Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Ar-ari 18:1-46

18  Ket naaramid kalpasan ti adu nga aldaw+ a ti mismo a sao ni Jehova dimteng ken Elias iti maikatlo a tawen, a kunkunana: “Mapanka, agparangka a mismo ken Acab, ta determinadoak a mangted iti tudo iti rabaw ti daga.”+  Iti kasta napan ni Elias tapno agparang a mismo ken Acab, bayat a ti bisin nakaro+ idiay Samaria.  Kabayatanna, ni Acab inayabanna ni Abdias, nga agay-aywan iti sangakabbalayan.+ (Ita ni met laeng Abdias maysa idi a kasta unay ti panagbutengna+ ken Jehova.  Gapuna naaramid nga idi ginessat ni Jezebel+ dagiti mammadto ni Jehova,+ nangala ni Abdias iti sangagasut a mammadto ket pinagtalinaedna ida a silelemmeng a saglilimapulo iti maysa a rukib, ket inabastuanna ida iti tinapay ken danum.)+  Ket ni Acab kinunana ken Abdias: “Lumasatka iti daga kadagiti amin nga ubbog ti danum ken kadagiti amin a naapres a ginget. Bareng makasarakta iti berde a ruot,+ tapno mataginayonta a sibibiag dagiti kabalio ken dagiti mulo ken awanen ti magessat pay kadagiti animal.”+  Gapuna nagbingayanda ti daga a lasatenda. Ni met laeng Acab napan nga agmaymaysa iti maysa a dalan, ket ni met laeng Abdias napan nga agmaymaysa iti sabali a dalan.+  Bayat a nagtultuloy ni Abdias iti dalan, ay ket, adda ni Elias a sumabet kenkuana.+ Dagus a nabigbigna ket inruknoyna ti rupana+ ket kinunana: “Sika kadi daytoy, apok+ nga Elias?”  Iti kasta kinunana kenkuana: “Siak daytoy. Mapanka, sawem iti apom,+ ‘Adtoy ni Elias.’”  Ngem kinunana: “Ania a basol+ ti naaramidak iti kasta rebbeng nga ikabilmo ti adipenmo iti ima ni Acab tapno papatayennak? 10  Kas sibibiag ni Jehova a Diosmo,+ awan ti nasion wenno pagarian a saan a nagibaonan ni apok tapno sapulendaka. Kalpasan a kinunada, ‘Awan ditoy,’ pinagsapatana ti pagarian ken ti nasion a saandaka a masarakan.+ 11  Ket ita kunkunaem, ‘Mapanka, sawem iti apom: “Adtoy ni Elias.”’ 12  Ket sigurado a mapasamak nga, inton mapanak a mismo manipud kenka, iti kasta ti met laeng espiritu+ ni Jehova ipanawnakanto nga ipan iti saanko nga ammo; ket nakagtengakton a mangibaga ken Acab, ket saannakanto a masarakan, ket sigurado a papatayennakto,+ idinto ta ti met laeng adipenmo nagbuteng ken Jehova manipud kinaagtutubona.+ 13  Saan aya a naibaga iti apok no ania ti inaramidko idi a pinapatay ni Jezebel dagiti mammadto ni Jehova, no kasano a pinagtalinaedko a silelemmeng ti sumagmamano kadagiti mammadto ni Jehova, sangagasut a lallaki a saglilimapulo iti maysa a rukib,+ ket inab-abastuak ida iti tinapay ken danum?+ 14  Ket ita kunkunaem, ‘Mapanka, sawem iti apom: “Adtoy ni Elias.”’ Ket sigurado a papatayennakto.”+ 15  Nupay kasta, kinuna ni Elias: “Kas sibibiag ni Jehova ti buybuyot+ nga iti sanguananna sitatakderak,+ ita nga aldaw agparangakto a mismo kenkuana.” 16  Iti kasta napan ni Abdias tapno sumabet ken Acab ket imbagana kenkuana; ket ngarud napan ni Acab tapno sumabet ken Elias. 17  Ket naaramid nga, apaman a ni Acab nakitana ni Elias, dagus a kinuna kenkuana ni Acab: “Sika kadi daytoy, ti manangyeg iti pannakailaksid iti Israel?”