Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

1 Samuel 16:1-23

16  Iti kamaudiananna ni Jehova kinunana ken Samuel: “Kasanonto kabayag ti panagleddaangmo gapu ken Saul,+ idinto ta siak, iti sabali a bangir, linaksidko nga agturay kas ari iti Israel?+ Punnuem ta saram iti lana+ ket mapanka. Ibaonkanto ken Jesse+ a Betlehemita, agsipud ta impaayak ti bagik iti maysa nga ari iti annakna.”+  Ngem kinuna ni Samuel: “Kasano ti ipapanko? Apaman a mangngeg dayta ni Saul sigurado a patayennakto.”+ Ket kinuna ni Jehova: “Mangikuyogka iti urbon a baka ti pangen, ket kunaemto, ‘Panagisakripisio ken Jehova ti makagapu nga immayak.’+  Ket masapul nga ayabam ni Jesse iti panagisakripisio; ket siak, iti biangko, ipakaammokto kenka no ania ti rebbeng nga aramidem,+ ket masapul a pulotam+ maipaay kaniak daydiay itudingko kenka.”  Ket inaramid ni Samuel ti sinao ni Jehova. Idi dimteng iti Betlehem+ nangrugi nga agpigerger dagiti lallakay ti siudad+ idi masabetda, ket ngarud kinunada: “Ti kadi iyaaymo kaipapananna ti talna?”+  Iti daytoy kinunana: “Kaipapananna ti talna. Panagisakripisio ken Jehova ti makagapu nga immayak. Santipikarenyo+ ti bagbagiyo, ket masapul a kumuyogkayo kaniak iti panagisakripisio.” Idin sinantipikarna ni Jesse ken ti annakna, a kalpasan dayta inayabanna ida iti panagisakripisio.  Ket naaramid nga, idi sumsumrekda ket naimatanganna ni Eliab,+ kinunana a dagus: “Sigurado a daydiay pinulotanna adda iti sanguanan ni Jehova.”  Ngem ni Jehova kinunana ken Samuel: “Dika kitaen ti langana ken ti kangato ti taktakderna,+ ta isu linaksidko. Ta saan nga iti wagas nga ikikita ti tao [ti wagas nga ikikita ti Dios],+ agsipud ta ti maysa laeng a tao kitaenna no ania ti agparang kadagiti mata;+ ngem no maipapan ken Jehova, kitaenna no ania ti puso.”+  Kalpasanna ni Jesse inayabanna ni Abinadab+ ket pinalasatna iti sango ni Samuel, ngem kinunana: “Saan a pinili ni Jehova uray daytoy.”  Sumaganad pinalabas ni Jesse ni Sammah,+ ngem kinunana: “Saan a pinili ni Jehova uray daytoy.” 10  Gapuna pinalasat ni Jesse ti pito kadagiti annakna iti sango ni Samuel; kaskasdi ni Samuel kinunana ken Jesse: “Saan a pinili ni Jehova dagitoy.” 11  Kamaudiananna ni Samuel kinunana ken Jesse: “Dagitoy kadi aminen dagiti lallaki?” Iti daytoy kinunana: “Ti inaudian saan pay a naisango agingga ita,+ ket, adtoy! ipapaarabna dagiti karnero.”+ Iti kasta ni Samuel kinunana ken Jesse: “Agbaonka ket pasukonmo, agsipud ta saantayto a tumugaw a mangan agingga a makaumay ditoy.” 12  Iti kasta isu nagbaon ket pinaumayna. Ita isu lumabbasit,+ agtutubo a napintas dagiti matana ken nataer ti langana. Idin kinuna ni Jehova: “Tumakderka, pulotam, ta isu daytoy!”+ 13  Iti kasta innala ni Samuel ti sara ti lana+ ket pinulotanna iti tengnga ti kakabsatna. Ket ti espiritu ni Jehova nangrugi nga agtignay ken David manipud iti dayta nga aldaw ken agpatpatuloy.+ Idi agangay timmakder ni Samuel ket napan idiay Rama.+ 14  Ket ti mismo nga espiritu ni Jehova pimmanaw+ ken Saul, ket pinagaligaget ti maysa a dakes nga espiritu+ manipud ken Jehova. 15  Ket dagiti adipen ni Saul rinugianda a kunaen kenkuana: “Adtoy, ita, pagal-aligagetennaka ti dakes nga espiritu ti Dios. 16  Ibilin koma ti apomi, pangngaasim, kadagiti adipenmo iti sangom a sumapulda iti nasigo a lalaki+ a tumutokar iti arpa.+ Ket mapasamakto a, no umay kenka ti dakes nga espiritu ti Dios, kasapulan nga agtokarto babaen iti im-imana, ket sigurado a naimbagto dayta kenka.” 17  Gapuna kinuna ni Saul kadagiti adipenna: “Ipaayandak, pangngaasiyo, iti lalaki a nalaing nga agtokar, ket masapul nga iyegyo kaniak.”+ 18  Ket simmungbat ti maysa kadagiti katulongan ket kinunana: “Adtoy! Nakitak no kasano kasigo nga agtokar+ ti maysa nga anak ni Jesse a Betlehemita, ket isu maysa a maingel, nabileg a lalaki+ ken maysa a lalaki ti gubat+ ken maysa a nasaririt a pumapalawag+ ken maysa a nataer a lalaki,+ ket adda kenkuana ni Jehova.”+ 19  Idin nangibaon ni Saul kadagiti mensahero a mapan ken Jesse ket kinunana: “Ibaonmo kaniak ni David nga anakmo, nga adda iti arban.”+ 20  Gapuna nangala ni Jesse iti maysa nga asno, tinapay ken maysa a lalat a botelia+ ti arak ken maysa nga urbon dagiti kalding ket impatulodna ida ken Saul babaen ti ima ni David nga anakna.+ 21  Ngarud ni David dimteng ken Saul ket nagserbi kenkuana;+ ket inayatna iti kasta unay, ket nagbalin nga agaw-awit iti armasna.+ 22  Iti kasta ni Saul nagbaon ken Jesse, a kunkunana: “Bay-am ni David, pangngaasim, nga agtultuloy nga agserbi kaniak, ta nakasarak iti pabor kadagiti matak.” 23  Ket napasamak nga, idi a ti espiritu ti Dios immay ken Saul, innala ni David ti arpa ket nagtokar babaen ti imana; ket nagin-awaan ni Saul ket naimbag dayta kenkuana, ket pimmanaw kenkuana ti dakes nga espiritu.+

Footnotes