Sungbat ti Biblia

Masansan a literal ti kaipapanan ti numero iti Biblia ngem no dadduma nausar dayta kas simbolo. Gagangay nga ipakita ti konteksto no ti numero ket nausar a simbolo. Usigem dagitoy a pagarigan iti simboliko a kaipapanan dagiti numero a nausar iti Biblia:

  • 1 Panagkaykaysa. Kas pagarigan, inkararag ni Jesus iti Dios a dagiti adalanna ket “maymaysada koma amin, a kas kenka, Ama, naikaykaysaka kaniak ket naikaykaysaak kenka.”—Juan 17:21; Mateo 19:6.

  • 2 Iti legal a kasasaad, dua a saksi ti mangpatalged a pudno ti maysa a banag. (Deuteronomio 17:6) Kasta met, ti pannakaulit ti maysa a sirmata wenno sasao patalgedanna a sigurado ken pudno dayta. Kas pagarigan, idi imbaga ni Jose ti kaipapanan ti tagtagainep ni Faraon ti Egipto, kinunana: “Ti kinapudno a ti tagtagainep naulit ken Faraon iti namindua kaipapananna a ti banag naipasdek a sititibker iti biang ti pudno a Dios.” (Genesis 41:32) Iti maysa a padto, ti “dua a sara” irepresentarna ti dua a turay, ti Imperio ti Medo-Persia a tinukoy ni propeta Daniel.Daniel 8:20, 21; Apocalipsis 13:11.

  • 3 No kasano a paneknekan ti tallo a saksi a pudno ti maysa a banag, ti namitlo a pannakaulit patalgedanna wenno ipaganetgetna dayta.Ezequiel 21:27; Aramid 10:9-16; Apocalipsis 4:8; 8:13.

  • 4 Irepresentar daytoy ti kompleto a langa wenno naan-anay a pannakatungpal, kas iti sasao nga “uppat a suli ti daga.”Apocalipsis 7:1; 21:16; Isaias 11:12.

  • 6 Gapu ta kurang ti maysa tapno agbalin a pito, a masansan a mangirepresentar iti kompleto, ti innem irepresentarna ti saan a kompleto wenno imperpekto wenno nainaig kadagiti kabusor ti Dios.1 Cronicas 20:6; Daniel 3:1; Apocalipsis 13:18.

  • 7 Masansan nga irepresentar daytoy a numero ti kinakompleto. Kas pagarigan, binilin ti Dios dagiti Israelita a likmutenda ti Jerico iti pito nga agsasaruno nga aldaw ken mamimpito a likmutenda dayta iti maikapito nga aldaw. (Josue 6:15) Naglaon ti Biblia iti adu nga umasping a pagarigan ti kasta a pannakausar ti bilang a pito. (Levitico 4:6; 25:8; 26:18; Salmo 119:164; Apocalipsis 1:20; 13:1; 17:10) Idi kinuna ni Jesus ken Pedro a masapul a pakawanenna ti kabsatna “saan nga, Agingga iti mamimpito, no di ket, Agingga iti mamimpitopulo ket pito,” ti pannakaulit ti bilang a “pito” kaipapananna a “naan-anay.”—Mateo 18:21, 22.

  • 10 Daytoy a numero irepresentarna ti pakabuklan wenno pakadagupan ti maysa a banag.Exodo 34:28; Lucas 19:13; Apocalipsis 2:10.

  • 12 Daytoy a numero irepresentarna ti kompleto nga urnos ti Dios. Kas pagarigan, ti nasirmata ni Juan maipapan iti kasasaad idiay langit ket karamanna ti maysa a siudad nga addaan iti “sangapulo ket dua a pamuon a bato, ket kadakuada adda ti sangapulo ket dua a nagan ti sangapulo ket dua nga apostol.” (Apocalipsis 21:14; Genesis 49:28) Kasta met laeng ti kaipapanan ti napamin-adu a 12.Apocalipsis 4:4; 7:4-8.

  • 40 Ti dadduma a panangukom wenno panangdusa ket nainaig iti numero a 40.Genesis 7:4; Ezequiel 29:11, 12.

Numerology ken gematria

Dagitoy a simboliko a kaipapanan dagiti numero iti Biblia ket naiduma iti numerology, a ramanenna ti espiritismo tapno maammuan ti kaipapanan dagiti numero, ti kombinasionda, ken ti pakadagupanda. Kas pagarigan, dagiti Judio a Cabalist inadalda ti Hebreo a Kasuratan nga inusarda ti gematria, a nagsapulda iti nalimed a kayulogan ti numero a katupag dagiti letra. Ti numerology ket maysa a kita ti panagpadles a kondenaren ti Dios.Deuteronomio 18:10-12.