Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Samuel 1:1-28

1  Ita adda idi maysa a lalaki ti Ramataim-zofim+ iti nakabambantay a rehion ti Efraim,+ ket ti naganna Elcana,+ ti anak ni Jeroham, ti anak ni Eliu, ti anak ni Tohu, ti anak ni Zuf,+ maysa nga Efraimita.  Ket addaan iti dua nga assawa, ti nagan ti maysa Anna, ket ti nagan ti sabali Penina. Ket ni Penina naaddaan iti annak, ngem ni Anna awanan iti annak.+  Ket dayta a lalaki sumangsang-at manipud iti siudadna iti tinawentawen tapno iruknoyna ti bagina+ ken tapno agisakripisio ken Jehova ti buybuyot idiay Silo.+ Ket sadiay a ti dua nga annak ni Eli, da Hofni ken Finehas,+ papadida ken Jehova.+  Ket adda aldaw a nagisakripisio ni Elcana, ket nangted ken Penina nga asawana ken iti amin nga annakna a lallaki ken annakna a babbai kadagiti bingay;+  ngem nangted ken Anna iti maymaysa a bingay. Uray no kasta ni Anna ti ay-ayatenna,+ ket, no maipapan ken Jehova, sinerraanna ti aanakanna.+  Ket isu pinagluksaw met iti napalalo unay ti karibalna nga asawa+ tapno paglagawenna agsipud ta sinerraan ni Jehova ti aanakanna.  Ket kasta ti ar-aramidenna iti kada tawen,+ tunggal sumang-at iti balay ni Jehova.+ Kasta ti panamagluksawna kenkuana, iti kasta agsangit ken saan a mangan.  Ket kinuna kenkuana ni Elcana nga asawana: “Anna, apay nga agsangitka, ken apay a saanka a mangan, ken apay a maladingitan ta pusom?+ Saanak aya a naim-imbag kenka ngem iti sangapulo nga annak a lallaki?”+  Iti kasta timmakder ni Anna kalpasan a nakapanganda idiay Silo ken kalpasan ti iyiinumda, bayat a ni Eli a padi situtugaw iti pagtugawan iti sibay ti bautek ti templo+ ni Jehova. 10  Ket sipapait ti kararuana,+ ket rinugianna ti agkararag ken Jehova+ ket nagsangit iti kasta unay.+ 11  Ket nagkari+ ket kinunana: “O Jehova ti buybuyot, no kumitakanto a di bumurong iti pannakaparigat ti adipenmo a babai+ ket pudno a lagipennak,+ ket saanmonto a lipaten ti adipenmo a babai ket pudno a mangipaayka iti adipenmo a babai iti anak a lalaki, ipaaykonto ken Jehova iti amin nga al-aldaw ti panagbiagna, ket awanto ti labaha nga umay iti rabaw ti ulona.”+ 12  Ket napasamak a bayat nga agkarkararag iti napaut+ iti sango ni Jehova, sipsiputan idi ni Eli ti ngiwatna. 13  No maipapan ken Anna, agsasao idi iti pusona;+ ti bibigna laeng ti aggargaraw, ket saan a mangngeg ti timekna. Ngem impagarup ni Eli nga isu nabartek.+ 14  Gapuna kinuna kenkuana ni Eli: “Kasanonto kabayag a sibabartekka?+ Iwaksim kenka ta arakmo.” 15  Gapu itoy simmungbat ni Anna ket kinunana: “Saan, apok! Maysaak a babai a marigrigatan ti espirituna; ket saanak a nakainum iti arak ken makabartek nga inumen, no di ket ibukbukbokko ti kararuak iti sango ni Jehova.+ 16  Dika pagbalinen ti adipenmo a babai nga umasping iti awan kaes-eskanna+ a babai, ta manipud kinaruay ti pannakaseknanko ken pannakasemsemko a nagsaoak agingga ita.”+ 17  Idin simmungbat ni Eli ket kinunana: “Mapanka a sitatalna,+ ket ited koma ti Dios ti Israel ti dawatmo a kiniddawmo kenkuana.”+ 18  Iti daytoy kinunana: “Makasarak koma ti adipenmo a babai iti pabor kadagita matam.”+ Ket ti babai napan ket nangan,+ ket saanen a nagdanag ti rupana.+ 19  Kalpasanna bimmangonda a nasapa iti bigat ket inruknoyda ti bagbagida iti sango ni Jehova, a kalpasan dayta nagsublida ket dimtengda iti balayda idiay Rama.+ Ni Elcana nakidenna+ ita ken Anna nga asawana, ket linagip ni Jehova.+ 20  Gapuna naaramid iti panagrikus ti maysa a tawen a nagsikog ni Anna ket nangyanak iti anak a lalaki ket pinanagananna+ iti Samuel, agsipud ta, kinunana, “ni Jehova ti nangkiddawak+ kenkuana.” 21  Idi agangay simmang-at ni lalaki nga Elcana agraman intero a sangakabbalayanna tapno isakripisio ken Jehova ti tinawen a sakripisio+ ken ti kari a datonna.+ 22  No maipapan ken Anna, saan a simmang-at,+ ta kinunana iti asawana: “Apaman a mapusot ti ubing,+ ipankonto, ket agparangto iti sango ni Jehova ket agnaed sadiay agingga iti tiempo a di nakedngan.”+ 23  Gapu itoy kinuna kenkuana ni Elcana nga asawana:+ “Aramidem no ania ti naimbag kadagita matam.+ Agbatika iti pagtaengan agingga a pusotem. Isuna laeng ta itungpal koma ni Jehova ti saona.”+ Gapuna ti babai nagbati iti pagtaengan ket tinagtagibina ti anakna agingga a pinusotna.+ 24  Iti kasta apaman a napusotna, inkuyogna nga insang-at, agraman maysa a toro a tallo ti tawenna ken maysa nga efa nga arina ken dakkel a karamba nga arak,+ ket simrek iti balay ni Jehova idiay Silo.+ Ket kaduana ti ubing. 25  Kalpasanna pinartida ti toro ket impanda ti ubing ken Eli.+ 26  Gapuna kinunana: “Dispensarennak, apok! Babaen ti biag ta kararuam,+ apok, siak daydi babai a sitatakder a kaduam iti daytoy a lugar tapno agkararag ken Jehova.+ 27  Mainaig idi itoy nga ubing nga inkararagko nga ited kaniak ni Jehova ti dawatko+ a kiniddawko kenkuana.+ 28  Ket siak, kas pannakabatangko, impabulodko ken Jehova.+ Iti amin nga al-aldaw a kaaddana, isu maysa a nakiddaw maipaay ken Jehova.” Ket nagruknoy sadiay ken Jehova.+

Footnotes