Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Ar-ari 3:1-28

3  Ket ni Solomon nangbukel iti pannakiasawa nga aliansa+ ken Faraon nga ari ti Egipto ket innalana ti anak a babai ni Faraon+ ket inyegna iti Siudad ni David,+ agingga a nalpasna a binangon ti bukodna a balay+ ken ti balay ni Jehova+ ken ti pader ti Jerusalem iti intero nga aglikmut.+  Isuna laeng ta dagiti tattao nagisakripisioda kadagiti nangato a disso,+ ta saan pay a naibangon ti maysa a balay a maipaay iti nagan ni Jehova agingga kadagidi nga aldaw.+  Ket intuloy ni Solomon nga ayaten+ ni Jehova babaen ti pannagnana kadagiti paglintegan ni David nga amana.+ Isuna laeng ta kadagiti nangato a disso+ ti regular a nagisakripisiuanna ken nangpaasukanna kadagiti daton.  Iti kasta ti ari napan idiay Gabaon+ tapno agisakripisio sadiay, ta dayta idi ti naindaklan a nangato a disso.+ Sangaribu a mapuoran a sakripisio ti indaton ni Solomon iti rabaw dayta nga altar.+  Idiay Gabaon nagparang ni Jehova+ ken Solomon iti maysa a tagtagainep+ iti rabii; ket kinuna ti Dios: “Kiddawem no ania ti rumbeng nga itdek kenka.”+  Gapu itoy kinuna ni Solomon: “Sika winatwatmo ti dakkel a naayat a kinamanangngaasi+ maipaay ken adipenmo a David nga amak maitunos iti pannagnana iti sanguanam iti kinapudno ken iti kinalinteg+ ken iti kinapalungdo ti puso kenka; ket intuloymo a sinalimetmetan kenkuana daytoy dakkel a naayat a kinamanangngaasi, iti kasta inikkam iti anak nga agtugaw iti tronona a kas itoy nga aldaw.+  Ket ita, Jehova a Diosko, sika pinagbalinmo ti adipenmo nga ari iti saad ni David nga amak, ket maysaak laeng a bassit nga ubing.+ Diak ammo no kasano ti rummuar ken no kasano ti sumrek.+  Ket ti adipenmo adda iti tengnga ti ilim a pinilim,+ maysa nga umariwekwek nga ili a saan a madagup wenno mabilang gapu iti kinaaduna.+  Ket masapul nga ipaayam ti adipenmo iti puso a natulnog tapno mangukom+ iti ilim, tapno mailasinna ti naimbag ken dakes;+ ta siasino ti makabael a mangukom+ iti daytoy nasikor nga ilim?”+ 10  Ket ti banag makaay-ayo idi kadagiti mata ni Jehova, agsipud ta kiniddaw ni Solomon daytoy a banag.+ 11  Ket kinuna kenkuana ti Dios: “Iti rason a kiniddawmo daytoy a banag ket saanmo a kiniddaw maipaay iti bagim ti adu nga aldaw wenno uray kiniddaw maipaay iti bagim ti kinabaknang+ wenno uray kiniddaw ti kararua dagiti kabusormo, ket kiniddawmo maipaay iti bagim ti pannakaawat tapno dumngeg kadagiti hudisial a kaso,+ 12  adtoy! pudno unay nga aramidekto ti maitunos iti sasaom.+ Adtoy! Pudno unay nga ipaayankanto iti puso a masirib ken mannakaawat,+ tapno iti kasta awan pay ti maysa a kas kenka a naadda iti kasakbayam, ket iti kalpasam awanto ti tumakder a maysa a kas kenka.+ 13  Ken kasta met a no ania ti saanmo a kiniddaw itdekto kenka,+ agpadpada ti kinabaknang+ ken dayag, tapno iti kasta awanto ti asinoman iti ar-ari ti naadda a kas kenka, iti amin nga al-aldawmo.