Mapan iti linaonna

Ania “Dagiti Tulbek ti Pagarian”?

Ania “Dagiti Tulbek ti Pagarian”?

Sungbat ti Biblia

‘Dagiti tulbek ti Pagarian’ irepresentarna ti autoridad a manglukat iti dalan tapno ‘makastrek [dagiti tattao] iti Pagarian ti Dios.’ (Mateo 16:19; Aramid 14:22) * Inted ni Jesus ken Pedro “dagiti tulbek ti pagarian ti langlangit.” Kaipapanan dayta nga inawat ni Pedro ti autoridad a manglukat iti impormasion no kasano a matagiragsak dagiti matalek a tattao ti pribilehio a makastrek iti Pagarian idiay langit babaen ti panangawatda iti nasantuan nga espiritu ti Dios.

Siasino ti nakairantaan dagiti tulbek?

Inusar ni Pedro ti autoridad manipud iti Dios a manglukat iti dalan para iti tallo a grupo tapno makastrekda iti Pagarian:

  1. Dagiti Judio ken dagiti nakomberte a Judio. Kalpasan laeng ti ipapatay ni Jesus, pinaregta ni Pedro dagiti manamati a Judio nga awatenda a ni Jesus ti pinili ti Dios nga agturay iti Pagarian. Insuro kadakuada ni Pedro ti aramidenda tapno maisalakanda. Inlukatna ngarud ti dalan tapno makastrekda iti Pagarian, ket rinibu ti “nangabrasa [wenno, nangawat] iti saona.”​—Aramid 2:​38-​41.

  2. Dagiti Samaritano. Idi agangay, naibaon ni Pedro kadagiti Samaritano. * Nangusar manen iti tulbek ti Pagarian idi “inkararaganda” ken apostol Juan dagiti Samaritano “tapno umawatda iti nasantuan nga espiritu.” (Aramid 8:​14-​17) Dayta ti nanglukat iti dalan kadagiti Samaritano tapno makastrekda iti Pagarian.

  3. Dagiti Gentil. Tallo ket kagudua a tawen kalpasan ti ipapatay ni Jesus, impakita ti Dios ken Pedro nga addaan met iti gundaway dagiti Gentil (saan a Judio) a sumrek iti Pagarian. Gapuna, inusar ni Pedro ti maysa kadagiti tulbek babaen ti panangasabana kadagiti Gentil isu a nailukat kadakuada ti ruangan nga umawat iti nasantuan nga espiritu, agbalin a Kristiano, ken maaddaan iti gundaway nga agbalin a miembro ti Pagarian.​—Aramid 10:30-​35, 44, 45.

Ania ti kaipapanan ti ‘iseserrek iti Pagarian’?

Kinaagpaysuanna, makipagturay ken Jesus idiay langit dagidiay ‘sumrek iti Pagarian.’ Impakpakauna ti Biblia nga ‘agtugawdanto kadagiti trono’ ken “agturayda a kas ar-ari iti daga.”​—Lucas 22:29, 30; Apocalipsis 5:​9, 10.

Di umiso a kapanunotan maipapan kadagiti tulbek ti Pagarian

Di umiso: Ni Pedro ti agdesision no asino ti mapan idiay langit.

Umiso: Ibaga ti Biblia a ni Kristo Jesus, saan a ni Pedro, ti “mangukom kadagiti sibibiag ken kadagiti natay.” (2 Timoteo 4:​1, 8; Juan 5:​22) Kinapudnona, imbaga a mismo ni Pedro a ni Jesus ti “inkeddeng ti Dios nga agbalin nga ukom dagiti sibibiag ken dagiti natay.”​—Aramid 10:34, 42.

Di umiso: Inuray ti langit ni Pedro no kaano nga usarenna dagiti tulbek ti Pagarian.

Umiso: Idi imbaga ni Jesus ti maipapan kadagiti tulbek ti Pagarian, kinunana ken Pedro: “Aniaman nga iparitmo ditoy daga, maiparitto met sadi langit. Ket ti aniaman nga ipalubosmo ditoy daga, maipalubosto met sadi langit.” (Mateo 16:19, Ti Baro a Naimbag a Damag Biblia) Gapu iti dayta, patien ti dadduma a ni Pedro ti agdesdesision idiay langit. Nupay kasta, ipakita dagiti orihinal a Griego a sao a dagiti desision ni Pedro ti sumurot iti desision a naaramid idiay langit saan ket nga isu ti masurot.

Ipakita pay ti Biblia a ni Pedro ket nagpannuray iti langit idi inusarna dagiti tulbek ti Pagarian. Kas pagarigan, sinurotna dagiti instruksion ti Dios idi inusarna ti maikatlo a tulbek.​—Aramid 10:19, 20.

^ par. 3 No dadduma, usaren ti Biblia ti termino a “tulbek” a mangisimbolo iti autoridad ken responsabilidad.​—Isaias 22:20-​22; Apocalipsis 3:​7, 8.

^ par. 7 Naiduma ti relihion dagiti Samaritano iti Judaismo ngem adda dagiti sursuro ken aramidda a naggapu iti Linteg a naited ken Moises.