Mapan iti linaonna

Mapan iti segundario a pagpilian

Dagiti Saksi ni Jehova

Iloko

SALUDSOD DAGITI AGTUTUBO

Apay a Masapul nga Agkararagak?

Apay a Masapul nga Agkararagak?

Sigun iti maysa a surbey, 80 a porsiento kadagiti tin-edyer idiay America ti agkarkararag, ngem kagudua laeng kadakuada ti inaldaw a mangar-aramid iti dayta. Sigurado a pampanunoten ti dadduma kadakuada: ‘Ti kadi panagkararag ket maysa laeng a pamay-an a mangpalag-an iti rikna, wenno adda pay naun-uneg a kaipapananna?’

 Ania ti kararag?

Ti kararag ket agpaypayso a pannakisarita iti Namarsua iti amin. Panunotem laengen ti kaipapanan dayta! Iti amin nga aspeto, nangatngato ni Jehova ngem kadagiti tattao, ngem “saan nga adayo iti tunggal maysa kadatayo.” (Aramid 17:27) Ti agpayso, mabasa iti Biblia daytoy a nagsayaat nga awis: “Umasidegkay iti Dios, ket umasidegto met ti Dios kadakayo.”​—Santiago 4:8, Ti Baro a Naimbag a Damag Biblia.

Kasanoka a makaasideg iti Dios?

  • Ti maysa a pamay-an ket panagkararag​—pannakisaritam dayta iti Dios.

  • Ti sabali pay ket panagadal iti Biblia​—“pannakisarita” ti Dios dayta kenka.

Dayta a komunikasion​—panagkararag ken panagadal iti Biblia​—ti tumulong kenka a maaddaan iti natibker a relasion iti Dios.

“Ti pannakisarita ken Jehova​—ti pannakikomunikar iti Kangatuan​—ket maysa kadagiti kadakkelan a pribilehio a mabalin a matagiragsak dagiti tattao.”​—Jeremy.

“No ibagak ken Jehova ti amin nga adda iti pusok, mariknak a nadekdekketak kenkuana.”​—Miranda.

 Dumdumngeg kadi ti Dios?

Uray no mamatika iti Dios​—ken uray no agkarkararagka kenkuana​—mabalin a pagduaduaam no talaga a dumdumngeg isuna. Ngem awagan ti Biblia ni Jehova kas “Managdengngeg iti kararag.” (Salmo 65:2) Aw-awisennaka pay a ‘mangyallatiw kenkuana iti isuamin a pakaringgoram.’ Apay? Gapu ta ‘maseknan kenka,’ wenno ipatpategnaka.​—1 Pedro 5:7.

Panunotem: Regular kadi a makisarsaritaka kadagiti nadekket a gagayyemmo? Kasta koma met ti pannakisaritam iti Dios. Regular nga agkararagka kenkuana, ket usarem ti naganna a Jehova. (Salmo 86:​5-7; 88:9) Ti agpayso, ibagbaga ti Biblia nga ‘agkararagka a di agressat,’ wenno agkararagka a kanayon.​—1 Tesalonica 5:​17.

“No agkarkararagak, makitungtungtongak iti nailangitan nga Amak, ket maibagak amin nga adda iti pusok.”​—Moises.

“Makisarsaritaak ken Jehova maipapan kadagiti serioso a banag, a kas met la no makisarsaritaak ken Mama wenno iti nadekket a gayyemko.”​—Karen.

 Ania ti mabalinko nga ikararag?

Kuna ti Biblia: “Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.”​—Filipos 4:6.

Kayatna kadi a sawen nga okey laeng nga ikararagmo dagiti problemam? Wen! Kinapudnona, kuna ti Biblia: “Ipalladawmo ti dadagsenmo ken Jehova a mismo, ket isu saranayennakanto.”​—Salmo 55:22.

Siempre, no agkararagka iti Dios, saan laeng koma a dagiti problemam ti ibagam. “Saan unay a nasayaat ti panaggayyemmi ken Jehova no dawatak la a dawat iti tulong kenkuana,” kuna ti agtutubo a ni Chantelle. “Para kaniak, masapul a dagiti pagyamyamanak ti umuna nga ibagak, ken masapul nga adu dayta.”

Panunotem: Ania dagiti pagyamyamanam iti biagmo? Makapanunotka kadi iti tallo a banag a pagyamyamanam ken Jehova ita nga aldaw?

“Uray gapu laeng iti simple a banag, kas no adda magustuantayo a napintas a sabong, mabalin a matignaytayo nga agkararag ken Jehova tapno agyaman.”​—Anita.

“Mangpanunotka iti maysa a banag iti panamarsua a pagbilbilibam wenno iti maysa a bersikulo ti Biblia a talaga a nangdanon iti pusom, sa agyamanka ken Jehova gapu iti dayta.”​—Brian.