Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Ar-ari 22:1-53

22  Ket iti tallo a tawen nagtultuloyda a nagnaed nga awan gubat iti nagbaetan ti Siria ken Israel.  Ket naaramid iti maikatlo a tawen a ni Jehosafat+ nga ari ti Juda simmalog a napan iti ari ti Israel.  Idin kinuna ti ari ti Israel kadagiti adipenna: “Pudpudno kadi nga ammoyo a ti Ramot-galaad+ kukuatayo? Kaskasdi a bumbumdengtayo a mangala iti dayta manipud iti ima ti ari ti Siria.”  Ket kinunana ken Jehosafat: “Kumuyogkanto kadi kaniak a mapan iti dangadang idiay Ramot-galaad?”+ Gapu itoy kinuna ni Jehosafat iti ari ti Israel: “Siak ket kasla met laeng kenka. Ti ilik ket kasla met laeng iti ilim.+ Dagiti kabaliok ket kasla met laeng kadagiti kabaliom.”  Nupay kasta, kinuna ni Jehosafat iti ari ti Israel: “Agimtuodka,+ pangngaasim, umuna iti amin maipaay iti sao ni Jehova.”  Gapuna ti ari ti Israel inummongna a sangsangkamaysa dagiti mammadto,+ agarup uppat a gasut a lallaki, ket kinunana kadakuada: “Mapanakto kadi a bumusor iti Ramot-galaad iti gubat, wenno idiakto kadi?” Ket rinugianda a kunaen: “Sumang-atka,+ ket ni Jehova itednanto dayta iti ima ti ari.”  Ngem kinuna ni Jehosafat: “Awan kadi ditoyen ti maysa a mammadto ni Jehova? Agimtuodtayo koma ngarud babaen kenkuana.”+  Iti kasta ti ari ti Israel kinunana ken Jehosafat: “Adda pay maysa a lalaki a babaen kenkuana makapagimtuodtayo ken Jehova;+ ngem siak pudno unay a kagurak,+ ta saan nga agipadto iti naimbag a bambanag maipapan kaniak no di ket dakes+—ni Mikaias nga anak ni Imla.” Nupay kasta, kinuna ni Jehosafat: “Saan koma a sawen ti ari ti banag a kas iti dayta.”+  Iti kasta nangayab ti ari ti Israel iti maysa nga opisial ti palasio+ ket kinunana: “Iyegmo a sidadaras ni Mikaias nga anak ni Imla.”+ 10  Ita ti ari ti Israel ken ni Jehosafat nga ari ti Juda situtugawda idi tunggal maysa iti tronona, nakawesanda kadagiti pagan-anay,+ iti pagirikan idiay pagserkan ti ruangan ti Samaria; ket amin dagiti mammadto agak-akemda idi kas mammadto iti sanguananda.+ 11  Idin ni Zedekias nga anak ni Kenaana inyaramidanna ti bagina iti sarsara a landok ket kinunana: “Daytoy ti kinuna ni Jehova,+ ‘Babaen kadagitoy iduronmonto dagiti Sirio agingga a matalipuposmo ida.’”+ 12  Ket amin dagiti dadduma a mammadto nagipadpadtoda iti kas met laeng iti dayta, a kunkunada: “Sumang-atka idiay Ramot-galaad ket agballigika; ket sigurado nga itedto dayta ni Jehova iti ima ti ari.”+ 13  Ket nagsao kenkuana ti mensahero a napan mangayab ken Mikaias, a kunkunana: “Adtoy, ita! Ti sasao dagiti mammadto sangsangkamaysada a naimbag iti ari. Ti saom, pangngaasim, agbalin koma a kas iti sao ti maysa kadakuada, ket masapul a sawem ti naimbag.”+ 14  Ngem kinuna ni Mikaias: “Kas sibibiag ni Jehova,+ no ania ti sawento kaniak ni Jehova, dayta ti sawek.”+ 15  Idin simrek a napan iti ari, ket kinuna kenkuana ti ari: “Mikaias, mapankaminto kadi idiay Ramot-galaad iti gubat, wenno idianminto kadi?” Dagus a kinunana kenkuana: “Sumang-atka ket agballigika; ket sigurado nga itedto dayta ni Jehova iti ima ti ari.”+ 16  Iti kasta kinuna kenkuana ti ari: “Mamin-ano a daras a pagsapataenka a rebbeng a saanmo a sawen kaniak ti aniaman no di ti kinapudno iti nagan ni Jehova?”+ 17  Gapuna kinunana: “Pudno unay a makitak dagiti amin nga Israelita a naiwarawara+ iti bambantay, kas karkarnero nga awanan iti pastor.+ Ket kinuna ni Jehova: ‘Awanan dagitoy iti appo. Agsublida koma a sitatalna tunggal maysa iti balayna.’”