Mapan iti linaonna

SALUDSOD DAGITI AGTUTUBO

Kasano Kaimportante ti Panagbalin a Sikat Online?

Imbaga ti maysa a tin-edyer a ni Elaine: “Idi nakitak a ginasut ti follower dagiti klasmeytko, naibagak, ‘Wow, sikatda!’ Kasla umapalak met.”

Kasta met kadi ti marikriknam? No madisdismayaka ta kayatmo ti agbalin a sikat online, makatulong kenka daytoy nga artikulo.

 Ania dagiti pagdaksanna?

Iti Proverbio 22:1, ibaga ti Biblia a “pilien ti naimbag a nagan imbes a ti adu a kinabaknang.” Isu a normal laeng a kayatmo a nasayaat koma ti reputasionmo—ken kayatdaka ti dadduma.

Ngem no maminsan, saan laengen a dayta ti kayatmo. Baka desperadokan nga agbalin a sikat. Adda kadi pagdaksanna dayta? Adda, kuna ni Onya a 16 anyos:

“Grabe ti ar-aramiden ti dadduma. Tumpuakda payen iti second-story a building iti eskuelaanmi tapno laeng agbalinda a sikat.”

Tapno maalada ti atension ti dadduma, adda dagiti mangi-video iti naidumduma nga ar-aramidenda sada i-post online. Kas pagarigan, adu a tin-edyer ti nang-upload kadagiti video-da a mangmangan iti paglaba a sabon nga addaan iti makasabidong a substansia a saan koma nga aramiden ti maysa!

Ti kuna ti Biblia: “Dikay agaramid iti aniaman gapu iti . . . kinapangas.”—Filipos 2:3.

Panunotem:

  • Kasano kaimportante kenka ti agbalin a sikat online?

  • Aramidem kadi ti maysa a banag tapno laeng maalam ti atension wenno kayatendaka ti dadduma uray delikado dayta iti salun-at wenno biagmo?

 “Panagkunada sikatda ngem ilusion laeng”

Saan a kasapulan a kanayon a mangaramidka kadagiti delikado a banag tapno agbalinka a sikat. Imbaga ni Erica a 22 anyos no ania ti ar-aramiden ti dadduma:

“Agkara-post dagiti tattao kadagiti piktiurda, isu a kasla nakaad-adu dagiti gagayyemda a kanayonda a kadua. Isu a panagkunada sikatda ngem ilusion laeng.”

Kuna ni Cara a 15 anyos a tapno agparang a sikatda, dadduma a tattao ti agi-post iti saan nga agpayso a piktiur:

“Adda dagiti makitkitak nga agipo-post kadagiti piktiur a kasla addada iti party ngem ti agpayso addada laeng iti balay.”

Inamin ni Matthew a 22 anyos nga inaramidnan dayta:

“Nagi-post-ak iti piktiur sako in-tag a Mount Everest ti lokasionna, uray no saanak pay a napnapan iti Asia!”

Ti kuna ti Biblia: “Kayatmi ti agbiag a mapagtalkan iti amin a banag.”—Hebreo 13:18.

Panunotem:

  • Agipo-post-ka kadi iti social media iti saan nga agpayso tapno agbalinka a mas sikat?

  •  Makita kadi kadagiti ipo-post-mo a piktiur ken comments no asinoka a talaga ken no ania dagiti patpatiem?

 Kasano kaimportante dagiti followers ken likes?

Para iti adu a tattao, agbalinka a sikat online no nakaad-adu dagiti followers ken likes-mo. Inamin ni Matthew a nadakamat itay, a kasta idi ti marikriknana:

“Damdamagek no kua, ‘Manon ti followers-mo?’ wenno ‘Mano ti kaaduan a nag-like iti im-post-mo?’ Tapno umadu ti follower-ko, uray sinno lattan ti i-follow-k, baka i-follow-dakto met. Manipud idin, desperadoakon nga agbalin a sikat, ken pinakaro pay dayta ti social media.”

Ti panagbalin a sikat online ket kasla iti junk food—nag-enjoy-ka a nangan ngem saanka met a nabsog

Imbaga ni Maria a 25 anyos, a sa laeng marikna ti dadduma nga importanteda no adu ti followers ken likes-da:

“No bassit ti nag-like iti selfie ti maysa a babai nga im-post-na, panunotenna a saan a napintas. Siempre, saan nga agpayso dayta. Ngem adu a tattao ti kasta ti panagriknana, isu a kasla ibul-bully-da met laeng ti bagbagida.”

Ti kuna ti Biblia: “Ditay koma agbalin a napangas, ditay irugrugi ti panagkokompetensia, ken ditay agiinnapal.”—Galacia 5:26.

Panunotem:

  • Gapu iti social media, ikomkomparam kadi ti bagim iti dadduma?

  •  Mas importante kadi kenka ti adu a follower-mo ngem kadagiti pudno a gagayyem a talaga a mangay-ayat kenka?