Mapan iti linaonna

Ania ti Kuna ti Biblia Maipapan iti Cremation?

Ania ti Kuna ti Biblia Maipapan iti Cremation?

Sungbat ti Biblia

Awan ti espesipiko nga ibaga ti Biblia maipapan iti cremation. Awan ti direkta a bilin ti Biblia no masapul nga itabon wenno puoran ti bangkay.

Adda dagiti nairekord iti Biblia a matalek nga adipen ti Dios a nangitabon kadagiti minatayda. Kas pagarigan, sinigurado ni Abraham nga adda lugar a pakaitabonan ni Sara a baketna.—Genesis 23:2-20; 49:29-32.

Mabasa met iti Biblia ti maipapan kadagiti matalek a tattao a nangpuor kadagiti natay. Kas pagarigan, idi napapatay iti gubat ni Saul nga ari ti Israel ken ti tallo nga annakna, nagtalinaed ti bangkayda iti teritoria dagiti kalaban ken saan a nasayaat ti inaramidda kadagita. Idi nadamag dayta dagiti matalek nga Israelita a mannakigubat, innalada dagiti bangkayda, pinuoranda, sa intabonda dagiti tulangda. (1 Samuel 31:8-13) Ipakita ti Biblia a maawat dayta a pamay-an ti pannakaasikaso ti bangkay dagidiay a lallaki.—2 Samuel 2:4-6.

Dagiti gagangay a di umiso a kapanunotan maipapan iti cremation

Di umiso: Ti cremation ket saan a panagraem iti bangkay.

Umiso: Kuna ti Biblia a dagiti natay ket agsubli iti tapok—a gagangay a mapasamak no agrupsan ti bangkay. (Genesis 3:19) Papartaken ti cremation dayta a proseso ta agbalin a dapo, wenno tapok ti bangkay.

Di umiso: Idi panawen ti Biblia, dagiti laeng tattao a saan nga anamongan ti Dios ti mapuoran no matay.

Umiso: Napuoran ti bangkay ti dadduma a di matalek a tattao, kas ken Acan ken ti pamiliana. (Josue 7:25) Ngem saan a dayta ti gagangay a maar-aramid. (Deuteronomio 21:22, 23) Kas nadakamat itay, napuoran met ti bangkay ti dadduma a matalek a tattao, kas iti anak ni Ari Saul a ni Jonatan.

Di umiso: Saan a kabaelan ti Dios a pagungaren ti maysa a tao a na-cremate.

Umiso: Kabaelan a pagungaren ti Dios dagiti natay uray naitabon, na-cremate, adda iti baybay, wenno kinnan dagiti atap nga animal. (Apocalipsis 20:13) Nalaka laeng para iti Mannakabalin-amin ti agaramid iti baro a bagi ti tao.—1 Corinto 15:35, 38.