Mapan iti linaonna

Dagiti Saksi ni Jehova

Agpili iti lengguahe Iloko

Ania ti Kuna ti Biblia Maipapan iti Tattoo?

Ania ti Kuna ti Biblia Maipapan iti Tattoo?

Sungbat ti Biblia

Naminsan laeng a nadakamat iti Biblia ti tattoo. Kuna ti Levitico 19:28: “Dikay mangikabil iti marka a tato iti bagbagiyo.” Inted ti Dios daytoy a bilin iti Israel tapno maidumada kadagiti kabangibangda a nasion a nangimarka kadagiti kudilda iti nagan wenno simbolo dagiti didiosenda. (Deuteronomio 14:2) Nupay saan nga obligado dagiti Kristiano a mangsurot iti Linteg a naited iti Israel, napateg nga ikabilangan ti prinsipio a ramanen daytoy a linteg.

Rumbeng kadi nga agpa-tattoo dagiti Kristiano?

Makatulong kenka nga agdesision dagitoy a teksto:

  • “Nanakman koma ti panagkawes dagiti babbai.” (1 Timoteo 2:9, Ti Baro a Naimbag a Damag Biblia) Agaplikar dayta a prinsipio kadagiti lallaki ken babbai. Masapul a raementayo ti rikna dagiti sabsabali ken ditay koma mangatrakar iti nalabes nga atension.

  • Adda dagiti agpa-tattoo kas pammaneknek iti kinasiasinoda wenno addaanda iti wayawaya, idinto nga agpa-tattoo met ti dadduma tapno ipakitada nga adda kalinteganda a mangaramid iti kayatda. Nupay kasta, iparparegta ti Biblia kadagiti Kristiano: “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason.” (Roma 12:1) Usarem ti ‘pannakabalinmo nga agrason’ a mangusig no apay a kayatmo ti agpa-tattoo. Gapu kadi ta kayatmo laeng ti sumurot iti uso wenno ipakitam a miembroka ti maysa a grupo? Laglagipem a mabalin nga agbaliwto ti panunotmo ngem ti tattoo ket permanente. Makaaramidka iti umiso a desision no usigem dagiti motibom.—Proverbio 4:7.

  • “Dagiti gakat daydiay nasaet sigurado a mangipaay iti pagsayaatan, ngem tunggal maysa a nadarasudos sigurado nga agturong iti panagkasapulan.” (Proverbio 21:5) Masansan a dinadarasudos a desision ti panagpa-tattoo, ngem agpaut ti epektona iti trabaho ken iti relasiontayo kadagiti sabsabali. Nangina ken naut-ot pay ketdi ti agpaikkat iti tattoo. Ipakita ti surbey—kasta met ti rumangrang-ay a negosio dagiti agik-ikkat iti tattoo—nga adu kadagiti nagpa-tattoo ti agbabbabawi met laeng.