+ 18  Iti daytoy kinunana: “Saanak a nangyeg iti pannakailaksid+ iti Israel, no di ket sika ken ti balay ni amam,+ agsipud ta binaybay-anyo dagiti bilin ni Jehova,+ ket simmurotka kadagiti Baal.+ 19  Ket ita agbaonka, ummongem a sangsangkamaysa kaniak ti intero nga Israel idiay Bantay Carmelo+ ken kasta met ti uppat a gasut ket limapulo a mammadto ni Baal+ ken ti uppat a gasut a mammadto ti sagrado a teddek,+ isuda a mangmangan iti lamisaan ni Jezebel.”+ 20  Ket ni Acab nagbaon kadagiti amin nga annak ti Israel ket inummongna a sangsangkamaysa dagiti mammadto+ idiay Bantay Carmelo. 21  Idin ni Elias inasitganna ti amin nga umili ket kinunana: “Kasanonto kabayag nga agallaallatiwkayo iti dua a nagduma a kapanunotan?+ No ni Jehova ti pudno a Dios, sumurotkayo kenkuana;+ ngem no ni Baal, sumurotkayo kenkuana.” Ket saan a nangisao dagiti umili iti maysa a sao kas sungbat kenkuana. 22  Ket kinuna ni Elias kadagiti umili: “Siak ti natedda kas mammadto ni Jehova,+ siak laeng, idinto ta dagiti mammadto ni Baal uppat a gasut ket limapuloda a lallaki. 23  Ita mangtedda koma kadakami iti dua nga urbon a toro, ket mangpilida koma maipaay iti bagbagida iti maysa nga urbon a toro ket rangrangkayenda ket iparabawda iti kayo, ngem rebbeng a saanda a mangikabil ti apuy iti dayta. Ket siak partiekto ti sabali nga urbon a toro, ket iparabawkonto iti kayo, ngem saanakto a mangikabil ti apuy iti dayta. 24  Ket masapul nga umawagkayo iti nagan ti diosyo,+ ket siak, iti biangko, umawagakto iti nagan ni Jehova; ket mapasamakto a ti pudno a Dios a sumungbat babaen iti apuy+ isu ti pudno a Dios.”+ Iti daytoy simmungbat dagiti amin nga umili ket kinunada: “Ti banag nasayaat.” 25  Kinuna ita ni Elias kadagiti mammadto ni Baal: “Mangpilikayo maipaay iti bagbagiyo iti maysa nga urbon a toro ket partienyo nga umuna dayta, agsipud ta ad-adukayo; ket umawagkayo iti nagan ti diosyo, ngem dikay mangikabil ti apuy iti dayta.” 26  Iti kasta innalada ti urbon a toro nga intedna kadakuada. Kalpasanna pinartida, ket immaw-awagda iti nagan ni Baal manipud bigat agingga iti agmatuon, a kunkunada: “O Baal, sungbatannakami!” Ngem awan ti timek,+ ket awan asinoman a sumungsungbat.+ Ket nagtultuloyda a nagsagkisagking iti likmut ti altar nga inaramidda. 27  Ket naaramid iti agmatuon a rinugian ni Elias a rabrabaken+ ida ket kinunana: “Umawagkayo iti kapigsaan a timekyo, ta isu maysa a dios;+ ta mabalin nga adda banag a pakaseknanna, ken addaan ibleng+ ket masapul a mapan iti pagiblengan.+ Wenno mabalin a matmaturog ket rebbeng nga agriing!”+ 28  Ket rinugianda ti immawag iti kapigsaan a timekda ken nangsugat+ iti bagbagida babaen kadagiti punial ken babaen kadagiti gayang maitunos iti kaugalianda, agingga a namagarubosda kadagita iti dara. 29  Ket naaramid nga, apaman a napalabasen ti agmatuon ken nagtultuloyda a nagtignay a kasla mammadto+ agingga iti pannakaisang-at ti daton a bukbukel, awan ti timek, ket awan asinoman a sumungsungbat, ket awan ti panangipangag.+ 30  Idi agangay kinuna ni Elias kadagiti amin nga umili: “Umasidegkayo kaniak.” Gapuna immasideg kenkuana dagiti amin nga umili. Idin tinarimaanna ti narba nga altar ni Jehova.