Makasarakak Kadi iti Makaliwliwa a Sasao iti Biblia?
Sungbat ti Biblia
Wen. (Roma 15:4) Kitaentayo ti dadduma a bersikulo ti Biblia a nangliwliwa iti adu a naipasango kadagiti narigat a situasion ken makapadanag a problema.
Iti daytoy nga artikulo
Narigat a kasasaad
Salmo 23:4: “Uray nakasipsipnget ti pagnaak, awan ti pagbutngak, ta sika ti kaduak.”
Kaipapananna: No ikararagmo iti Dios ti panangiwanwanna ken agtalekka iti Saona, ti Biblia, naturedka a mangsango iti narigat a situasion.
Filipos 4:13: “Ta adda pigsak a mangsango iti amin a banag gapu iti daydiay mangpabpabileg kaniak.”
Kaipapananna: Maikkannaka ti Dios iti pigsa a mangsango iti aniaman a problema.
Ipapatay ti maysa nga ay-ayaten
Eclesiastes 9:10: “Awan ti aramid wenno plano wenno pannakaammo wenno sirib iti Tanem, a papanam.”
Kaipapananna: Saan nga agrigrigat dagidiay natayen, ken saandatayo metten a madangran. Awanen ti puotda.
Aramid 24:15: “Agungarto [dagiti natay].”
Kaipapananna: Kaya ti Dios a biagen manen dagiti natayen nga ay-ayatentayo.
Sobra a pannakakonsiensia
Salmo 86:5: “Ta naimbagka ken sisasaganaka a mangpakawan, O Jehova; a aglaplapusanan ti napudno nga ayatmo kadagiti umaw-awag kenka.”
Kaipapananna: Pakawanen ti Dios dagidiay talaga nga agbabbabawi kadagiti napalabas a kamalida ken determinado a saan a mangulit kadagita.
Salmo 103:12: “No kasano ti kaadayo ti pagsingisingan ti init iti paglennekanna, kasta met ti kaadayo ti nangikabilanna kadagiti basoltayo.”
Kaipapananna: No mangpakawan ti Dios, ipanna dagiti basoltayo iti kaadaywan a mapanunottayo. Saanna nga ulit-uliten nga ibaga dagita kadatayo tapno akusaran wenno dusaennatayo.
Kinaliday
Salmo 31:7: “Nakitam ti panagrigrigatko; ammom ti nakaro a panagladingitko.”
Kaipapananna: Ammo ti Dios ti amin a pakarigatam. Maawatanna ti rikriknam—uray di maawatan dayta ti dadduma.
Salmo 34:18: “Asideg ni Jehova kadagiti nasaktan ti pusoda; isalakanna dagidiay nadudog ti espirituda.”
Kaipapananna: Ikarkari ti Dios a tulongannaka no malidlidayanka. Ikkannaka iti bileg a mangiliwliwag iti saem a marikriknam.
Sakit
Salmo 41:3: “Bayat ti panagsakitna, saranayento ni Jehova iti iddana.”
Kaipapananna: Matulongannaka ti Dios a mangsango iti grabe a sakit babaen ti panangtedna kenka iti natalna a panunot, kasta met iti pigsa, panagibtur, ken sirib tapno makaaramidka kadagiti nasayaat a desision.
Isaias 33:24: “Awanto ti residente a mangibaga: “Masakitak.’”
Kaipapananna: Ikarkari ti Dios ti tiempo a nasayaatton ti salun-at ti amin a tao.
Stress ken panagdanag
Salmo 94:19: “Idi immadu dagiti pakadanagak, liniwliwa ken pinaragsaknak.”
Kaipapananna: No umawagtayo iti Dios no mais-stress-tayo, matulongannatayo nga agtalinaed a kalmado.
1 Pedro 5:7: “Ipalladawyo kenkuana ti amin a pakadanaganyo, ta ipatpategnakayo.”
Kaipapananna: Ammo ti Dios ti amin a pakarigatantayo. Aw-awisennatayo a mangikararag iti amin a problematayo.
Gubat
Salmo 46:9: “Pagsarsardengenna dagiti gubat iti intero a daga.”
Kaipapananna: Dandanin pagpatinggaen ti Pagarian ti Dios ti amin a gubat.
Salmo 37:11, 29: “Dagiti naemma kukuadanto ti daga, ken maragragsakandanto unay iti naruay a talna. . . . Dagiti nalinteg kukuadanto ti daga, ket agyandanto iti dayta iti agnanayon.”
Kaipapananna: Maragsakanto dagiti nasingpet a tattao gapu iti talna ditoy daga iti agnanayon.
Panagdanag maipapan iti masakbayan
Jeremias 29:11: “‘Sigurado nga ammok ti pampanunotek para kadakayo,’ kuna ni Jehova, ‘ikkankayo iti talna, saan a didigra, tapno maaddaankayo iti nasayaat a masakbayan ken namnama.’”
Kaipapananna: Ipasigurado ti Dios kadagiti agserserbi kenkuana nga adda naraniag a masakbayan nga agur-uray kadakuada.
Apocalipsis 21:4: “Punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”
Kaipapananna: Ikarkari ti Dios nga ikkatenna ti amin a kinadakes a makitkitam ken mapadpadasam ita.
a Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?”
Baka Kayatmo Met ti
TI PAGWANAWANAN
Ti Pagsayaatanna no Ammom a Maseknan ti Dios Kenka
Tulongannatayo ti Kasuratan a mangpatibker iti pammatitayo kadagiti nagsayaat a kari ti Dios iti masanguanan.
SUNGBAT DAGITI SALUDSOD MAIPAPAN ITI BIBLIA
Pakabirokak iti Namnama?
Adda mapagtalkan a gubuayan ti namnama a mangpasayaat iti biagmo itan ken makapagtalekka iti masanguanan.
KANAYONAN A TOPIKO
Liwliwa Para Kadagiti Natayan
No adda matay nga ay-ayatentayo, baka mariknatayo a kasla awan ti makaawat kadatayo. Ngem maawatannatayo ti Dios, ken kayatnatayo a tulongan.
NAGPAPATEG A PANNURSURO TI BIBLIA
Apay nga Ipalpalubos ti Dios ti Panagsagaba?
Adu ti agsalsaludsod no apay a napno ti lubong iti gura ken panagsagaba, wenno panagrigrigat. Naglaon ti Biblia iti makapnek ken makaliwliwa a sungbat.
PANNURSURO TI BIBLIA
Padasem ti Panagadal iti Biblia
Padasem ti libre a panagadal iti Biblia nga adda tumulong kenka.