysa a lalaki maipaay kadakayo, ket bay-anyo a sumalog nga umay kaniak.  No kabaelanna ti makirupak kaniak ket mapapataynak, agbalinkamto ngarud nga ad-adipen kadakayo. Ngem no siak pumadpadak kenkuana ket mapapatayko, agbalinkayto met nga ad-adipen kadakami, ket agserbikayto kadakami.”+ 10  Ket intultuloy a kunaen ti Filisteo: “Siak rurodek+ dagiti linia ti bakal ti Israel itoy nga aldaw. Ikkandak iti maysa a lalaki, ket agrinnupakkami!”+ 11  Idi nangngeg ni Saul+ ken ti intero nga Israel dagitoy a sasao ti Filisteo, ngarud napagkullayawda ket nagbutengda iti kasta unay.+ 12  Ita ni David isu ti anak daytoy Efrateo+ manipud Betlehem ti Juda nga agnagan Jesse. Ket addaan iti walo nga annak.+ Ket idi kaaldawan ni Saul lakayen ti lalaki iti tengnga dagiti tattao. 13  Ket napan ti tallo a kalakayan nga annak ni Jesse. Simmurotda ken Saul iti gubat,+ ket ti nagnagan ti tallo nga annakna a napan iti gubat ket Eliab+ nga inauna, ken ti maikadua nga anakna a ni Abinadab+ ken ti maikatlo a ni Sammah.+ 14  Ket ni David isu ti inaudian,+ ket dagiti met laeng tallo a kalakayan simmurotda ken Saul. 15  Ket ni David mapan ken agsubli idi manipud ken Saul tapno aywananna dagiti karnero+ ni amana idiay Betlehem. 16  Ket nagtultuloy nga immasideg ti Filisteo iti agsapa ken iti rabii ken nagsaad iti uppat a pulo nga aldaw. 17  Idin ni Jesse kinunana ken David nga anakna: “Alaem, pangngaasim, nga ipan iti kakabsatmo daytoy efa ti kinirog a bukel+ ken dagitoy sangapulo a tinapay, ket itulodmo ida a sidadaras iti pakarso iti kakabsatmo. 18  Ket dagitoy sangapulo a kapaset ti gatas rebbeng nga ipanmo iti panguluen ti sangaribu;+ kasta met, asikasuem koma ti bukodmo a kakabsat no maipapan iti kasasaadda,+ ket mangalaka koma kadakuada iti pakakitaan.” 19  Kabayatanna, ni Saul ken isuda ken ti amin a sabsabali a lallaki ti Israel addada iti nababa a tanap ti Elah,+ a makiruprupak kadagiti Filisteo.+ 20  Iti kasta ni David bimmangon a nasapa iti bigat ket imbatina dagiti karnero iti panangasikaso ti agay-aywan ket nagawit ken napan kas iti imbilin kenkuana ni Jesse.+ Idi nakagteng iti uneg ti kampo,+ dagiti puersa militar mapmapanda iti linia ti bakal,+ ket nagriawda maipaay iti bakal. 21  Ket ti Israel ken dagiti Filisteo rinugianda nga urnosen ti linia ti bakal a sumabet iti linia ti bakal. 22  Dagus nga imbati ni David ti gargaret+ nga adda kenkuana iti panangbantay ti agay-aywan ti gargaret+ ket napan a nagtaray iti linia ti bakal. Idi dimteng, rinugianna ti nagimtuod maipapan iti kasasaad ti kakabsatna.+ 23  Bayat a makisasao kadakuada, ay ket, adtoy ti kampeon, a ti naganna Goliat+ a Filisteo manipud Gat,+ um-umay manipud kadagiti linia ti bakal dagiti Filisteo, ket rinugianna a sinao ti isu met laeng a sasao kas idi immuna,+ ket naimdengan ni David. 24  No maipapan iti amin a lallaki ti Israel, idi makitada ti lalaki, ay ket, nagtatarayda maigapu kenkuana ket nagbutengda iti kasta unay.+ 25  Ket rinugian a kunaen dagiti lallaki ti Israel: “Nakitayo kadi daytoy lalaki a sumangsang-at? Ta sumangsang-at tapno rurodenna+ ti Israel. Ket mapasamakto a, ti lalaki a mangpapatay kenkuana, pabaknangento ti ari iti dakkel a kinabaknang, ket itednanto kenkuana ti bukodna nga anak a babai,+ ket ti balay ni amana wayawayaannanto iti Israel.”