Saan nga iparit ti Biblia ti kalkalainganna a panaginum basta ipalubos dayta ti linteg. Ngem iparitna ti panagbartek.​—Salmo 104:15; 1 Corinto 6:10.

 Ngem kasano ngay no pilitendaka nga uminum iti situasion a saan nga ipalubos ti linteg wenno dagiti nagannakmo?

•  Panunotem ti mapasamak kalpasanna

•  Panunotem ti aramidem

•  Ti kuna dagiti padam nga agtutubo

 Mabalin a panunoten ti dadduma a kakaduam a kasapulan ti arak iti panagragragsak. Ngem ania ti mabalin a mapasamak kalpasan ti panaginumyo?

•  Malabsingmo ti linteg. Depende iti lugar a paggigianam, mabalin nga agmultaka, makasuanka, maala ti lisensiam, pagtrabahuendaka iti komunidad, wenno maibaludka pay ketdi no uminumka iti arak ngem saan nga ipalubos ti linteg.—Roma 13:3.

•  Maperdi ti reputasionmo. Dadaelen ti arak ti kinasimbeng ti panunotmo. No nakainumka, mabalin a makaibaga wenno makaaramidka kadagiti banag a mabalin a pagbabawyamto. (Proverbio 23:31-33) Gapu iti social media, mabalin a dakkel ken mabayag ti epekto dagiti ar-aramidem iti reputasionmo.

•  Nalakaka a mabiktima. No nakainumka, mabalin a nalakaka laeng a mabiktima iti panangkabil wenno seksual a pannakaabuso. Al-alistodaka met a maimpluensiaan, a mabalin nga agresulta iti di nasayaat wenno illegal nga aramid.

•  Maadiktoka. Sigun iti dadduma a research, dakdakkel ti posibilidadna a maadikto ti maysa no ubing a nangrugi nga uminum iti arak. No uminumka tapno malabanam ti stress, liday, wenno pannakaboring, mabalin a narigrigatton a maisardengmo ti aginum.

•  Ipapatay. Iti nabiit pay a tawen, maysa ti matay iti kada 52 a minuto idiay United States gapu iti panagmaneho a nakainum. Iti uneg ti lima a tawen, nasurok a 1,500 ti natay nga agtawen iti 21 iti kada tawen gapu iti panagmaneho a nakainum. Uray saanka a nakainum, delikado no makiluganka iti maysa a nakainum.

 Maliklikam dagiti grabe ken nasaem nga epekto ti di umiso a panaginum no panunotem a nasaksakbay ti aramidem.

 Prinsipio ti Biblia: “Nasaldet [wenno, masirib] daydiay nakakita iti didigra ket rugianna ti aglemmeng.” (Proverbio 22:3) Saan a nasayaat ti uminum sakbay nga agmaneho wenno makiramanka iti aktibidad nga agkasapulan iti naan-anay a konsentrasion.

 Ti aramidek: ‘Uminumak laeng no addaakon iti husto nga edad ken iti maitutop a situasion.’

 Prinsipio ti Biblia: ‘Adipennakayo ti pagtultulnoganyo.’ (Roma 6:16) No uminumka gapu laeng ta umin-inum dagiti kakaduam, agpakpakontrolka kadakuada. No met uminumka tapno laeng saanka a maboring wenno tapno malabanam ti stress, ipakpakita dayta a saanmo a sursuruen no kasano a sanguen dagiti problemam.

 Ti aramidek: ‘Diak ipalubos a pilitendak nga uminum dagiti kakaduak.’

 Prinsipio ti Biblia: “Dika makikadua kadagiti nakaro ti panagin-inumna.” (Proverbio 23:20.) Mabalin a dimo masurot ti inkeddengmo nga aramiden no saan a nasayaat dagiti pakikadkaduaam. Isagsagmakmo ti bagim no makikaduaka kadagiti nalabes ti panagin-inumna.

 Ti aramidek: ‘Diak makikadua kadagidiay nalabes ti panagin-inumna.’