Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Corinto 12:1-31

12  Ita no maipapan iti naespirituan a sagsagut,+ kakabsat, diak kayat nga ignorantekayo.  Ammoyo nga idi tattaokayo iti nasnasion,+ maiturturongkayo kadagidiay awan timekna+ nga idolo+ a kas iti pannakaiturongyo idi.  Gapuna ipakaammok kadakayo nga awan asinoman nga agkuna no agsasao babaen iti espiritu ti Dios: “Ni Jesus ket nailunod!”+ ken awan asinoman a makapagkuna: “Ni Jesus ket Apo!” malaksid no babaen ti nasantuan nga espiritu.+  Ita adda nagduduma a sagut,+ ngem adda ti isu met laeng nga espiritu;+  ket adda nagduduma a ministerio,+ ket kaskasdi adda ti isu met laeng nga Apo;+  ket adda nagduduma a panagtignay,+ ket kaskasdi ti isu met laeng a Dios+ ti mangaramid kadagiti amin a panagtignay iti amin a tattao.+  Ngem ti panangiparangarang ti espiritu maited iti tunggal maysa maipaay iti makagunggona a panggep.+  Kas pagarigan, babaen ti espiritu naited iti maysa ti panagsao iti kinasirib,+ iti sabali panagsao iti pannakaammo+ maitunos iti isu met laeng nga espiritu,  iti sabali pammati+ babaen ti isu met laeng nga espiritu, iti sabali sagsagut kadagiti panangpaimbag+ babaen iti dayta maymaysa nga espiritu, 10  iti sabali pay dagiti panagtignay ti mannakabalin nga ar-aramid,+ iti sabali panagipadto,+ iti sabali panangilasin+ iti naipaltiing a sasao,+ iti sabali nadumaduma a pagsasao,+ ket iti sabali panangipaulog+ kadagiti pagsasao. 11  Ngem amin dagitoy a panagtignay aramiden ti maymaysa ken isu met laeng nga espiritu,+ nga agibumbunong+ iti tumunggal maysa kas iti pagayatanna.+ 12  Ta no kasano a ti bagi maymaysa ngem addaan adu a kameng, ket amin dagiti kameng dayta a bagi, nupay aduda, maymaysada a bagi,+ gapuna kasta met ti Kristo.+ 13  Ta pudno unay a babaen ti maymaysa nga espiritu nabautisarantayo+ amin iti maymaysa a bagi, uray no Judio wenno Griego, uray no ad-adipen wenno siwayawaya, ket napainumtayo+ amin iti maymaysa nga espiritu. 14  Ta ti bagi, kinapudnona, saan a maymaysa a kameng, no di ket adu.+ 15  No kunaen ti saka: “Agsipud ta saanak nga ima, saanak a paset ti bagi,” saan a gapu itoy a rason a saan a paset ti bagi.+ 16  Ket no kunaen ti lapayag: “Agsipud ta saanak a mata, saanak a paset ti bagi,” saan a gapu itoy a rason a saan a paset ti bagi.+ 17  No koma ti intero a bagi ket mata, sadino ti ayan ti sentido a pagdengngeg? No koma amin ket pagdengngeg, sadino ti ayan ti pagangot? 18  Ngem ita ti Dios insaadna dagiti kameng iti bagi, tunggal maysa kadakuada, kas iti kinayatna.+ 19  No koma isuda amin ket maymaysa a kameng,+ sadino ti ayan ti bagi? 20  Ngem ita aduda a kameng,+ ngem maymaysa a bagi. 21  Ti mata saanna a mabalin a kunaen iti ima: “Awan pakasapulak kenka”; wenno, manen, ti ulo saanna a mabalin a kunaen kadagiti saka: “Awan pakasapulak kadakayo.” 22  Ngem ad-adda ketdi a nasken dagiti kameng ti bagi a kasla nakapkapuy,+ 23  ket dagiti paset ti bagi a pagarupentayo a nakurkurang ti dayawda, dagitoy palikmutantayo iti nawadwadwad a dayaw,+ ket iti kasta dagiti nalaad a pasettayo addaanda iti nawadwadwad a kinaimnas, 24  idinto ta dagiti naimnas a pasettayo saanda a kasapulan ti aniaman. Nupay kasta, ti Dios binukelna ti bagi, nga impaayanna iti nawadwadwad a dayaw ti paset nga addaan pagkurangan, 25  tapno awan koma ti panaglalasin iti bagi, no di ket dagiti kamengna addaanda koma iti isu met laeng a panangisakit iti maysa ken maysa.+ 26  Ket no ti maysa a kameng agsagaba, amin dagiti dadduma a kameng agsagabada+ a mairaman iti dayta; wenno no ti maysa a kameng maipadayag,+ amin dagiti dadduma a kameng agrag-oda a mairaman iti dayta.+ 27  Ita dakayo ti bagi ni Kristo, ken kamkameng a sinaggaysa.+ 28  Ket ti Dios insaadna ti tunggal maysa kadagitoy iti kongregasion,+ umuna, dagiti apostol;+ maikadua, dagiti mammadto;+ maikatlo, dagiti mannursuro;+ sumaganad dagiti mannakabalin nga aramid;+ sumaganad sagsagut kadagiti panangpaimbag;+ dagiti makatulong a panagserbi,+ dagiti pannakabael a mangiwanwan,+ dagiti nadumaduma a pagsasao.+ 29  Amin kadi ket apostol? Amin kadi ket mammadto? Amin kadi ket mannursuro? Amin kadi ket agaramid iti mannakabalin nga ar-aramid? 30  Amin kadi ket addaan sagsagut kadagiti panangpaimbag? Amin kadi ket agsao kadagiti pagsasao?+ Amin kadi ket managipatarus?+ 31  Ngem itultuloyyo a sapulen a sireregta dagiti dakdakkel a sagut.+ Ket kaskasdi a mangipakitaak kadakayo iti dalan a naringringbaw.+

Footnotes