+ 26  Ket rinugian ni David a kunaen kadagiti lallaki a sitatakder iti asidegna: “Anianto ti maaramid iti lalaki a makapapatay iti dayta a Filisteo+ sadiay ken pudno a makaikkat iti umsi iti Israel?+ Ta siasino daytoy di nakugit+ a Filisteo tapno rurodenna+ dagiti linia ti bakal ti sibibiag a Dios?”+ 27  Idin sinao kenkuana dagiti umili ti isu met laeng a sasao a kas idi immuna, a kunkunada: “Kastoy ti maaramidto iti lalaki a mangpapatay kenkuana.” 28  Ket nangngeg ni Eliab+ a kalakayan a kabsatna bayat nga agsasao kadagiti lallaki, ket bimmara ti unget ni Eliab maibusor ken David,+ iti kasta kinunana: “Apay a simmalogka? Ket makin-aywan ti nangibatiam kadagidiay sumagmamano a karnero idiay let-ang?+ Siak pagaammok unay ti kinadursokmo ken ti kinadakes ta pusom,+ agsipud ta simmalogka a panggepmo a kitaen ti bakal.”+ 29  Iti daytoy kinuna ni David: “Ania aya ti inaramidko ita? Saan aya a sao laeng?”+ 30  Gapuna pimmanaw iti sibayna nga agturong iti sabali pay ket sinaona ti isu met laeng a sao a kas idi immuna,+ ket, kalpasanna, impaay kenkuana dagiti umili ti isu met laeng a sungbat a kas idi damo.+ 31  Gapuna nangngegan ti sasao a sinao ni David, ket imbagada iti sanguanan ni Saul. Ngarud impasukonna. 32  Ket ni David kinunana ken Saul: “Dika bay-an a ti puso ti asinoman a tao makul-ob iti unegna.+ Ti met laeng adipenmo mapanto ket pudno a makirupak iti daytoy a Filisteo.”+ 33  Ngem ni Saul kinunana ken David: “Saanmo a kabaelan ti mapan a bumusor iti daytoy a Filisteo tapno makirupakka kenkuana,+ ta maysaka laeng nga ubing,+ ket isu maysa a lalaki ti gubat manipud kinaubingna.” 34  Ket ni David kinunana ken Saul: “Ti adipenmo nagbalin a pastor ni amana iti tengnga ti arban, ket adda immay a maysa a leon,+ ken kasta met ti maysa nga oso, ket tunggal maysa nangala iti karnero manipud iti pangen. 35  Ket sinurotko ket kinabilko+ ket nangispalak manipud iti ngiwatna. Idi nangrugi a tumakder a bumusor kaniak, ginammatak ti barbasna ket kinabilko ket pinapatayko. 36  Agpadpada a ti leon ken ti oso pinapatay ti adipenmo; ket daytoy di nakugit a Filisteo+ agbalinto a kas iti maysa kadakuada, ta rinurodna+ dagiti linia ti bakal+ ti sibibiag a Dios.”+ 37  Kalpasanna innayon ni David: “Ni Jehova a nangispal kaniak iti gammat ti leon ken iti gammat ti oso, isu ti mangispalto kaniak iti ima daytoy a Filisteo.”+ Gapu itoy ni Saul kinunana ken David: “Inka, ket ni met laeng Jehova adda koma kenka.”+ 38  Ni Saul kinawesanna ita ni David kadagiti pagan-anayna, ket nangikabil iti gambang a kabal ti ulo iti rabaw ti ulona, a kalpasan dayta kinawesanna iti nagsasaip a kabal. 39  Idin imbarikes ni David ti kampilanna iti rabaw dagiti kawesna ket ginayagayna ti mapan [ngem saanna a kabaelan], agsipud ta saanna pay a napadas ida. Kamaudiananna ni David kinunana ken Saul: “Saanko a kabaelan ti mapan nga addaan kadagitoy a banag, ta saanko pay a napadas ida.” Gapuna inikkat ida ni David kenkuana.+ 40  Ket innalana ti sarukodna iti imana ket pinilina maipaay kenkuana ti lima a bato a kapapalanasan manipud naapres a ginget ket inkabilna ida iti supot ti pastor a nagserbi kenkuana kas pagkargaan, ket adda iti imana ti pallatibongna.+ Ket rinugianna ti immasideg iti Filisteo. 41  Ket nangrugi nga umay ti Filisteo, umas-asideg nga umas-asideg ken David, ket ti lalaki nga agaw-awit iti dakkel a kalasag adda idi iti masanguananna. 42  Ita idi kimmita ti Filisteo ket nakitana ni David, rinugianna nga umsien+ agsipud ta maysa nga ubing+ ken lumabbasit,+ a nalibnos ti langana.