Pagmadianna: No managbabainka, masayang ti tsansam a maaddaan kadagiti nagsasayaat a gagayyem ken kapadasan.

 Pagmayatanna: Saan met a kanayon a madi no managbabainka. Ngamin makatulong dayta tapno makapagpanunotka sakbay nga agsaoka ken nalalaingka nga agpaliiw ken dumngeg.

 Ti maaramidam: No managbabainka ita, saanna a kayat a sawen a kanayonen a managbabainka. Mabalin a maksayam dayta ken dagiti negatibo nga epektona. Maammuam iti daytoy nga artikulo no kasano.

•  Sanguem dagiti pakadanagam

•  Padasem dagitoy

•  Ti kuna dagiti padam nga agtutubo

 Sanguem dagiti pakadanagam

 No managbabainka, mabalin a mabutengkan uray no pampanunotem pay laeng ti makisarita iti personal. Panagriknam no kua ket agmaymaysaka, a kasla addaka iti nasipnget a kuarto ket posible a madandanaganka. Ngem no luktam ti silaw, kayatna a sawen, sanguem dagiti pakadanagam, mabalin a makitamto a saan met gayam a masapul a kasta ti mariknam. Kitaem ti tallo kadagitoy.

•   Umuna: “Mabainak a makisarita ta diak ammo ti ibagak.”

   Ti agpayso: Mas matandaanan dagiti tattao ti inaramidmo para kadakuada ngem iti imbagam. Isu a posible a malabanam dayta a pakadanagam no sursuruem ti dumngeg, kayatna a sawen, paginteresam ti ibaga ti dadduma.

   Panunotem: Ania ti kaykayatmo a gayyem—daydiay sao a sao wenno daydiay dumdumngeg?

•   Maikadua: “Baka panunotenda a boring-ak.”

   Ti agpayso: Adda latta nga adda ti maibaga dagiti tattao, managbabainka man wenno saan. Isu a posible a malabanam dayta a pakadanagam ken nasaysayaat pay ti impresionda kenka no bay-am a makitada ti agpayso a kinataom.

   Panunotem: No panagkunam ket negatibo ti panagkitada kenka, saan ngata a baka sika ti negatibo ti opinionna kadakuada ta pampanunotem a saandaka a kayat?

•   Maikatlo: “Maibabainakto laeng no kamali ti maibagak.”

   Ti agpayso: Mapaspasamak dayta iti amin. Isu a posible a malabanam dayta a pakadanagam no ibilangmo dagiti kamalim kas oportunidad tapno maipakitam iti dadduma a saanmo a pampanunoten a perpektoka.

   Panunotem: Saan kadi a kaykayatmo ti makikadua kadagiti tattao a kayada nga aminen a saanda a perpekto?

 Ammom kadi? Pampanunoten ti dadduma a saanda a managbabain ta adu ti kateksda. Ngem dagiti makasaritam iti personal ti nalaklaka nga agbalin a pudno a gagayyemmo. Insurat ti psychologist ken eksperto iti teknolohia a ni Sherry Turkle: “Agbalintayo a nadekdekket iti dadduma no makitkitatayo ida ken no mangmangngegtayo ti bosesda.” a

 Padasem dagitoy

•   Saanka nga agikomkompara. Saan met a kasapulan nga agbalinka a managestoria wenno extrovert. Masapul laeng a kissayam ti kinamanagbabainmo tapno saanka a maikapis kadagiti nagsasayaat a gagayyem ken kapadasan.

   “No makisaritaka, saan a kasapulan nga adu ti maibagam ken saan met a kasapulan a sika ti bida. Iyam-ammom lang ti bagim wenno agsaludsodka lang.”—Alicia.

   Prinsipio ti Biblia: “Sukimaten koma ti tunggal maysa dagiti aramidna tapno addanto panggapuanna nga agrag-o kadagiti aramidna, ken saan a gapu iti panangikomparana iti bagina iti sabali.”—Galacia 6:4.

•   Agobserbarka. Obserbaram dagiti tattao a nalaing a makigayyem ken no kasanoda a makisarita iti dadduma. Ania dagiti nakitam a nasayaat a teknikda? Ania dagiti saan unay nga epektibo? Ania dagiti nasayaat nga abilidadda a kayam a tuladen?

   “Paliiwem dagiti nalaing a makigayyem ken sursuruem a tuladen ida—ti ar-aramidenda, ti ibagbagada, no adda barbaro a maam-ammoda.”—Aaron.

   Prinsipio ti Biblia: “No kasano a ti landok patademenna ti landok, patademen met ti maysa a tao ti gayyemna.”—Proverbio 27:17.

•   Agsaludsodka. Kaaduanna a kaykayat dagiti tattao nga ibaga ti opinionda kadagiti bambanag. Isu a no agsaludsodka, mayat dayta a pangirugim iti saritaan. Saanton a sika ti nakapokusanda.

   “No agsaganaka, saankanto unayen a madanagan. Mabalin pay ketdi a mangpanunotka kadagiti topiko wenno saludsod sakbay a mapanka iti maysa nga okasion, tapno saanka a ma-stress no makisaritaka kadagiti maam-ammom idiay.”—Alana.

   Prinsipio ti Biblia: “Sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:4.