+ 14  Ket no magnakanto iti daldalanko babaen ti panangsalimetmetmo kadagiti alagadek+ ken bilbilinko, kas iti pannagna ni David nga amam,+ paatiddogekto met dagiti aldawmo.”+ 15  Idi nagriing ni Solomon,+ ay ket, adtoy maysa idi a tagtagainep. Kalpasanna isu dimteng idiay Jerusalem ket nagtakder iti sanguanan ti lakasa+ ti tulag ni Jehova ket nangidaton kadagiti mapuoran a sakripisio ken nangidatag kadagiti daton a pakikaykaysa+ ket nangisagana iti padaya+ nga agpaay kadagiti amin nga adipenna.+ 16  Iti dayta a tiempo dua a babbai, a balangkantis,+ immayda iti ari ket nagtakderda iti sanguananna.+ 17  Idin kinuna ti maysa a babai: “Dispensarennak, apok,+ siak ken daytoy a babai agnanaedkami iti maymaysa a balay, iti kasta nagpasngayak iti asidegna idiay balay. 18  Ket naaramid nga iti maikatlo nga aldaw kalpasan a nagpasngayak, nagpasngay met daytoy a babai. Ket agkaduakami idi. Awan ti ganggannaet a kaduami iti balay, awanen no di dakdakami a dua iti balay. 19  Idi agangay ti anak daytoy a babai natay iti rabii, agsipud ta naaddaganna. 20  Gapuna bimmangon iti tengnga ti rabii ket innalana ti anakko manipud sibayko bayat a matmaturog ti mismo nga adipenmo a babai ket impaiddana iti bukodna a saklot, ket ti natay nga anakna impaiddana iti saklotko. 21  Idi bimmangonak iti bigat tapno pasusuek+ ti anakko, ay ket, adda a natay. Gapuna sinukimatko a siiinget iti bigat, ket, adtoy! saan idi nga isu ti anakko nga impasngayko.” 22  Ngem kinuna ti sabali a babai: “Saan, no di ket ti anakko isu ti sibibiag ket ti anakmo isu ti natay!” Bayat dayta kinunkuna daytoy a babai: “Saan, no di ket ti anakmo isu ti natay ket ti anakko isu ti sibibiag.” Ket nagtultuloyda a nagsao iti sanguanan ti ari.+ 23  Kamaudiananna kinuna ti ari: “Daytoy kunkunana, ‘Isu daytoy ti anakko, ti sibibiag, ket ti anakmo isu ti natay!’ ket daydiay kunkunana, ‘Saan, no di ket ti anakmo isu ti natay ket ti anakko isu ti sibibiag!’” 24  Ket kinuna ti ari:+ “Dakayo a lallaki, iyalaandak iti kampilan.” Gapuna inyegda ti kampilan iti sanguanan ti ari. 25  Ket kinuna ti ari: “Guduaenyo ti sibibiag nga ubing ket itedyo ti maysa a kagudua iti maysa a babai ket ti sabali a kagudua iti sabali.” 26  Dagus a ti babai a makin-anak iti sibibiag kinunana iti ari (ta dagiti makin-uneg a riknana+ madanagan idi iti anakna,+ iti kasta kinunana): “Dispensarennak,+ apok! Dakayo a lallaki, itedyo kenkuana ti sibibiag nga ubing. Nikaanoman dikay papatayen.” Bayat dayta kinunkuna daytoy sabali a babai: “Isu saanto nga agbalin a kukuak wenno kukuam. Dakayo a lallaki, guduaenyo!”+ 27  Iti kasta simmungbat ti ari ket kinunana: “Itedyo kenkuana ti sibibiag nga ubing, ket nikaanoman dikayto papatayen. Isu ti inana.” 28  Ket ti intero nga Israel nangngegda ti hudisial a pangngeddeng+ nga inyawat ti ari; ket nagbutengda gapu iti ari,+ ta nakitada a ti sirib+ ti Dios adda kenkuana tapno mangipakat iti hudisial a pangngeddeng.

Footnotes