Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

1 Ar-ari 12:1-33

12  Ket napan ni Rehoboam+ idiay Siquem, ta idiay Siquem+ nga immay ti intero nga Israel tapno isu pagbalinenda nga ari.  Ket naaramid nga apaman a nangngeg dayta ni Jeroboam+ nga anak ni Nebat bayat nga adda pay laeng idiay Egipto (agsipud ta nagtalaw maigapu ken Ari Solomon, tapno makapagnaed ni Jeroboam idiay Egipto),+  idin nagbaonda ket pinaayabanda. Kalpasan dayta immay ni Jeroboam ken ti intero a kongregasion ti Israel ket nangrugida nga agsao ken Rehoboam, a kunkunada:+  “Ni amam, iti biangna, pinagbalinna a nadagsen ti sangolmi, ket, no maipapan kenka, ita pagbalinem a nalaglag-an+ ti narigat a panagserbi iti amam ken ti nadagsen a sangolna+ nga inkabilna kadakami, ket agserbikamto kenka.”+  Gapu itoy kinunana kadakuada: “Pumanawkayo iti tallo nga aldaw ket agsublikayo kaniak.”+ Gapuna pimmanaw dagiti umili.  Ket rinugian ni Ari Rehoboam ti makinumo kadagiti lallakay+ a nagtultuloy a nagasikaso ken Solomon nga amana bayat a sibibiag pay, a kunkunana: “Kasano ti maibalakadyo nga isusungbat iti daytoy nga ili?”+  Iti kasta nagsaoda kenkuana, a kunkunada: “No ita nga aldaw paneknekam ti bagim a maysa nga adipen iti daytoy nga ili ket pudno nga agserbika kadakuada,+ masapul a sungbatam met ida ket agsaoka kadakuada iti naimbag a sasao;+ ket sigurado nga agbalindanto nga ad-adipenmo a kanayon.”+  Nupay kasta, binaybay-anna ti pammatigmaan nga imbalakad kenkuana dagiti lallakay, ket rinugianna ti makinumo kadagiti agtutubo a lallaki a dimmakkel a kaduana,+ isuda nga agas-asikaso kenkuana.+  Ket kinunana kadakuada: “Ania ti maipaayyo kas pammatigmaan+ tapno maisungbattayo iti daytoy nga ili a nagsao kaniak, a kunkunada, ‘Pagbalinem a nalaglag-an ti sangol nga inkabil kadakami ni amam’?”+ 10  Kalpasanna nagsao kenkuana dagiti agtutubo a lallaki a dimmakkel a kaduana, a kunkunada: “Daytoy ti rebbeng a sawem+ iti daytoy nga ili a nagsao kenka, a kunkunada, ‘Ni amam, iti biangna, pinagbalinna a nadagsen ti sangolmi, ngem, no maipapan kenka, pagbalinem dayta a nalaglag-an kadakami’; daytoy ti rebbeng a sawem kadakuada, ‘Ti met laeng kikitko sigurado a napuspuskolto ngem kadagiti padingpading ni amak.+ 11  Ket ita ni amak, iti biangna, nangipaawit kadakayo iti nadagsen a sangol; ngem siak, iti biangko, nayonakto ti sangolyo.+ Ni amak, iti biangna, dinusanakayo babaen kadagiti baut, ngem siak, iti biangko, dusaenkayto babaen kadagiti pannaplit.’”+ 12  Ket ni Jeroboam ken amin dagiti umili immayda ken Rehoboam iti maikatlo nga aldaw, kas iti sinao ti ari, a kunkunana: “Agsublikayo kaniak iti maikatlo nga aldaw.”+ 13  Ket ti ari inrugina a sigugubsang a sungbatan dagiti umili,+ ken baybay-an ti pammatigmaan dagiti lallakay a nangpatigmaan kenkuana.+ 14  Ket nagsao kadakuada maitunos iti pammatigmaan dagiti agtutubo a lallaki,+ a kunkunana: “Ni amak, iti biangna, pinagbalinna a nadagsen ti sangolyo, ngem siak, iti biangko, nayonakto ti sangolyo. Ni amak, iti biangna, dinusanakayo babaen kadagiti baut, ngem siak, iti biangko, dusaenkayto babaen kadagiti pannaplit.”+ 15  Ket ti ari saanna nga inimdengan dagiti umili,+ agsipud ta ti panagbaliw ti paspasamak naaramid iti panangtignay ni Jehova,+ tapno pudno a maitungpalna ti saona+ a sinao ni Jehova ken Jeroboam nga anak ni Nebat babaen ken Ahias+ a Silonita. 16  Idi a nakita ti intero nga Israel a saan ida nga inimdengan ti ari, iti kasta dagiti umili simmungbatda iti ari, a kunkunada: “Ania ti adda a binglaymi ken David?