Mapan iti linaonna

Mapan iti segundario a pagpilian

Dagiti Saksi ni Jehova

Iloko

SALUDSOD DAGITI AGTUTUBO

Kasanok a Sanguen ti Trahedia?

Kasanok a Sanguen ti Trahedia?

Mapasamak ti trahedia iti asinoman. “Ti lumba awan kadagiti nasiglat, ti gubat awan met kadagidiay mannakabalin,” kuna ti Biblia. “Ti di mapakpakadaan a pasamak mapagteng kadakuada amin.” (Eclesiastes 9:11) Karaman ditoy dagiti agtutubo a naipasango iti trahedia. Ania ti inaramidda? Usigem ti dua a pagarigan.

  • REBEKAH

  • CORDELL

REBEKAH

Nagdiborsio dagiti nagannakko idi agtawenak iti 14.

Ti kunak idi ket saan a nagdiborsio dagiti nagannakko, a kayat la ni tatang ti agmaymaysa. Ay-ayatenna ni nanang—apay koma a panawanna? Apay koma a panawannak?

Diak kayat a mapagsaritaan no ania idi ti mapaspasamak. Kayatkon a lipaten. Marurrurodak, nupay diak idi madmadlaw a kasta ti marikriknak. Idi kuan, mariribukanak unayen, ken diakon makaturturog.

Idi agtawenak iti 19, natay ni nanangko gapu iti kanser. Isu ti kasingedan a gayyemko.

Nagsaem idi nagdiborsio dagiti nagannakko. Ngem nasasaem pay idi natay ni nanang. Diak pay nailiwliwag. Ad-adda manen a marigatanak a maturog ken maburburiboranak pay laeng.

Kabayatanna, adda dagiti nasarakak a makatulong. Kas pagarigan, pakpakdaarannatayo ti Proverbio 18:1 a ditayo isinsina ti bagitayo, isu nga inkagumaak a sinurot dayta.

Kas maysa a Saksi ni Jehova, nagbasaak met kadagiti makaparegta a publikasion a naibatay iti Biblia. Ti maysa a nakatulong kaniak idi nagdiborsio dagiti nagannakko ket ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Ti nangnangruna a malaglagipko ket ti kapitulo iti Tomo 2 a natemaan iti “Mabalinko Kadi ti Agbiag a Naragsak no Agsolsolo ti Nagannak Kaniak?”

Ti Mateo 6:25-34 ti maysa kadagiti paboritok a teksto idi maringgoranak. Iti bersikulo 27, insaludsod ni Jesus: “Siasino kadakayo nga iti panagbalinna a maringgoran manayonanna iti maysa a kasiko * ti kaatiddog ti biagna?”

Mapasamak ti dakes kadatayo amin, ngem naadalko iti ulidan ni nanang a napateg ti panangsangotayo kadagiti kasta a pakaburiboran. Adu dagiti naglasatanna—diborsio sa kalpasanna makapapatay a sakit—ngem positibo latta a sinangona dagita, ken nagtalinaed a natibker ti pammatina iti Dios agingga iti ipapatayna. Diakto malipatan dagiti insurona kaniak maipapan ken Jehova.

Panunotem: Kasano a makatulong kenka ti panagbasa iti Biblia ken kadagiti naibatay iti Biblia a publikasion a mangsango iti trahedia?Salmo 94:19.

CORDELL

Idi agtawenak iti 17, nakitak a napugsat ti anges ni tatang. Ti ipapatayna ti kasaeman a napasamak iti biagko. Napalalo ti ladingitko.

Panagriknak, saan a talaga a natay, ket saan a ni tatangko daydiay naabbongan iti ules. Nakunak iti unegko, ‘Agriingto met la inton bigat.’ Diak ammo idi no ania ti aramidek.

Saksi ni Jehova ti intero a pamiliami ket nagdakkel a tulong kadakami ti kongregasion idi natay ni tatang. Inikkandakami iti kanen, kinadkaduadakami ken didakami binaybay-an—saan laeng nga iti apagbiit no di ket iti napaut a panawen. Para kaniak, ti suportada ket pammaneknek a pudpudno a Kristiano dagiti Saksi ni Jehova.Juan 13:35.

Ti teksto a talaga a nakaparegtaak ket ti 2 Corinto 4:17, 18. Kunana: “Nupay ti rigat ket apagkanito ken nalag-an, pataudenna kadakami ti dayag a naringringbaw pay ti dagsenna ken agnanayon; bayat a pagtalinaedenmi ti matmatami, saan nga iti bambanag a makita, no di ket iti bambanag a di makita. Ta ti bambanag a makita temporarioda, ngem ti bambanag a di makita agnanayonda.”

Dakkel ti epekto kaniak ti maudi a bersikulo. Temporario laeng ti panagsagaba ni tatang, ngem dagiti kari ti Dios iti masanguanan ket agnanayon. Pinagpanunotnak ti ipapatay ni tatang no ania ti rumbeng a pangusarak iti biagko ken masapul a balbaliwak dagiti kalatko.

Panunotem: Kasano a ti trahedia iti biagmo tulongannaka a mangusig manen kadagiti kalatmo iti biag?1 Juan 2:17.

^ par. 14 Ti maysa a kasiko ket katupag ti agarup 45 a sentimetro, wenno agarup 1.5 a pie.