+ 18  Idin ti ari ti Israel kinunana ken Jehosafat: “Saan aya a kinunak kenka, ‘Agipadtonto maipapan kaniak, saan nga iti naimbag a bambanag, no di ket dakes’?”+ 19  Ket kinunana: “Gapuna denggem ti sao ni Jehova:+ Pudno unay a makitak ni Jehova a situtugaw iti tronona+ ken ti isuamin a buyot ti langlangit a sitatakder iti sibayna, iti makannawanna ken iti makannigidna.+ 20  Ket kinuna ni Jehova, ‘Siasinonto ti mangsikap ken Acab, tapno sumang-at koma ket mapasag idiay Ramot-galaad?’ Ket daytoy inrugina a sawen ti maysa a banag a kas itoy, bayat a daydiay sasawenna ti maysa a banag a kas iti dayta.+ 21  Kamaudiananna rimmuar ti maysa nga espiritu+ ket nagtakder iti sanguanan ni Jehova ket kinunana, ‘Siak sikapakto.’ Iti kasta kinuna kenkuana ni Jehova, ‘Iti ania a pamay-an?’+ 22  Iti daytoy kinunana, ‘Mapanakto, ket pudno unay nga agbalinakto a makaallilaw nga espiritu iti ngiwat dagiti amin a mammadtona.’+ Gapuna kinunana, ‘Isu sikapamto, ken, kanayonanna, sikanto ti rummuar a nangabak.+ Rummuarka ket aramidem ti kasta.’+ 23  Ket ita adtoy nangikabil ni Jehova iti makaallilaw nga espiritu iti ngiwat dagitoy amin a mammadtom;+ ngem ni met laeng Jehova nangisao iti didigra maipapan kenka.”+ 24  Immasideg ita ni Zedekias nga anak ni Kenaana ket kinabilna ni Mikaias iti pingping+ ket kinunana: “Iti ania koma a dalan a limmasat manipud kaniak ti espiritu ni Jehova tapno makisao kenka?”+ 25  Iti kasta kinuna ni Mikaias: “Adtoy! Makitam no ania a dalan iti dayta nga aldaw inton sumrekka iti kaunggan+ a siled tapno aglemmengka.”+ 26  Idin kinuna ti ari ti Israel: “Alaem ni Mikaias ket isublim ken Amon a panguluen ti siudad ken ni Joas nga anak ti ari.+ 27  Ket masapul a kunaem, ‘Daytoy ti kinuna ti ari:+ “Ikabilyo daytoy a tao iti balay a pagikulongan+ ket taraonanyo iti napabassit a sustento a tinapay+ ken napabassit a sustento a danum agingga a dumtengak a sitatalna.”’”+ 28  Kalpasan dayta kinuna ni Mikaias: “No ngarud agsublika a sitatalna, ni Jehova saan a nagsao babaen kaniak.”+ Ket innayonna: “Denggenyo, dakayo amin nga umili.”+ 29  Ket ti ari ti Israel ken ni Jehosafat nga ari ti Juda simmang-atda nga agturong idiay Ramot-galaad.+ 30  Ti ari ti Israel kinunana ita ken Jehosafat: “Addanto pananglimlimo ken iseserrek iti bakal+ maipaay kaniak, ngem sika, iti biangmo, ikawesmo dagiti pagan-anaymo.”+ Iti kasta, nanglimlimo+ ti ari ti Israel ket simrek iti bakal.+ 31  No maipapan iti ari ti Siria, binilinna ti tallopulo ket dua a panguluen+ ti karkaruahe a kukuana, a kunkunana: “Masapul a makirupakkayo, saan nga iti bassit wenno iti dakkel, no di ket iti ari ti Israel laeng.”+ 32  Ket naaramid nga, apaman a dagiti panguluen ti karkaruahe nakitada ni Jehosafat, isuda, iti biangda, kinunada iti bagbagida: “Sigurado a dayta ti ari ti Israel.”+ Gapuna bimmaw-ingda a bumusor kenkuana a makirupak; ket nangrugi nga agpukkaw ni Jehosafat maipaay iti tulong.+ 33  Ket naaramid nga, apaman a nakita dagiti panguluen ti karkaruahe a saan a dayta ti ari ti Israel, dagus a nagsublida manipud panangsurot kenkuana.+ 34  Ket adda idi maysa a lalaki a nangballok iti bai a nangipaspasarak, ngem napuntaanna ti ari ti Israel iti nagbaetan dagiti kanayonan a kabal ken ti nagsasaip a kabal, iti kasta kinunana iti kumakaruahena:+ “Ibaw-ingmo ta imam, ket iruarnak manipud iti pakarso, agsipud ta nakaro unay ti pannakasugatko.” 