Mapan iti linaonna

Mapan iti segundario a pagpilian

Dagiti Saksi ni Jehova

Iloko

SALUDSOD DAGITI AGTUTUBO

Ania ti Masapul a Maammuak iti Panangi-share iti Picture Online?

Ania ti Masapul a Maammuak iti Panangi-share iti Picture Online?

Agen-enjoy-ka iti bakasionmo, ket kayatmo nga ipadamag dayta kadagiti gagayyemmo! Ngem kasano?

  1. Saggaysa a patulodam ida iti postcard?

  2. Ag-email-ka iti amin a gagayyemmo?

  3. Agi-post-ka kadagiti picture online?

No idi panawen da apongmo, mabalin nga “A” laeng ti pagpilian.

No idi met panawen da Mamang ken Papangmo, posible pay ti “B.”

Ngem ita, adu nga agtutubo ti mangpili iti “C.” Kastaka met kadi? No wen, makatulong daytoy nga artikulo tapno maammuam dagiti masapul a pagannadam.

 Ania dagiti pagimbaganna?

Nagalisto. “No adda nagpintas a nagpasiarak wenno adda bonding-mi nga aggagayyem, mai-share-ko a dagus dagiti picture-mi.”​—Melanie.

Kombiniente. “Nalaklaka ti agkita kadagiti kabaruan a picture nga im-post dagiti gagayyemko ngem iti email tapno ma-update-ak iti mapaspasamak kadakuada.”​—Jordan.

Makatulong tapno kanayon a konektadoka iti dadduma. “Dadduma kadagiti gagayyem ken kapamiliak ti aggigian iti adayo. No kanayonda nga agi-post iti picture ken kanayonak met nga ag-check, kasla inaldaw latta a makitkitak ida!”​—Karen.

 Ania dagiti pagannadam?

Mabalin a maikompromiso ti seguridadmo. No adda geotagging ti kameram, mabalin a makita iti im-post-mo ti eksakto a lokasionmo uray no dimo met inranta. “No agi-post-ka kadagiti retrato wenno sabali pay a banag iti Internet a nakakabil ti eksakto a lokasionmo, mabalin a matuntondaka dagiti tattao a dakes ti motibona nga addaan kadagiti tracking software,” inreport ti website a Digital Trends.

Adda met dagiti kriminal a mas interesado no kaanoka nga awan iti balayyo. Iti maysa a kaso nga inreport ti Digital Trends, nastrek ti tallo nga agtatakaw ti 18 a balay bayat nga awan ti tao. Kasanoda a naammuan nga awan tao? Inobserbaran ken inadalda ti rutina dagiti residente babaen kadagiti post-da iti Internet​—maysa a teknik a maaw-awagan cybercasing​—ket agbalor iti nasurok a $100,000 (U.S.) ti naitarayda.

Mabalin a makakitaka kadagiti di nasayaat. Komporme lattan ti ipo-post ti dadduma ken saanda a mabain uray makita ti intero a lubong. Kuna ti tin-edyer a ni Sarah: “Delikado no ag-browse-ka iti account dagiti tattao a dimo am-ammo. Kaska la magmagna iti dimo kabesado a siudad nga awan ti mapam. Marikriknam nga agturturongkan iti lugar a dimo koma kayat a papanan.”

Dimo mapupuotan a masaysayang ti orasmo. Kuna ti tin-edyer nga agnagan iti Yolanda: “No narugiamon ti agkita kadagiti kaudian a post ken agbasa kadagiti comments, kasla nagrigaten nga isardeng dayta agingga a dandani dimon maidisso ti cellphone-mo iti katse-check no ania ti kabaruan.”

Masapul a kayam a kontrolen ti bagim no adda photo-sharing account-mo

Kasta met la ti kapanunotan ti tin-edyer a ni Samantha. “Masapul a limitarak ti orasko kadagitoy a website,” kinunana. “No kayatmo ti maaddaan iti photo-sharing account, masapul nga ammom a kontrolen ti bagim.”

 Ti mabalinmo nga aramiden

  • Determinadoka koma nga umadayo kadagiti di nasayaat a bambanag. Kuna ti Biblia: “Saankonto nga isaad iti sanguanan dagiti matak ti aniaman a banag nga awan kaes-eskanna [wenno, awan serserbina].”—Salmo 101:3.

    “Kanayonko nga i-check ti post dagiti tattao nga in-follow-k, ken i-unfollow-k ida no makitak a naalas dagiti post-da.”​—Steven.

  • Adaywam dagiti tattao a dimo kapada iti prinsipio. Mabalin ngamin a pakapuyenda ti depensam. Imbaga ti Biblia: “Dikay payaw-awan. Dagiti dakes a pannakitimpuyog [wenno, kakadua] dadaelenda dagiti makagunggona nga ugali.”​—1 Corinto 15:33.

    “Saanmo koma a basta i-follow lattan dagiti photo trend gapu laeng ta sikatda. Kaaduanna a kadagita a makakitaka kadagiti bulgar ken narugit a ladawan.”​—Jessica.

  • Limitaram ti kapaut ti panag-browse-mo ken no mamin-anoka nga agi-post iti picture. Kuna ti Biblia: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo.”​—Efeso 5:​15, 16.

    “In-unfollow-k dagiti tattao a nalabes ti panagi-post-da. Kas pagarigan, mapan iti beach ti maysa, sa agi-post iti 20 a picture a dandani agpapada met amin. Makaibus ngata ti oras nga i-browse amin dagita!”​—Rebekah.

  • Siguraduem a dagiti picture nga i-post-mo ket saan a mangted iti impresion a kasla nakaim-importanteka a tao. Kuna ti mannurat ti Biblia a ni Pablo: “Ibagak iti tunggal maysa kadakayo dita a saanna a panunoten nga ad-adda ti bagina ngem iti rebbengna a panangpanunot.” (Roma 12:3) Dimo ipapan a “mapa-wow” dagiti gagayyemmo kadagiti solo a picture-mo ken kadagiti ar-aramidem.

    “Kasla saan a maum-uma ti dadduma nga agi-post iti selfie-da. No aggayyemta, siempre ammok no ania ti itsuram​—diak kasapulan ti kanayon a mapalagipan!”​—Allison.