Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Ar-ari 7:1-51

7  Ket ti bukodna a balay imbangon ni Solomon iti sangapulo ket tallo a tawen,+ iti kasta nalpasna ti intero a bukodna a balay.+  Ket imbangonna ti Balay ti Bakir ti Libano+ a sangagasut a kasiko ti kaatiddogna, ken limapulo a kasiko ti kaakabana, ken tallopulo a kasiko ti kangatona, iti rabaw ti uppat nga intar nga ad-adigi a sedro a kayo; ket addada awanan+ a sedro a kayo iti rabaw dagiti adigi.  Ket nadidingan dayta iti sedro a kayo+ iti ngato iti rabaw dagiti busoran nga adda iti rabaw ti uppat a pulo ket lima nga adigi. Adda sangapulo ket lima iti maysa nga intar.  No maipapan kadagiti nabaskagan a tawa, adda tallo nga intar, ket adda maysa a pagserkan ti lawag+ iti batog ti maysa a pagserkan ti lawag iti tallo a kaunda.  Ket amin dagiti pagserkan ken dagiti bautek naaramidda a kuadrado iti baskag,+ ken kasta met ti makinsango ti pagserkan ti lawag iti batog ti pagserkan ti lawag iti tallo a kaunda.  Ket ti Beranda dagiti Adigi inaramidna a limapulo a kasiko ti kaatiddogna, ken tallopulo a kasiko ti kaakabana; ket sabali pay a beranda ti adda iti sangoda nga addaan kadagiti adigi ken maysa a balawbaw iti sangoda.  No maipapan iti Beranda ti Trono+ a pangukomanna, inaramidna ti beranda ti panangukom;+ ket inakkubanda dayta iti sedro a kayo manipud suelo agingga kadagiti pasanggir.+  No maipapan iti balayna a pagnaedanna, iti sabali a paraangan,+ adayo dayta iti balay nga agpaay iti Beranda. Kas idi iti daytoy ti pannakaaramidna. Ket adda imbangonna a balay a kas iti daytoy a Beranda maipaay iti anak a babai ni Faraon,+ nga innala ni Solomon.  Naaramid amin dagitoy iti nangina+ a batbato sigun kadagiti rukod, tinikapan, naragadi babaen kadagiti ragadi ti bato, iti uneg ken iti ruar, ken manipud pamuon agingga iti sagumaymay, ken iti ruar agingga iti dakkel a paraangan.+ 10  Ket dagiti nangina a bato a naisaad kas pamuon dadakkelda a batbato, sangapulo a kasiko a batbato, ken walo a kasiko a batbato. 11  Ket iti ngato adda nangina a batbato sigun kadagiti rukod, tinikapan, ken kasta met sedro a kayo. 12  No maipapan iti dakkel a paraangan, iti aglikmutna adda tallo nga intar+ ti tinikapan a bato ken maysa nga intar dagiti awanan a sedro a kayo; ken kasta met daytoy maipaay iti makin-uneg+ a paraangan ti balay+ ni Jehova, ken maipaay iti beranda+ ti balay. 13  Ket ni Ari Solomon nagbaon ket pinasukonna ni Hiram+ manipud Tiro. 14  Isu ti anak ti maysa a nabalo a babai manipud tribu ni Neftali, ket ti amana maysa a lalaki a taga Tiro,+ trabahador iti gambang;+ ket isu napnuan ti sirib ken ti pannakaawat+ ken ti pannakaammo iti panangaramid iti tunggal kita ti trabaho iti gambang. Iti kasta isu dimteng ken Ari Solomon ket rinugianna nga aramiden ti isuamin a trabahona. 15  Kalpasanna sinukogna ti dua nga adigi a gambang,+ sangapulo ket walo a kasiko ti kangato ti tunggal adigi, ket maysa a linas a sangapulo ket dua a kasiko ti mairukod nga aglikmut iti tunggal maysa iti dua nga adigi.+ 16  Ket dua a paratok ti inaramidna a maisaad kadagiti tuktok dagiti adigi, nasukog iti gambang.+ Lima a kasiko ti kangato ti maysa a paratok, ket lima a kasiko ti kangato ti sabali a paratok. 17  Adda ik-iket iti aramid nga iniket, tinabid nga arkos iti aramid a kinawar,+ maipaay kadagiti paratok nga adda iti tuktok dagiti adigi;+ pito maipaay iti maysa a paratok, ken pito maipaay iti sabali a paratok. 