Mapan iti linaonna

Madadaelto Kadi ti Daga?

Madadaelto Kadi ti Daga?

Sungbat ti Biblia

Saan a pulos a madadael, mapuoran, wenno masukatan ti planeta a Daga. Isursuro ti Biblia nga inaramid ti Dios ti daga tapno mapagnaedan iti agnanayon.

  • “Dagiti nalinteg tagikuaendanto ti daga, ket agtaengdanto nga agnanayon iti dayta.”​—Salmo 37:29.

  • “[Ti Dios] imbangonna ti daga kadagiti naipasdek a dissona; saanto a mapagdiwengdiweng dayta agingga iti tiempo a di nakedngan, wenno iti agnanayon.”​—Salmo 104:5.

  • “Ti daga agtaeng iti agnanayon.”​—Eclesiastes 1:4, Ti Biblia.

  • ‘Ti Nangporma iti daga ken ti Nangaramid iti dayta, Daydiay sititibker a nangipasdek iti dayta, saanna a pinarsua a maipaay laeng iti awan kapapay-anna, a binukelna dayta tapno mapagnaedan.’​—Isaias 45:18.

Madadaelto kadi ti daga gapu kadagiti tattao?

Saan nga ipalubos ti Dios nga interamente a dadaelen dagiti tattao ti daga babaen ti polusion, gubat, wenno dadduma pay. Imbes ketdi, ‘dadaelennanto dagidiay mangdaddadael iti daga.’ (Apocalipsis 11:18) Kasano?

Saan a kabaelan a protektaran dagiti gobierno ti tao ti daga. Suktanto ti Dios dagita iti perpekto a Pagarian idiay langit. (Daniel 2:44; Mateo 6:9, 10) Ni Jesu-Kristo nga Anak ti Dios ti agturayto iti dayta a Pagarian. (Isaias 9:6, 7) Idi adda ni Jesus ditoy daga, impakitana a makontrolna dagiti puersa ti nakaparsuaan. (Marcos 4:35-41) Kas Ari ti Pagarian ti Dios, naan-anayton a kontroladona ti daga ken ti amin nga adda iti dayta. Pabaruennanto ti kondision ti daga ket pagbalinenna a kas iti kasasaad idi ti hardin ti Eden.​—Mateo 19:28; Lucas 23:43.

Saan kadi nga isursuro ti Biblia a mapuoranto ti daga?

Saan. Dayta a di umiso a kapanunotan ket gapu iti kamali a pannakaawat iti 2 Pedro 3:7, a kunana: “Naidulin . . . ti daga nga adda ita maipaay iti apuy.” Kitaentayo ti dua a nagpateg a punto tapno maawatantayo dagita a sasao:

  1. Iti Biblia, dagiti termino a “langlangit,” “daga,” ken “apuy” ket adu ti kaipapananna. Kas pagarigan, mabasa iti Genesis 11:1: “Ti intero a daga nagtultuloy nga addaan maymaysa a pagsasao.” Dagiti tattao ti tuktukoyen ti “daga” ditoy.

  2. Ipakita dagiti bersikulo iti aglawlaw ti 2 Pedro 3:7 ti kaipapanan ti langlangit, daga, ken apuy, a mabasa iti dayta. Iti bersikulo 5 ken 6, naipada dayta a pasamak iti Layus idi panawen ni Noe. Nadadael idi ti maysa a nagkauna a lubong ngem saan a napukaw ti daga. Imbes ketdi, dinadael ti Layus dagiti naranggas a tattao, wenno “daga.” (Genesis 6:11) Adda met dinadaelna a langlangit​—dagiti tattao a mangiturturay kadagita a dakes a tattao. Saan ngarud a ti planeta a daga ti nadadael no di ket dagiti dakes a tattao. Naisalakan ni Noe ken ti pamiliana iti pannakadadael dayta a lubong ken nagyanda iti daga kalpasan ti Layus.​—Genesis 8:15-18.

Kas iti dandanum ti Layus, ti pannakadadael, wenno “apuy,” a mabasa iti 2 Pedro 3:7 pukawennanto ti lubong dagiti dakes a tattao, saan a ti planeta a Daga. Inkari ti Dios ti “baro a langlangit ken baro a daga” a sadiay “agtaeng ti kinalinteg.” (2 Pedro 3:13) Ti “baro a daga,” wenno baro a kagimongan dagiti tattao, ket iturayan ti “baro a langlangit,” wenno baro nga agturay​—ti Pagarian ti Dios. Iti panangituray dayta a Pagarian, natalnanton ti daga ken agbalinton a Paraiso.​—Apocalipsis 21:1-4.