+ 43  Gapuna ti Filisteo kinunana ken David: “Maysaak aya nga aso,+ tapno umayka kaniak nga addaan kadagiti sarukod?” Gapuna ti Filisteo indawdawatna ti pakadaksan ni David babaen iti didiosna.+ 44  Ket ti Filisteo kinunana ken David: “Umayka latta kaniak, ket itedkonto ta lasagmo kadagiti agtatayab ti langlangit ken kadagiti animal ti tay-ak.”+ 45  Kinuna ni David iti Filisteo kalpasanna: “Umayka kaniak nga addaanka iti kampilan ken addaanka iti pika ken addaanka iti gayang,+ ngem umayak kenka nga addaanak iti nagan ni Jehova ti buybuyot,+ ti Dios dagiti linia ti bakal ti Israel, a rinurodmo.+ 46  Iti daytoy nga aldaw isukonakanto ni Jehova iti imak,+ ket sigurado a kabilenkanto ket ikkatek kenka ta ulom; ket sigurado nga itedkonto dagiti bangkay ti pakarso dagiti Filisteo iti daytoy nga aldaw kadagiti agtatayab ti langlangit ken kadagiti atap nga animal ti daga;+ ket dagiti tattao iti intero a daga maammuandanto nga adda maysa a Dios nga agpaay iti Israel.+ 47  Ket isuamin daytoy a kongregasion maammuandanto a saan a babaen ti kampilan wenno uray babaen ti pika a mangisalakan ni Jehova,+ agsipud ta kukua ni Jehova ti bakal,+ ket iyawatnakayto iti imami.”+ 48  Ket napasamak a timmakder ti Filisteo ket nagtultuloy nga immay ken immasideg nga immasideg a sumabet ken David, ket ni David nangrugi a nagdardaras ken nagtartaray nga agturong iti linia ti bakal a sumabet iti Filisteo.+ 49  Idin inkaut ni David ti imana iti supotna ket nangala iti maysa a bato manipud iti dayta ket impallatibongna, iti kasta pinuntaanna+ ti Filisteo iti mugingna ket limmumlom ti bato iti mugingna, ket napakleb iti daga.+ 50  Gapuna ni David, babaen ti maysa a pallatibong ken maysa a bato, napaneknekan a napigpigsa ngem iti Filisteo ket kinabilna ti Filisteo ket pinapatayna; ket awan idi ti kampilan iti ima ni David.+ 51  Ket nagtultuloy a nagtaray ni David ket nagtakder iti rabaw ti Filisteo. Kalpasanna innalana ti kampilanna+ ket inasutna iti kalubanna ket siniguradona a pinapatay idi pinutedna ti ulona babaen iti dayta.+ Ket nakita dagiti Filisteo a natayen daydiay mannakabalinda, ket nagtatarayda.+ 52  Iti kasta timmakder dagiti lallaki ti Israel ken ti Juda ket nagpukpukkawda ket kinamatda+ dagiti Filisteo agingga iti ginget+ ken agingga kadagiti ruangan ti Ekron,+ ket dagiti makapapatay ti pannakasugatda kadagiti Filisteo nagtultuloyda a napasag iti dalan manipud Saaraim,+ agpadpada nga agingga iti Gat ken agingga iti Ekron. 53  Kalpasanna nagsubli ti annak ti Israel manipud sibabara a panangkamatda kadagiti Filisteo ket sinamsamda+ dagiti kampoda. 54  Idin innala ni David ti ulo+ ti Filisteo ket inyegna iti Jerusalem, ket dagiti igamna inkabilna iti toldana.+ 55  Ita idi kanito a ni Saul nakitana ni David a mapmapan a sumabet iti Filisteo, kinunana ken Abner+ a panguluen ti buyot: “Makin-anak+ iti ubing,+ Abner?” Iti daytoy kinuna ni Abner: “Babaen ti biag ti kararuam, O ari, saanko a pulos nga ammo!” 56  Gapuna kinuna ti ari: “Agimtuodka no makin-anak iti barito.” 57  Iti kasta, apaman a nagsubli ni David manipud panangkabilna iti Filisteo, innala ni Abner ket inyegna iti sango ni Saul agraman ti ulo+ ti Filisteo nga adda iti imana. 58  Kinuna ita kenkuana ni Saul: “Makin-anak kenka, agtutubo?” nga iti dayta kinuna ni David: “Ti anak ni adipenmo a Jesse+ a Betlehemita.”+

Footnotes