Mapan iti linaonna

SALUDSOD DAGITI AGTUTUBO

Apay a Masapul a Tulongak ti Sabsabali?

Apay a Masapul a Tulongak ti Sabsabali?

 Dua a sekreto a di ammo ti adu

 Sekreto #1: No mangtedka, posible nga adda met maawatmo!

 Madlaw ti tattao no naparaburka isu a mabalin a naparaburda met kenka. Kuna ti Biblia:

  •  “Iyugaliyo ti mangted, ket mangtedto kadakayo dagiti tattao. . . . Ti rukod a pangrukrukodyo, pangrukoddanto met kadakayo.”​—Lucas 6:​38.

 Sekreto #2: No tumulongka, tultulongam met ti bagim!

 No agaramidka iti nasayaat para iti sabsabali, umuneg ti panagraemmo iti bagim ket mariknam ti pannakapnek a resulta ti panangted. Kuna ti Biblia:

  •  “Ad-adu ti kinaragsak iti panangted ngem iti panangawat.”​—Aramid 20:35.

  •  “No mangisaganaka iti padaya, awisem dagiti napanglaw a tattao, lugpi, pilay, bulsek; ket naragsakkanto, agsipud ta awan maisupapakda kenka.”​—Lucas 14:13, 14.

Dagiti manangtulong nga agtutubo

  Adu dagiti manangtulong nga agtutubo! Usigem dagitoy a pagarigan.

 “No dadduma, kayatko laeng koma ti agtugaw ken agbuya iti TV, ngem malagipko da Nanang ken Tatang nga agtrabtrabaho ken nabambannog inton agawidda. Isu a mapanak no kuan aginnaw ken agdalus sa itimplaakto met idan iti kape ta paboritoda dayta. Inton makaawiden ni Nanang, kunana, ‘Wow, nagdalus ti balay! Nagbanglo pay. Pagyamanan Nakkong!’ Kanayon a nasayaat ti riknak no makaaramidak iti nasayaat a kas kadagita para kadagiti nagannakko.”​—Casey.

 “Kanayon a supsuportaran ken ipapaay dagiti nagannakko ti amin a kasapulak. Isu nga idi nadadael ti luganda idi napan a tawen, inikkak ida ti kuarta a pagpatarimaanda, nupay dakkel dayta a naikissay iti urnongko. Siempre, medio nagkedkedda idi damo, ngem impapilitko met. Kurang pay ketdi koma dayta para kadakuada. Nagsayaat ti riknak no naparaburak ken adda maitedko kadakuada.”​—Holly.

 Ammom kadi? Adu nga agtutubo a Saksi ni Jehova ti maragragsakan iti panangtulongda iti sabsabali babaen iti trabahoda a panangisuro iti Biblia. Dadduma kadakuada ti immakar pay ketdi iti sabali a pagilian nga agkasapulan kadagiti mangisuro iti Biblia.

 “Manipud United States, immakarak iti Mexico tapno tumulong iti panangyadal iti Biblia. Nagrigat no dadduma ti agbalin a naparabur iti kuarta ken dadduma pay a banag ta awan met unay a talaga ti maitedko. Ngem napaneknekak a no ipaayko ti panawen ken pigsak iti trabaho a panangisuro iti Biblia, mas maapresiar dayta ngem iti basta panangted iti material a bambanag.”​—Evan.

Kasano a makatulongak?

  Kayatmo kadi ti agbalin a naragsak a resulta ti panangtulongmo iti sabsabali? Adtoy ti sumagmamano a singasing.

 Tapno matulongam ti pamiliam:

  •  Aginnaw, agdalus, wenno agisinopka​—uray didaka ibabaon

  •  Aglutoka

  •  Mangtedka iti kard kas panagyamanmo kadagiti nagannakmo

  •  Tulongam ti kabsatmo iti assignment-na

 Tapno matulongam dagiti am-ammom:

  •  Patulodam iti kard ti maysa a masakit

  •  Dalusam ti arubayan ti nataenganen a kaarrubam

  •  Pasiarem ti maysa a din makapanaw iti pagtaenganna

  •  Regaluam ti am-ammom nga adda nadagsen a problemana

 Singasing: Mabalinmo ti mangpanunot iti dadduma pay a pamay-an. Ita a lawas, pagbalinem a kalat ti tumulong iti maysa a tao. Sigurado a maragsakankanto!

 “Naragsakka no adda dagiti matulongam. Mariknam a talaga nga adda nasayaat a naaramidam, ken makitam nga ap-apresiarenda dayta. Mabalin a na-enjoy-mo pay ketdi nupay saanmo nga impagarup dayta idi damo. Dimo pay ketdi mariknan a nagsakripisioka ta nagadu ti nagunggonam.”​—Alana.