Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Samuel 12:1-25

12  Kamaudiananna kinuna ni Samuel iti intero nga Israel: “Adtoy immimdengak iti timekyo maipapan iti isuamin a sinaoyo kaniak,+ a pagturayek kadakayo ti maysa nga ari.+  Ket ita adtoy ti ari a magmagna iti sangoyo!+ No maipapan kaniak, lakayakon+ ken ubanan,+ ket ti annakko, adtoy addada kadakayo,+ ket siak—nagnaak iti sangoyo nanipud kinaagtutubok agingga itoy nga aldaw.+  Adtoyak. Sumungbatkayo maibusor kaniak iti sango ni Jehova ken iti sango ti pinulotanna:+ Asino ti inalaak iti toro wenno asino ti inalaak iti asno+ wenno asino ti sinaurko wenno asino ti inlupitlupitko wenno makin-ima ti nangawatak iti pasuksok a kuarta tapno ilingedko koma dagiti matak iti dayta?+ Ket agisubliakto kadakayo.”+  Iti daytoy kinunada: “Saannakami a sinaur, saannakami met nga inlupitlupit, saanka met a pulos immawat iti aniaman manipud ima ti uray asinoman.”+  Gapuna kinunana kadakuada: “Ni Jehova ket saksi maibusor kadakayo, ket ti pinulotanna+ saksi itoy nga aldaw nga awan a pulos ti nasarakanyo iti imak.”+ Iti daytoy kinunada: “Isu ket saksi.”  Ket kinuna ni Samuel kadagiti umili: “Ni Jehova [ket saksi], a nangusar kada Moises ken Aaron ken nangaon kadagidi ammayo iti daga ti Egipto.+  Ket ita agtakderkayo, ket ukomenkayto iti sango ni Jehova [ken ibinsabinsak kadakayo] ti amin a nalinteg nga ar-aramid+ ni Jehova nga inaramidna kadakayo ken kadagidi ammayo.  “Apaman a dimteng ni Jacob iti Egipto+ ket rinugian dagidi ammayo ti immasug ken Jehova maipaay ti tulong,+ imbaon ni Jehova da Moises+ ken Aaron, tapno iruarda dagidi ammayo manipud Egipto ket pagnaedenda ida itoy a disso.+  Ket linipatda ni Jehova a Diosda,+ iti kasta inlakona+ ida iti ima ni Sisera+ a panguluen ti buyot ni Hasor ken iti ima dagiti Filisteo+ ken iti ima ti ari ti Moab,+ ket nakiruprupakda kadakuada. 10  Ket rinugianda ti umasug ken Jehova maipaay iti tulong+ ken agkuna, ‘Nagbasolkami,+ ta pinanawanmi ni Jehova tapno makapagserbikami kadagiti Baal+ ken kadagiti ladawan ni Astoret;+ ket ita ispalennakami+ iti ima dagiti kabusormi, tapno makapagserbikami kenka.’ 11  Ket ni Jehova imbaonna da Jerubaal+ ken Bedan ken Jefte+ ken Samuel+ ket inispalnakayo iti ima dagiti kabusoryo iti intero nga aglikmut, tapno makapagnaedkayo a sitatalged.+ 12  Idi nakitayo nga immay maibusor kadakayo ni Nahas+ nga ari ti annak ni Ammon, kinunkunayo kaniak, ‘Saan, no di ket maysa nga ari ti rebbeng nga agturay kadakami!’+ idinto ta ni Jehova a Diosyo ti Ariyo.+ 13  Ket ita adtoy ti ari a piniliyo, isu a kiniddawyo;+ ket adtoy insaad kadakayo ni Jehova ti maysa nga ari.+ 14  No agbutengkayto ken Jehova+ ket pudno nga agserbikayo kenkuana+ ken agtulnogkayo iti timekna,+ ket saankayto nga agrebelde+ iti bilin ni Jehova, agpadpada a dakayo ken ti ari nga agturayto kadakayo sigurado nga agbalinto a paspasurot ni Jehova a Diosyo. 15  Ngem no saankayto nga agtulnog iti timek ni Jehova+ ket pudno nga agrebeldekayto iti bilin ni Jehova,+ ti ima ni Jehova sigurado a maibusorto kadakayo ken kadagiti ammayo.+ 16  Ita, met, agtakderkayo ket kitaenyo daytoy naindaklan a banag nga aramiden ni Jehova iti imatangyo. 17  Saan kadi a panagani iti trigo+ ita nga aldaw? Umawagakto+ ken Jehova tapno mangipaay kadagiti gurruod ken tudo;+ kalpasanna ammuenyo ken kitaenyo a naruay ti kinadakesyo+ nga inaramidyo kadagiti mata ni Jehova iti panagkiddawyo iti maysa nga ari maipaay kadakayo.” 18  Kalpasan dayta ni Samuel immawag ken Jehova,+ ket nangipaay ni Jehova kadagiti gurruod ken tudo iti dayta nga aldaw,+ iti kasta dagiti amin nga umili nagbutengda iti kasta unay ken Jehova ken ni Samuel. 19  Ket rinugian dagiti amin nga umili a kunaen ken Samuel: “Agkararagka+ ken Jehova a Diosmo maigapu kadagiti adipenmo, ta saanmi a kayat ti matay; agsipud ta nanginayonkami kadagiti amin a basolmi iti dakes iti panagkiddawmi iti maysa nga ari maipaay kadakami.” 20  Gapuna kinuna ni Samuel kadagiti umili: “Dikay agbuteng.+ Dakayo—inaramidyo amin daytoy a dakes. Isuna laeng ta dikay sumiasi iti isusurot ken Jehova,+ ket masapul nga agserbikayo ken Jehova buyogen ti isuamin a pusoyo.+ 21  Ket dikay sumiasi a sumurot kadagiti di kinapudno+ a saan a makagunggona+ ken saan a makaispal, agsipud ta di kinapudno dagita. 22  Ta saanto a panawan ni Jehova+ ti ilina maipagapu iti naindaklan a naganna,+ agsipud ta inkeddeng ni Jehova a pagbalinennakayo nga ilina.+ 23  No maipapan met kaniak, narigat a pagarupen, iti biangko, nga agbasolak maikaniwas ken Jehova babaen ti panagsardengko nga agkararag maigapu kadakayo;+ ket masapul nga isurokayo+ iti naimbag+ ken umiso a dalan. 24  Isuna laeng ta agbutengkayo+ ken Jehova, ket masapul nga agserbikayo kenkuana iti kinapudno buyogen ti isuamin a pusoyo;+ ta kitaenyo ti naindaklan a bambanag nga inaramidna maipaay kadakayo.+ 25  Ngem no sipapatak nga aramidenyo ti dakes, mapunaskayto,+ agpadpada a dakayo ken ti ariyo.”+

Footnotes