35  Ket nagtultuloy a kimmaro ti kinabara ti panagbabakal iti dayta nga aldaw, ket ti met laeng ari kinasapulan a mapagtalinaed a sitatakder iti karuahe a sumangsango kadagiti Sirio, ket nagin-inut a natay+ iti rabii; ket ti dara ti sugat nagtultuloy a nagayus iti uneg ti karuahe a pakigubat.+ 36  Ket ti agal-allinga nga ikkis nangrugi a maiwaragawag iti pakarso iti agarup ilelennek ti init, a kunkunana: “Tunggal maysa iti siudadna, ken tunggal maysa iti dagana!”+ 37  Gapuna ti ari natay. Idi naiyeg idiay Samaria, iti kasta intabonda ti ari idiay Samaria.+ 38  Ket rinugianda nga ugasan ti karuahe a pakigubat iti igid ti ban-aw ti Samaria, ket dinildilan dagiti aso ti darana+ (ket nagdigos sadiay dagiti mismo a balangkantis), maitunos iti sao ni Jehova a sinaona.+ 39  No maipapan iti dadduma pay kadagiti pasamak ni Acab ken amin nga inaramidna ken iti balay a marfil+ nga imbangonna ken kadagiti amin a siudad a binangonna, saanda aya a naisurat iti libro+ dagiti pasamak iti al-aldaw ti ar-ari ti Israel? 40  Kamaudiananna nakikaidda ni Acab kadagidi ammana;+ ket ni Ocozias+ nga anakna nangrugi nga agturay a mangsandi kenkuana. 41  No maipapan ken Jehosafat+ nga anak ni Asa, nagbalin nga ari iti Juda iti maikapat a tawen ni Acab nga ari ti Israel. 42  Ni Jehosafat tallopulo ket lima ti tawenna idi nangrugi nga agturay, ket iti duapulo ket lima a tawen nagturay idiay Jerusalem; ket ti nagan ti inana Azuba nga anak ni Silhi. 43  Ket nagtultuloy a nagna iti isuamin a dalan ni Asa nga amana. Saan a simiasi iti dayta, babaen ti panangaramidna no ania ti umiso kadagiti mata ni Jehova.+ Isuna laeng ta saan a nagpukaw dagiti mismo a nangato a disso. Agisaksakripisio pay laeng idi dagiti umili ken mangpatpataud iti asuk a sakripisio kadagiti nangato a disso.+ 44  Ket ni Jehosafat pinagtalinaedna dagiti natalna a pannakirelasion iti ari ti Israel.+ 45  No maipapan iti dadduma pay kadagiti pasamak ni Jehosafat ken ti kinamannakabalin a babaen iti dayta isu nagtignay ken no kasano a nakigubat, saanda aya a naisurat iti libro+ dagiti pasamak iti al-aldaw ti ar-ari ti Juda? 46  Ket ti dadduma kadagiti lallaki a balangkantis iti templo+ a natedda idi kaaldawan ni Asa nga amana inikkatna manipud iti daga.+ 47  No maipapan iti maysa nga ari, awan idi idiay Edom;+ ti maysa a diputado ket ari.+ 48  Ni Jehosafat, iti biangna, nangaramid kadagiti barko a Tarsis+ a mapan idiay Ofir maipaay iti balitok; ngem saanda a napan, agsipud ta dagiti barko narba idiay Ezion-geber.+ 49  Iti daydin a ni Ocozias nga anak ni Acab kinunana ken Jehosafat: “Ipalubosmo a ti ad-adipenko kumuyogda iti ad-adipenmo kadagiti barko,” ngem saan nga immannugot ni Jehosafat.+ 50  Kamaudiananna nakikaidda ni Jehosafat kadagidi ammana+ ket naitabon a kadua dagidi ammana idiay Siudad ni David+ nga amana; ket ni Jehoram+ nga anakna nangrugi nga agturay a mangsandi kenkuana. 51  No maipapan ken Ocozias+ nga anak ni Acab, nagbalin nga ari iti Israel idiay Samaria iti maikasangapulo ket pito a tawen ni Jehosafat nga ari ti Juda, ket nagtultuloy nga agturay iti Israel iti dua a tawen. 52  Ket inar-aramidna no ania ti dakes+ kadagiti mata ni Jehova ket nagna iti dalan ni amana+ ken iti dalan ni inana+ ken iti dalan ni Jeroboam+ nga anak ni Nebat, a namagbasol iti Israel.+ 53  Ket nagtultuloy a nagserbi ken Baal+ ken nagruknoy kenkuana ket intultuloyna a pinagrurod+ ni Jehova a Dios ti Israel maitunos iti amin nga inaramid ni amana.

Footnotes