18  Ket inaramidna dagiti granada ken ti dua nga intar iti aglikmut iti maysa nga aramid nga iniket tapno abbonganna dagiti paratok nga adda iti tuktok dagiti adigi; ket dayta ti inaramidna iti sabali a paratok.+ 19  Ket dagiti paratok nga adda iti tuktok dagiti adigi idiay beranda aramid a lirio,+ nga uppat a kasiko. 20  Ket dagiti paratok addada iti rabaw ti dua nga adigi, kasta met iti abay ti pannakatian a dumna iti aramid nga iniket; ket adda dua gasut a granada+ a naintar iti intero nga aglikmut iti rabaw ti tunggal paratok. 21  Ket impasdekna dagiti adigi+ a paset ti beranda+ ti templo. Iti kasta impasdekna ti makinkannawan nga adigi ket pinanagananna iti Jaquin, ket kalpasanna impasdekna ti makinkannigid nga adigi ket pinanagananna iti Boaz. 22  Ket iti tuktok dagiti adigi adda aramid a lirio. Ket ti trabaho kadagiti adigi nagin-inut a nalpas. 23  Ket inaramidna ti sinukog a baybay+ sangapulo a kasiko manipud maysa a ngarabna agingga iti sabali a ngarabna, nagsirkulo iti intero nga aglikmut; ket ti kangatona lima a kasiko, ket kinasapulan ti banteng a tallopulo a kasiko tapno palikmutan ti intero nga aglikmutna.+ 24  Ket adda sinantabungaw+ nga ar-arkos+ iti baba ti ngarabna iti intero nga aglikmut, a manglawlaw iti dayta, sangapulo iti maysa a kasiko, a mangtiktikub iti baybay iti intero nga aglikmut,+ addaan dua nga intar dagiti sinantabungaw nga arkos a nasukog iti sukoganna. 25  Agtaktakder dayta iti rabaw ti sangapulo ket dua a toro,+ tallo ti nakasango iti amianan, ket tallo ti nakasango iti laud, ket tallo ti nakasango iti abagatan, ket tallo ti nakasango iti daya; ket ti baybay adda iti ngato iti rabawda, ket amin dagiti kamaudi a pasetda tumurong iti tengnga.+ 26  Ket ti kapuskolna sangadakulapan;+ ket ti ngarabna kas iti pannakaaramid ti ngarab ti maysa a kopa, maysa a sabong ti lirio.+ Dua ribu a bat+ a sukat ti laonenna.+ 27  Ket inaramidna ti sangapulo a kareton+ a gambang, uppat a kasiko ti kaatiddog ti tunggal kareton, ket uppat a kasiko ti kaakabana, ket tallo a kasiko ti kangatona. 28  Ket daytoy ti pannakaaramid dagiti kareton: addaanda kadagiti diding, ket dagiti diding adda iti nagbaetan dagiti sagiped. 29  Ket kadagiti diding nga adda iti nagbaetan dagiti sagiped adda dagiti leon,+ tortoro+ ken kerkerubin,+ ket kasta met laeng iti rabaw dagiti sagiped. Iti ngatuen ken iti baba dagiti leon ken dagiti toro adda balbalangat+ iti aramid nga agbitbitin. 30  Ket adda uppat a pilid a gambang iti tunggal kareton, addaan kadagiti burayongan a gambang; ket ti uppat a pasulina isuda ti batbatay maipaay kadakuada. Iti baba ti palanggana adda dagiti batay, nasukog nga addaan balbalangat iti batog ti tunggal maysa. 31  Ket ti wangawanganna manipud uneg agingga kadagiti batay ken agpangato ket [?] kasiko; ket ti wangawanganna nagbukel, ti pannakaaramid ti pagsaadan a maysa ket kagudua a kasiko, ken kasta met nga iti wangawanganna adda kitkitikit. Ket dagiti didingda naaramid a kuadrado, saan a nagbukel. 32  Ket ti uppat a pilid adda iti baba dagiti diding, ket ti batbatay dagiti pilid adda iti igid ti kareton; ket ti kangato ti tunggal pilid maysa ket kagudua a kasiko. 33  Ket ti pannakaaramid dagiti pilid kasla iti pannakaaramid ti pilid ti karuahe.+ Dagiti batayda ken dagiti basikawda ken dagiti rayosda ken dagiti palaupoda, nasukogda amin. 34  Ket adda uppat a batay iti uppat a suli ti tunggal kareton; dagiti batayna sangsangkanayonda iti kareton. 