Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Samuel 11:1-15

11  Ket ni Nahas nga Ammonita+ simmang-at ket nagpakarso a maibusor iti Jabes+ idiay Galaad. Iti kasta amin dagiti tattao ti Jabes kinunada ken Nahas: “Mamatalgedka iti tulag kadakami tapno makapagserbikami kenka.”+  Kalpasanna kinuna kadakuada ni Nahas nga Ammonita: “Iti daytoy a kondision mamatalgedakto kadakayo, iti kondision a suatenyo+ ti tunggal makannawan a matayo, ket ikabilkonto dayta kas umsi iti intero nga Israel.”+  Kalpasanna kinuna kenkuana dagiti lallakay ti Jabes: “Ikkannakami iti pito nga aldaw a pawayway, ket mangibaonkamto kadagiti mensahero a mapan iti intero a teritoria ti Israel ket, no awan ti manangisalakan+ kadakami, rummuarkamto ngarud a mapan kenka.”  Idi agangay dagiti mensahero dimtengda iti Gabaa+ ni Saul ket sinaoda ti sasao kadagiti lapayag dagiti umili, ket rinugian nga impigsa dagiti amin nga umili ti timekda ket nagsangitda.+  Ngem adtoy ni Saul um-umay a sumarsaruno iti pangen a naggapu iti tay-ak, ket kinuna ni Saul: “Ania ti mapaspasamak kadagiti umili, ta agsangitda?” Ket rinugianda nga insalaysay kenkuana ti sasao dagiti lallaki ti Jabes.  Ket nagtignay ken Saul ti espiritu+ ti Dios idi nangngegna dagitoy a sasao, ket bimmara unay ti ungetna.+  Gapuna nangala iti sangaparis a toro ket pinispisina ida ket impatulodna dagitoy iti intero a teritoria ti Israel+ babaen ti ima dagiti mensahero, a kunkunana: “Siasinoman kadatayo a saan a rummuar a kas pasurot ni Saul ken ni Samuel, kastoy ti maaramidto iti bakbakana!”+ Ket ti panagalinggaget+ ken Jehova+ nangrugi nga umapay kadagiti umili iti kasta rimmuarda a kasla maymaysa a tao.+  Kalpasanna innalana ti pakagupgopanda+ idiay Bezec, ket nagdagup ti annak ti Israel iti tallo gasut a ribu, ket dagiti lallaki ti Juda tallopulo a ribu.  Kinunada ita kadagiti mensahero nga immay: “Daytoy ti sawenyonto kadagiti lallaki ti Jabes idiay Galaad, ‘Inton bigat mapasamakto ti pannakaisalakan maipaay kadakayo inton pumudot ti init.’”+ Gapuna immay dagiti mensahero ket imbagada kadagiti lallaki ti Jabes, ket nagragrag-oda. 10  Iti kasta kinuna dagiti lallaki ti Jabes: “Inton bigat rummuarkamto a mapan kadakayo, ket aramidenyonto kadakami ti maitunos iti isuamin a naimbag kadagiti matayo.”+ 11  Ket naaramid iti sumaganad nga aldaw a ni Saul+ inkabilna dagiti umili iti tallo a bunggoy;+ ket napanda iti tengnga ti pakarso bayat ti panagbantay iti bigat+ ket kinabilda dagiti Ammonita+ agingga a pimmudot ti aldaw. Idi adda sumagmamano a natedda, idin naiwarawarada ket awan dua a nagkuyog a natedda kadakuada.+ 12  Ket rinugian dagiti umili a kunaen ken Samuel: “Siasino ti agkunkuna, ‘Ni Saul—isu aya ti agari kadatayo?’+ Iyawatyo dagidiay a tattao, tapno mapapataymi ida.”+ 13  Nupay kasta, kinuna ni Saul: “Awan ti tao a rebbeng a mapapatay itoy nga aldaw,+ agsipud ta ita nga aldaw nangaramid ni Jehova iti panangisalakan iti Israel.”+ 14  Idi agangay kinuna ni Samuel kadagiti umili: “Umaykayo ket mapantayo idiay Gilgal+ tapno mapabarotayo sadiay ti kinaari.”+ 15  Gapuna dagiti amin nga umili napanda idiay Gilgal, ket sadiay pinagbalinda nga ari ni Saul iti sango ni Jehova idiay Gilgal. Kalpasanna nangidatagda sadiay kadagiti pakikaykaysa a sakripisio iti sango ni Jehova,+ ket sadiay nagtultuloy a nagrag-o iti napalalo ni Saul ken amin dagiti tattao ti Israel.+

Footnotes