Mapan iti linaonna

Mapan iti segundario a pagpilian

Dagiti Saksi ni Jehova

Iloko

Kaano a Naisurat Dagiti Salaysay Maipapan ken ni Jesus?

Kaano a Naisurat Dagiti Salaysay Maipapan ken ni Jesus?

Sungbat ti Biblia

Iti salaysayna mainaig iti biag ni Jesus, kastoy ti insurat ni apostol Juan: “Ti nakakita iti dayta sinaksianna, ket ti pangsaksina pudno, ket dayta a tao ammona nga ibagbagana ti pudno a bambanag, tapno mamatikayo met.”—Juan 19:35.

Ti maysa a rason a mapagtalkan dagiti salaysay ti Ebanghelio nga insurat da Mateo, Marcos, Lucas, ken Juan ket naisurat dagita bayat a sibibiag pay laeng dagiti nakakita kadagiti pasamak nga insalaysayda. Sigun iti sumagmamano a reperensia, naisurat ti Ebanghelio ni Mateo idi 41 C.E., walo a tawen kalpasan ti ipapatay ni Kristo. Adu nga eskolar ti mangipapan a naladladaw ti pannakaisurat dagita, ngem kuna ti kaaduan a naisurat ti amin a libro ti Kristiano a Griego a Kasuratan kabayatan ti umuna a siglo C.E.

Dagiti tattao a nakakita ken ni Jesus idi adda pay laeng ditoy daga nasaksianda ti ipapatay ken panagungarna isu a mapasingkedanda dagiti salaysay ti Ebanghelio. Nalakada met a maibutaktak no adda aniaman a di umiso nga impormasion. Kuna ni Propesor F. F. Bruce: “Ti maysa kadagiti nagsayaat a wagas a panangipatalged dagiti apostol a pudno ti ikaskasabada ket ti panangdakamatda iti banag nga ammo met dagiti agdengdengngeg; saanda la a basta ibaga, ‘Saksikami kadagitoy a banag,’ no di ket, ‘kas iti pagaammoyo a mismo’ (Aramid 2:22).