Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

1 Ar-ari 11:1-43

11  Ket ni met laeng Ari Solomon nagayat iti adu a ganggannaet nga assawa+ agraman ti anak a babai ni Faraon,+ Moabita,+ Ammonita,+ Edomita,+ Sidonio+ ken Heteo+ a babbai,  manipud kadagiti nasion a maipapan kadakuada kinuna ni Jehova iti annak ti Israel: “Dikay sumrek iti tengngada,+ ket isuda rebbeng a saanda a sumrek iti tengngayo; pudno unay a pagannayasendanto ti pusoyo a sumurot iti didiosda.”+ Kadakuada a dimmekket ni Solomon+ tapno ayatenna ida.  Ket naaddaan iti pito gasut nga assawa, piprinsesa, ken tallo gasut a kamalala; ket ti pusona nagin-inut a pinagannayas dagiti assawana.+  Ket naaramid iti tiempo ti panaglakay ni Solomon+ a dagiti met laeng assawana pinagannayasda+ ti pusona a sumurot kadagiti sabali a didios;+ ket ti pusona saan idi a naan-anay+ ken Jehova a Diosna a kas iti puso ni David nga amana.  Ket ni Solomon nangrugi a simmurot ken ni Astoret+ a diosa dagiti Sidonio ken ni Milcom+ a makarimon a banag dagiti Ammonita.  Ket inrugi nga aramiden ni Solomon no ania ti dakes+ kadagiti mata ni Jehova, ket saanna a sinurot a naan-anay ni Jehova a kas ken David nga amana.+  Iti daydin a nangibangon ni Solomon iti nangato a disso+ maipaay ken Kemos+ a makarimon+ a banag ti Moab iti bantay+ nga adda iti sango+ ti Jerusalem, ken maipaay ken Molec a makarimon a banag ti annak ni Ammon.  Ket kasta idi ti inaramidna maipaay iti amin a ganggannaet nga assawana+ a mangpatpataud iti asuk a sakripisio ken agisaksakripisio iti didiosda.+  Ket ni Jehova nagpungtot unay+ ken Solomon, agsipud ta ti pusona nagannayas nga immadayo ken Jehova a Dios ti Israel,+ daydiay nagparang kenkuana iti namindua.+ 10  Ket maipapan itoy a banag imbilinna kenkuana a saan a sumurot kadagiti sabali a didios;+ ngem saanna a sinalimetmetan daydiay imbilin ni Jehova. 11  Ni Jehova kinunana ita ken Solomon: “Iti rason a naaramid daytoy kenka ken saanmo a sinalimetmetan ti tulagko ken dagiti paglintegak nga impasdekko kenka kas bilin, di bumurong a pisangekto nga iyadayo kenka ti pagarian, ket pudno unay nga itedkonto dayta iti adipenmo.+ 12  Nupay kasta, saankonto nga aramiden dayta iti al-aldawmo,+ maipagapu ken David nga amam.+ Pisangekto nga iyadayo dayta iti ima ti anakmo.+ 13  Isuna laeng ta saanto a ti intero a pagarian ti pisangek nga iyadayo.+ Maysa a tribu ti itedkonto iti anakmo, maipagapu ken David nga adipenko+ ken maipagapu iti Jerusalem a pinilik.”+ 14  Ket inrugi ni Jehova ti mangpatanor iti manangsupiat+ ken Solomon,+ awan sabali, ni Hadad nga Edomita iti kaputotan ti ari. Isu adda idiay Edom.+ 15  Ket naaramid idi kinabil ni David ti Edom,+ idi simmang-at ni Joab a panguluen ti buyot tapno itabonna dagidiay napapatay, a pinadasna a papatayen ti tunggal lalaki idiay Edom.+ 16  (Ta innem a bulan a nagnaed sadiay ni Joab ken ti intero nga Israel agingga a nagessatna ti tunggal lalaki idiay Edom.) 17  Ket nagtalaw ni Hadad, isu ken kaduana ti sumagmamano a lallaki nga Edomita kadagiti adipen ni amana, tapno sumrek iti Egipto, bayat a ni Hadad maysa idi nga ubing. 18  Gapuna timmakderda manipud Midian+ ket dimtengda idiay Paran ket nangalada iti lallaki a maikuyog kadakuada manipud Paran+ ket dimtengda idiay Egipto ken Faraon nga ari ti Egipto, a nangted kenkuana iti balay kalpasanna. Kasta met, nangituding kenkuana iti tinapay, ken nangted kenkuana iti daga. 19  Ket nagtultuloy a makasarak ni Hadad iti pabor+ kadagiti mata ni Faraon, iti kasta unay nga isu inikkanna iti asawa,+ ti kabsat ti bukodna nga asawa, ti kabsat a babai ni Tapenes nga ina a reyna. 20  Idi agangay ti kabsat ni Tapenes impasngayna kenkuana ni Genubat nga anakna, ket pinusot+ ni Tapenes iti mismo nga uneg ti balay ni Faraon; ket ni Genubat nagtalinaed iti balay ni Faraon iti mismo a nagtetengngaan ti annak ni Faraon. 21  Ket ni Hadad a mismo nangngegna idiay Egipto a nakikaiddan ni David kadagidi ammana+ ken natayen ni Joab a panguluen ti buyot.+ Gapuna ni Hadad kinunana ken Faraon: “Palubosannak,+ tapno mapanak iti bukodko a daga.” 22  Ngem kinuna kenkuana ni Faraon: “Ania ti nagkasapulam bayat nga addaka kaniak nga adtoy tartarigagayam ti mapan iti bukodmo a daga?” Gapu itoy kinunana: “Awan; ngem rebbeng a palubosannak a di bumurong.” 