+ 31  Gapuna nangala ni Elias iti sangapulo ket dua a bato, sigun iti bilang dagiti tribu ti annak ni Jacob, a dimtengan ti sao ni Jehova,+ a kunkunana: “Israel ti agbalinto a naganmo.”+ 32  Ket binangonna dagiti bato a pinagbalin nga altar+ iti nagan ni Jehova+ ket nangaramid iti maysa a kanal, nga agarup kalawa ti namulaan iti dua a sea a sukat ti bin-i, iti intero nga aglikmut ti altar. 33  Kalpasan dayta inurnosna dagiti pedaso a kayo+ ket rinangrangkayna ti urbon a toro ket inkabilna iti rabaw dagiti pedaso a kayo. Kinunana ita: “Punnuenyo ti uppat a dadakkel a karamba iti danum ket ibukbokyo iti daton a mapuoran ken kadagiti pedaso a kayo.” 34  Kalpasanna kinunana: “Aramidenyo manen.” Gapuna inaramidda manen. Ngem kinunana: “Aramidenyo iti maikatlo a daras.” Gapuna inaramidda iti maikatlo a daras. 35  Iti kasta ti danum nagayus iti intero nga aglikmut ti altar, ket ti kanal pinunnona met iti danum. 36  Ket naaramid iti tiempo+ ti pannakaisang-at ti daton a bukbukel a ni Elias a mammadto rinugianna ti umasideg ket kinunana: “O Jehova, ti Dios da Abraham,+ Isaac+ ken Israel,+ ita nga aldaw maammuan koma a sika ti Dios iti Israel+ ket siak ti adipenmo ket babaen iti saom+ nga inaramidko amin dagitoy a banag. 37  Sungbatannak, O Jehova, sungbatannak, tapno maammuan daytoy nga ili a sika, Jehova,+ ti pudno a Dios ket sika pinagsublim ti pusoda.”+ 38  Iti kasta nagtinnag ti apuy+ ni Jehova ket inibusna ti daton a mapuoran+ ken dagiti pedaso a kayo ken dagiti bato ken ti tapok, ket ti danum nga adda iti kanal dinilpatanna.+ 39  Idi a nakita dayta dagiti amin nga umili, dagus nga inruknoyda dagiti rupada+ ket kinunada: “Ni Jehova ti pudno a Dios! Ni Jehova ti pudno a Dios!” 40  Idin kinuna kadakuada ni Elias: “Kemmegenyo dagiti mammadto ni Baal! Dikay bay-an a makatalaw ti uray maysa kadakuada!” Dagus a kinemmegda ida, ket kalpasanna insalog ida ni Elias idiay naapres a ginget ti Kison+ ket ginudasna ida sadiay.+ 41  Ni Elias kinunana ita ken Acab: “Sumang-atka, mangan ken uminumka;+ ta adda ti daranudor ti bellaak ti maysa a bayakabak.”+ 42  Ket simmang-at ni Acab tapno mangan ken uminum. No maipapan ken Elias, simmang-at agingga iti tapaw ti Carmelo ket nangrugi a nagalikenken iti daga+ ken namagtalinaed iti rupana a nakakabil iti nagbaetan dagiti tumengna.+ 43  Idin kinunana iti katulonganna: “Sumang-atka, pangngaasim. Kumitaka iti turong ti baybay.” Gapuna simmang-at ket kimmita ket kalpasanna kinunana: “Awan ti uray ania.” Ket kinunana, “Agsublika,” iti pito a daras.+ 44  Ket naaramid nga iti maikapito a daras kinunana: “Adtoy! Adda agpangpangato manipud iti baybay a maysa a bassit nga ulep a kas iti dakulap ti tao.”+ Kinunana ita: “Sumang-atka, sawem ken Acab, ‘Mangisingkawka!+ Ket sumalogka tapno saannaka nga igawid ti bayakabak!’” 45  Ket naaramid kabayatanna a ti met laeng langlangit nagsipnget gapu kadagiti ulep ken angin+ ket nangrugi a dumteng ti dakkel a bayakabak.+ Ket intultuloy ni Acab ti nagsakay ket napan idiay Jezrael.+ 46  Ket ti mismo nga ima ni Jehova naadda ken Elias,+ iti kasta binariksanna dagiti padingpadingna+ ket napan nga agtartaray nga immun-una ngem ni Acab agingga idiay Jezrael.+

Footnotes