+ Ket awan ti tawid iti anak ni Jesse. Kadagiti didiosmo,+ O Israel. Ita aywanam ti kabukbukodam a balay, O David!”+ Idin rinugian ti Israel ti mapan kadagiti toldana. 17  No maipapan iti annak ti Israel nga agnanaed kadagiti siudad ti Juda, nagtultuloy nga agturay kadakuada ni Rehoboam.+ 18  Kalpasanna ni Ari Rehoboam imbaonna ni Adoram,+ nga agay-aywan kadagidiay naipasalista a maipaay iti pinuersa a panagtrabaho,+ ngem inubor ti intero nga Israel iti batbato,+ iti kasta natay. Ket ni met laeng Ari Rehoboam nabaelanna ti lumugan iti karuahe tapno agkamang idiay Jerusalem. 19  Ket intultuloy dagiti Israelita ti iyaalsada+ iti balay ni David agingga itoy nga aldaw.+ 20  Ket naaramid nga apaman a nangngeg ti intero nga Israel a nagsublin ni Jeroboam, dagus a nagbaonda ket pinaayabanda iti gimong ket pinagbalinda nga ari iti intero nga Israel.+ Awan ti nagbalin a pasurot ti balay ni David malaksid iti tribu ni Juda laeng.+ 21  Idi dimteng ni Rehoboam idiay Jerusalem,+ dagus nga inummongna ti intero a balay ni Juda ken ti tribu ni Benjamin,+ sangagasut ket walopulo a ribu a napili a lallaki a nabaneg maipaay iti gubat, tapno makirupakda iti balay ti Israel, tapno isublida ti kinaari ken Rehoboam nga anak ni Solomon. 22  Idin ti sao ti pudno a Dios dimteng ken Semaias+ a lalaki ti pudno a Dios,+ a kunkunana: 23  “Sawem ken Rehoboam nga anak ni Solomon nga ari ti Juda ken iti intero a balay da Juda ken Benjamin ken ti dadduma kadagiti umili, 24  ‘Daytoy ti kinuna ni Jehova: “Dikay sumang-at ken makirupak iti kakabsatyo nga annak ti Israel.+ Agsublikayo tunggal maysa iti balayna, ta daytoy a banag napasamak iti panangtignayko.”’”+ Gapuna nagtulnogda iti sao ni Jehova,+ ket nagawidda maitunos iti sao ni Jehova.+ 25  Ket ni Jeroboam binangonna ti Siquem+ iti nakabambantay a rehion ti Efraim ket nagnaed iti dayta. Kalpasanna rimmuar manipud sadiay ket binangonna ti Penuel.+ 26  Ket inrugi a kunaen ni Jeroboam iti pusona:+ “Ita ti pagarian agsublinto iti balay ni David.+ 27  No daytoy nga ili agtultuloy a sumang-at tapno mangidatag kadagiti sakripisio iti balay ni Jehova idiay Jerusalem,+ ti puso daytoy nga ili sigurado nga agsublinto met iti apoda, ni Rehoboam nga ari ti Juda; ket sigurado a papatayendakto+ ket agsublida ken Rehoboam nga ari ti Juda.” 28  Iti kasta nakinumo ti ari+ ket nangaramid iti dua a nabalitokan a kigaw a baka+ ket kinunana kadagiti umili: “Nalabes unay a sumang-atkayo idiay Jerusalem. Adtoy ti Diosmo,+ O Israel, a nangaon kenka iti daga ti Egipto.”+ 29  Kalpasanna insaadna ti maysa idiay Bethel,+ ket ti sabali inkabilna idiay Dan.+ 30  Ket daytoy a banag nagbalin a pakaigapuan ti basol,+ ket inrugi dagiti umili ti mapan iti sanguanan ti maysa agingga idiay Dan. 31  Ket isu nangrugi a mangaramid iti balay dagiti nangato a disso+ ken mangaramid iti papadi manipud iti kaaduan kadagiti umili, isuda a saan a kameng ti annak ni Levi.+ 32  Ket nangaramid ni Jeroboam iti piesta iti maikawalo a bulan iti maikasangapulo ket lima nga aldaw ti bulan, kas iti piesta nga adda idi idiay Juda,+ tapno makapagdaton iti rabaw ti altar nga inaramidna idiay Bethel, tapno agisakripisio kadagiti kigaw a baka nga inaramidna; ket inkabilna nga agasikaso idiay Bethel+ ti papadi dagiti nangato a disso nga inaramidna. 33  Ket rinugianna ti agidaton iti rabaw ti altar nga inaramidna idiay Bethel iti maikasangapulo ket lima nga aldaw ti maikawalo a bulan, iti bulan a pinartuatna a mismo;+ ket nangaramid iti maysa a piesta a maipaay iti annak ti Israel ken nagidaton iti rabaw ti altar tapno mangpataud iti asuk a sakripisio.+

Footnotes