23  Ket ti Dios nangpatanor iti sabali pay a manangsupiat kenkuana,+ awan sabali, ni Rezon nga anak ni Eliada, a nagtalaw ken Hadadezer+ nga ari ti Zoba+ nga apona. 24  Ket nangum-ummong kadagiti lallaki iti dasigna ket nagbalin a panguluen ti maysa a buyot dagiti tulisan, idi pinapatay ida ni David.+ Iti kasta napanda idiay Damasco+ ken nagnaed iti dayta ken nangrugi a nagturay idiay Damasco. 25  Ket nagbalin a manangsupiat iti Israel iti amin nga al-aldaw ni Solomon,+ ken mairaman dayta ti pannakadangran nga inaramid ni Hadad; ket naaddaan iti pannakarurod+ iti Israel bayat nga isu nagtultuloy a nagturay idiay Siria. 26  Ket adda idi ni Jeroboam+ nga anak ni Nebat nga Efraimita manipud Zereda, maysa nga adipen ni Solomon,+ ket ti nagan ti inana Zerua, maysa a nabalo a babai. Rinugianna met nga itag-ay ti imana maibusor iti ari.+ 27  Ket daytoy ti rason nga intag-ayna ti imana maibusor iti ari: Ni met laeng Solomon imbangonna ti Muntuon.+ Sinerraanna ti giwang ti Siudad ni David nga amana.+ 28  Ita ti tao a ni Jeroboam maysa idi a maingel, nabileg a lalaki.+ Idi nakita ni Solomon a ti agtutubo maysa a napinget a trabahador,+ pinagbalinna a manangaywan+ iti isuamin nga inkapilitan a panagserbi+ iti balay ni Jose.+ 29  Ket naaramid iti dayta met laeng a tiempo a ni Jeroboam a mismo rimmuar manipud Jerusalem, ket iti dalan isu nasarakan ni Ahias+ a Silonita+ a mammadto, ket ni Ahias nagabbong idi iti maysa a baro a kawes; ket duduada laeng idi idiay tay-ak. 30  Iniggaman ita ni Ahias ti baro a kawes nga adda kenkuana ket pinisangna+ iti sangapulo ket dua+ a kapaset. 31  Ket kinunana ken Jeroboam: “Mangalaka maipaay kenka iti sangapulo a kapaset; ta daytoy ti kinuna ni Jehova a Dios ti Israel, ‘Adtoy pisangek ti pagarian manipud iti ima ni Solomon, ket pudno unay a mangtedakto kenka iti sangapulo a tribu.+ 32  Ket ti maysa a tribu+ ti agtultuloyto a kukuana maipagapu ken adipenko a David+ ken maipagapu iti Jerusalem,+ ti siudad a pinilik manipud kadagiti amin a tribu ti Israel. 33  Ti rason ket gapu ta binaybay-andak+ ket nangrugida nga agruknoy ken Astoret+ a diosa dagiti Sidonio, ken Kemos+ a dios ti Moab ken Milcom+ a dios ti annak ni Ammon; ket saanda a nagna iti daldalanko babaen ti panangaramidda iti umiso kadagiti matak ken kadagiti paglintegak ken kadagiti hudisial a pangngeddengko a kas ken David nga amana. 34  Ngem ti intero a pagarian saankonto nga alaen iti imana, agsipud ta isu isaadkonto a panguluen iti amin nga al-aldaw ti panagbiagna, maipagapu ken David nga adipenko a pinilik,+ agsipud ta sinalimetmetanna dagiti bilinko ken dagiti paglintegak. 35  Ket ti kinaari pudno unay nga alaekto iti ima ti anakna ket itedkonto dayta kenka, ti mismo a sangapulo a tribu.+ 36  Ket iti anakna mangtedakto iti maysa a tribu, tapno ni David nga adipenko agtultuloy nga addaan a kanayon iti maysa a pagsilawan iti sanguanak idiay Jerusalem,+ ti siudad a pinilik maipaay kaniak tapno ikabilko ti naganko sadiay.+ 37  Ket sika ti alaekto, ket pudno nga agturaykanto iti amin a tarigagayan ta kararuam,+ ket sigurado nga agbalinkanto nga ari iti Israel. 38  Ket mapasamakto a, no agtulnogka iti amin nga ibilinkonto kenka, ket magnaka iti daldalanko ket pudno nga aramidem ti umiso kadagiti matak babaen ti panangsalimetmetmo kadagiti paglintegak ken kadagiti bilinko, kas iti inaramid ni David nga adipenko,+ addaakto met kenka,+ ket ibangonankanto iti agpaut a balay, kas iti imbangonko a maipaay ken David,+ ket itedkonto kenka ti Israel. 39  Ket ipababakto ti kaputotan ni David maigapu iti daytoy,+ isuna laeng ta saan a kanayon.’”+ 40  Ket rinugian nga inkagumaan ni Solomon a papatayen ni Jeroboam.+ Gapuna timmakder ni Jeroboam ket nagtalaw+ nga agturong idiay Egipto ken Sisac+ nga ari ti Egipto, ket nagtalinaed idiay Egipto agingga iti ipapatay ni Solomon. 41  No maipapan iti dadduma pay kadagiti pasamak ni Solomon ken amin nga inaramidna ken ti kinasiribna, saanda aya a naisurat iti libro dagiti pasamak ni Solomon? 42  Ket dagiti aldaw a panagturay ni Solomon idiay Jerusalem iti intero nga Israel uppat a puloda a tawen.+ 43  Kalpasanna nakikaidda ni Solomon kadagidi ammana,+ ket naitabon idiay Siudad ni David+ nga amana; ket ni Rehoboam+ nga anakna nangrugi nga agturay a mangsandi kenkuana.

Footnotes