Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Iyaay ti Kristo—Ania Dayta?

Iyaay ti Kristo—Ania Dayta?

Sungbat ti Biblia

Adu ti ibagbaga ti Kasuratan maipapan iti masanguanan inton umay ti Kristo tapno ukomenna dagiti tattao iti daga. * Kas pagarigan, kuna ti Mateo 25:31-33:

“Inton ti Anak ti tao [ni Jesu-Kristo] dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket amin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding. Ket ikabilnanto dagiti karnero iti makannawanna, ngem dagiti kalding iti makannigidna.”

Daytoy a tiempo ti panangukom ket pasetto ti “dakkel a rigat” nga awan ti kapadana iti pakasaritaan ti tao. Dayta a rigat ket agpatingganto iti gubat ti Armagedon. (Mateo 24:21; Apocalipsis 16:16) Dagiti kabusor ti Kristo, a nadeskribir iti ilustrasionna kas kalding, “agpasardanto iti pannakaukom a dusa nga agnanayon a pannakadadael.” (2 Tesalonica 1:9; Apocalipsis 19:11, 15) Iti kasumbangirna, dagiti matalek nga adipenna, dagiti karnero, ket mangnamnama iti “agnanayon a biag.”—Mateo 25:46.

Kaano ti iyaay ti Kristo?

Kinuna ni Jesus: “Maipapan iti dayta nga aldaw ken oras awan ti asinoman a makaammo.” (Mateo 24:36, 42; 25:13) Nupay kasta, dineskribirna ti makita ken ragup a “pagilasinan” a mangipabigbig iti periodo nga agturong iti iyaayna.—Mateo 24:3, 7-14; Lucas 21:10, 11.

Umay kadi ti Kristo nga addaan iti bagi nga espiritu wenno silalasag?

Napagungar ni Jesus iti espiritu a bagi, isu nga umay kas espiritu, saan a silalasag. (1 Corinto 15:45; 1 Pedro 3:18) Gapu iti daytoy a rason, naibaga ni Jesus kadagiti apostolna iti aldaw sakbay ti ipapatayna: “Apagbiit laengen ket ti lubong saannakton a makita.”—Juan 14:19.

Dagiti di umiso a kapanunotan maipapan iti iyaay ti Kristo

Di umiso a kapanunotan: Ti panangibaga ti Biblia a makitanto dagiti tattao ni Jesus nga “um-umay kadagiti ulep,” kayatna a sawen a makitanto ti iyaay ni Jesus.—Mateo 24:30.

Umiso: No madakamat dagiti ulep iti Biblia, masansan a tumukoy iti banag a saan a makita. (Levitico 16:2; Numeros 11:25; Deuteronomio 33:26) Kas pagarigan, kuna ti Dios ken ni Moises: “Umayak kenka iti nasipnget nga ulep.” (Exodo 19:9) Saan a literal a nakita ni Moises ti Dios. Iti umasping a pamay-an, ti Kristo ket ‘umay iti ulep’ gapu ta matarusan dagiti tattao ti iyaayna nupay saanda a literal a makita.

Di umiso a kapanunotan: Dagiti sasao a “makitanto ti tunggal mata,” a nadakamat iti Apocalipsis 1:7 maipapan iti iyaay ti Kristo, ket literal ti kaipapananna.

Umiso: No dadduma, dagiti Griego a sasao iti Biblia para iti “mata” ken “panagkita” ket nausar mainaig iti panangilasin wenno panangtarus imbes a tumukoy iti literal a panagkita. * (Mateo 13:15; Lucas 19:42; Roma 15:21; Efeso 1:18) Kuna ti Biblia a ti napagungar a ni Jesus ket “daydiay kakaisuna . . . nga agnanaed iti di maasitgan a lawag, nga awan maysa kadagiti tattao ti . . . mabalin a makakita.” (1 Timoteo 6:16) Gapuna, “makitanto ti tunggal mata” gapu ta maawatanton ti amin a tattao a ni Jesus daydiay mangibanag iti panangukom ti Dios.—Mateo 24:30.

Di umiso a kapanunotan: Ipakita dagiti sasao iti 2 Juan 7 nga umay ni Jesus a silalasag.

Umiso: Kuna dayta a bersikulo ti Biblia: “Adu a manangallilaw ti nakastrek ditoy lubong, tattao a saan a mangipudpudno ken Jesu-Kristo kas immay a naglasag.”

Idi kaaldawan ni apostol Juan, adda dagiti saan a mamati nga immay ni Jesus ditoy daga kas tao, nga addaan iti lasag a bagi. Maawaganda iti Gnostiko. Naisurat ti 2 Juan 7 a mangpaneknek a saan nga umiso ti patpatienda.

^ par. 3 Nupay adu ti mangus-usar iti termino a “maikadua nga iyaay” wenno “maikadua nga idadateng” kas pangtukoy iti iyaay ti Kristo, dagita a termino ket awan iti Biblia.

^ par. 14 Kitaem ti The New Thayer’s Greek-English Lexicon of the New Testament (1981), panid 451 ken 470.

Ammuem ti Ad-adu Pay

Ania ti Pagarian ti Dios?

Ammuem no apay a nasaysayaat ti gobierno ti Dios ngem iti amin a gobierno.

Agbibiagtayo Kadin Kadagiti “Maudi nga Aldaw”?

Ammuem no kasano a dagiti aramid ken kababalin dagiti tattao paneknekanna nga agbibiagtayo kadagiti “maudi nga aldaw” a naipadto iti Biblia.