Sungbat ti Biblia

Kuna ti Biblia a ni Satanas a Diablo ket pudpudno a persona. Kas iti nabileg a lider dagiti sindikato, determinado a mangibanag iti pagayatanna babaen ti “ulbod a pagilasinan” ken “panangallilaw.” Iti kinapudnona, kuna ti Biblia a “pagbalbalinenna ti bagina a kasla anghel ti lawag.” (2 Tesalonica 2:9, 10; 2 Corinto 11:14) Mailasintayo nga adda Diablo gapu kadagiti dakes a gapuananna.

Nupay kasta, saan a ti Diablo ti makimbasol iti amin a panagsagaba. Apay a saan? Pinarsua ti Dios dagiti tattao nga addaan iti wayawaya nga agpili no agaramidda iti naimbag wenno dakes. (Josue 24:15) No saan nga umiso ti desisiontayo, apitentayo dagiti dakes a resultana.—Galacia 6:7, 8.