35  Ket iti tuktok ti kareton adda pagsaadan a kagudua a kasiko ti kangatona, nagsirkulo iti intero nga aglikmut; ket iti rabaw ti tuktok ti kareton dagiti sikiganna ken dagiti didingna sangsangkanayonda iti dayta. 36  Kanayonanna, nangikitikit+ kadagiti plata dagiti sikiganna ken kadagiti didingna iti kerkerubin, kadagiti leon ken ladladawan ti kayo a palma sigun iti nawayang a baet ti tunggal maysa, ken balbalangat iti intero nga aglikmut.+ 37  Kastoy idi ti panangaramidna iti sangapulo a kareton;+ addaanda amin iti maymaysa a sukog,+ maymaysa a rukod, maymaysa a takder. 38  Ket nangaramid iti sangapulo a palanggana+ a gambang. Uppat a pulo a bat a sukat ti laonen ti tunggal palanggana. Ti tunggal palanggana uppat a kasiko. Adda maysa a palanggana iti rabaw ti tunggal kareton maipaay iti sangapulo a kareton. 39  Kalpasanna nangikabil iti lima a kareton iti makannawan a sikigan ti balay, ket lima iti makannigid a sikigan ti balay;+ ket ti met laeng baybay inkabilna iti makannawan a sikigan ti balay iti agpadaya, a sumango iti abagatan.+ 40  Ket in-inut nga inaramid ni Hiram+ dagiti palanggana+ ken dagiti suplad+ ken dagiti malukong.+ Idi agangay nalpas nga inaramid ni Hiram+ ti isuamin a trabaho nga inaramidna maipaay ken Ari Solomon no maipapan iti balay ni Jehova: 41  Ti dua nga adigi+ ken dagiti sinan-malukong a paratok+ nga adda iti tuktok ti dua nga adigi, ken ti dua nga aramid nga iniket+ a pangabbong iti dua a nagbukel a paratok nga adda iti tuktok dagiti adigi, 42  ken ti uppat a gasut a granada+ maipaay iti dua nga aramid nga iniket, dua nga intar dagiti granada iti tunggal aramid nga iniket, a pangabbong iti dua a sinanmalukong a paratok nga adda iti rabaw ti dua nga adigi; 43  ken ti sangapulo a kareton+ ken ti sangapulo a palanggana+ iti rabaw dagiti kareton, 44  ken ti maysa a baybay+ ken ti sangapulo ket dua a toro iti baba ti baybay;+ 45  ken dagiti lata ken dagiti suplad ken dagiti malukong ken amin dagitoy nga aruaten,+ nga inaramid ni Hiram manipud napasileng a gambang a maipaay ken Ari Solomon nga agpaay iti balay ni Jehova. 46  Idiay Distrito ti Jordan+ a sinukog ida ti ari iti molde a pila, iti nagbaetan ti Succot+ ken Zaretan.+ 47  Ket ni Solomon binay-anna a di natimbang dagiti amin nga aruaten+ gapu iti nalabes unay a kaaduda.+ Ti dagsen ti gambang saan a nasinunuo.+ 48  Ket in-inut nga inaramid ni Solomon dagiti amin nga aruaten a nainaig iti balay ni Jehova, ti altar+ a balitok ken ti lamisaan+ nga ayan ti tinapay ti pamarang, a balitok, 49  ken dagiti pagsaadan ti silaw,+ lima iti makannawan ken lima iti makannigid iti sanguanan ti kaunggan a siled, a puro a balitok,+ ken dagiti sabong+ ken dagiti pagsilawan+ ken dagiti pangarsang,+ a balitok, 50  ken dagiti palanggana ken dagiti pagiddep+ ken dagiti malukong+ ken dagiti kopa+ ken dagiti pagikkan iti apuy,+ a puro a balitok, ken dagiti susulbongan maipaay kadagiti ridaw+ iti makin-uneg a balay, awan sabali, iti Kasasantuan, ken maipaay kadagiti ridaw+ ti balay ti templo,+ a balitok. 51  Kamaudiananna nairingpasen ti isuamin a trabaho a kasapulan nga aramiden ni Ari Solomon no maipapan iti balay ni Jehova;+ ket rinugian ni Solomon nga iserrek ti bambanag a pinagsanto ni David nga amana;+ ti pirak ken ti balitok ken dagiti aruaten inkabilna kadagiti gameng ti balay ni Jehova.+

Footnotes