Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Kasano nga Isuro Dagiti Nagannak ti Annakda Maipapan iti Sekso?

Kasano nga Isuro Dagiti Nagannak ti Annakda Maipapan iti Sekso?

Sungbat ti Biblia

Asino ti rumbeng a mangisuro kadagiti ubbing ti maipapan iti sekso? Imparebbeng ti Biblia dayta a responsabilidad kadagiti nagannak, ken adu kadakuada ti natulongan kadagiti sumaganad a singasing:

  • Dikay mabain. Prangka ti Biblia maipapan iti sekso ken mabagbagi. Kinuna ti Dios iti nasion ti Israel a masapul a maisuro dagita kadagiti “ubbing.” (Deuteronomio 31:12; Levitico 15:2, 16-19) Mabalinyo ti agusar iti nadayaw a sasao a saanyo nga ibilang a nakababain ti sekso wenno pribado a paspaset ti bagi.

  • In-inut ti panangisurom. Imbes a pampaminsanem nga isuro ti maipapan iti sekso no dandanin madanon dagiti annakmo ti kinabaro wenno kinabalasang, in-inut nga isurom dayta no maawatanen ti anakmo.—1 Corinto 13:11.

  • Isurom dagiti moral a pagalagadan. Mabalin nga isuroda kadagiti ubbing idiay eskuelaan ti maipapan iti sekso. Ngem iparparegta ti Biblia kadagiti nagannak nga isuroda dagiti annakda maipapan iti pribado a paspaset ti bagi ken ti umiso a kababalin maipapan iti seks.—Proverbio 5:1-23.

  • Umimdengka iti anakmo. Dika agunget a dagus wenno nalabes ti reaksionmo no agsaludsod ti anakmo maipapan iti sekso. Imbes ketdi, agbalinka a “nasiglat no iti panagdengngeg, nainayad no iti panagsao.”—Santiago 1:19.

No kasanom a salakniban ti anakmo kadagiti mananggundaway

Isurom ti anakmo nga agkedked no maipasango iti mananggundaway

  • Ammuem a mismo. Ammuem no kasano nga agtignay dagiti kadawyan a mananggundaway.—Proverbio 18:15; kitaem ti kapitulo 32 ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 1.

  • Maseknanka iti kasasaad ti anakmo. Dimo basta ipaaywan ti anakmo no dimo ammo a mapagtalkan dayta a tao ken dimo ipalubos a “mabaybay-an” ti anakmo.—Proverbio 29:15.

  • Isurom ti umiso a panagtulnog. Masapul a sursuruen dagiti annak a pagtulnogan dagiti nagannak kadakuada. (Colosas 3:20) Ngem no isurom ti anakmo a kanayon nga agtulnog iti uray asino a nataengan, pagbalinem a biktima ti panangabuso. Mabalin nga isuro dagiti Kristiano a nagannak kadagiti annakda, “No adda mangibaga kenka nga aramidem ti kagura ti Dios, saanmo a tungtungpalen.”—Aramid 5:29.

  • Isurom ti simple a pamay-an ti panagannad. Tulongam ti anakmo no ania ti aramidenna no adda manggundaway kenkuana no awanka. Idemostram iti anakmo no ania ti aramidenna tapno natured a mangibaga iti “Isardengmo, ta no saan ipulongka!” sa pumanaw a dagus. Masapul a “maulit-ulit nga ibagam iti anakmo” ta nalakana laeng a malipatan dayta.—Deuteronomio 6:7, Contemporary English Version.

 

Ammuem ti Ad-adu Pay

Panangisuro iti Annak nga Agbalin a Responsable

Kasano a matulongannaka ti ulidan ni Jesus tapno agbalin a responsable dagiti annakmo?

Kasaritam Dagiti Annakmo Maipapan iti Sekso

Dagiti nagannak nasken a kasaritada dagiti annakda maipapan iti sekso. Ammuem no kasano a pakisaritaan daytoy naselan a topiko.