Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Ania ti Eskarlata ti Kolorna nga Atap nga Animal iti Apocalipsis Kapitulo 17?

Ania ti Eskarlata ti Kolorna nga Atap nga Animal iti Apocalipsis Kapitulo 17?

Sungbat ti Biblia

Ti nadeskribir iti Apocalipsis kapitulo 17 nga eskarlata, wenno nalabaga, ti kolorna nga atap nga animal iladawanna ti organisasion a ti panggepna ket mamagkaykaysa ken mangirepresentar kadagiti nasion iti lubong. Damo a nagparang daytoy kas League of Nations, nga itan isu ti United Nations.

Dagiti pakabigbigan ti eskarlata, wenno nalabaga, ti kolorna nga atap nga animal

  1. Napolitikaan nga organisasion. Ti nalabaga ti kolorna nga atap nga animal ket addaan iti “pito nga ulo” a naibaga a mangirepresentar iti “pito a bantay” ken “pito nga ar-ari,” wenno nabileg nga agtuturay. (Apocalipsis 17:9, 10) Nausar iti Biblia dagiti bantay ken atap nga animal a mangisimbolo kadagiti gobierno.Jeremias 51:24, 25; Daniel 2:44, 45; 7:17, 23.

  2. Kapadpada ti sangalubongan a napolitikaan a sistema. Ti nalabaga ti kolorna nga animal ket kalanglanga ti pito ti ulona nga atap nga animal iti Apocalipsis kapitulo 13, a mangirepresentar iti sangalubongan a napolitikaan a sistema. Agpada nga addaan dagitoy nga atap nga animal iti pito nga ulo, sangapulo a sara, ken natabbaaw a nagnagan. (Apocalipsis 13:1; 17:3) Saan laeng a naiparparna dagitoy a panagpada. Ti nalabaga ti kolorna nga atap nga animal ket maysa a ladawan, wenno kapadpada, ti sangalubongan a napolitikaan a sistema.Apocalipsis 13:15.

  3. Agtataud ti bilegna iti dadduma a turay. Ti nalabaga ti kolorna nga atap nga animal ket “agtaud manipud,” wenno utangna ti kaaddana, kadagiti dadduma nga agtuturay.Apocalipsis 17:11, 17.

  4. Adda koneksionna iti relihion. Ti Babilonia a Dakkel, a buklen ti amin a palso a relihion iti lubong, ket nakatugaw iti nalabaga ti kolorna nga atap nga animal. Ipakita dayta a dagiti grupo ti relihion im-impluensiaanda ti atap nga animal.—Apocalipsis 17:3-5.

  5. Awan panangpadayawna iti Dios. Ti atap nga animal ket “napno iti natabbaaw a nagnagan.”—Apocalipsis 17:3.

  6. Temporario nga awan naaramidanna. Adda tiempo a ti nalabaga ti kolorna nga atap nga animal ket adda iti “mangliwengliweng,” * wenno awan maaramidanna, ngem rimmuar manen.—Apocalipsis 17:8.

Natungpal ti padto ti Biblia

Usigen no kasano a ti United Nations ken ti sinuktanna a League of Nations ket kaitungpalan ti padto iti Biblia mainaig iti nalabaga ti kolorna nga atap nga animal.

  1. Napolitikaan nga organisasion. Supsuportaran ti United Nations ti napolitikaan a sistema babaen ti panangitandudona iti “panagpapada a bileg ti amin a Miembrona.” *

  2. Kapadpada ti sangalubongan a napolitikaan a sistema. Idi 2011, nainayon iti United Nations ti maika-193 a miembrona. Gapuna, bigbigen daytoy nga isu ti mangirepresentar iti kaaduan a nasion ken tattao iti lubong.

  3. Agtataud ti bilegna iti dadduma a turay. Dagiti nasion a miembro daytoy ti mangbibiag iti United Nations ken nakadepende laeng ti bileg ken autoridadna sigun iti ipapaay dagiti miembrona.

  4. Adda koneksionna iti relihion. Ti League of Nations ken ti United Nations ket agpada nga immawat iti suporta kadagiti relihion ti lubong. *

  5. Awan panangpadayawna iti Dios. Naipasdek ti United Nations “tapno mataginayon ti sangalubongan a talna ken talged.” * Nupay kasla nasayaat daytoy a panggep, kinaagpaysuanna, awan panangpadayaw ti UN iti Dios babaen ti panangibagana nga isu ti mangitungpal iti banag a ti laeng Pagarian ti Dios ti makaaramid.Salmo 46:9; Daniel 2:44.

  6. Temporario nga awan naaramidanna. Ti League of Nations, a nabuangay kalpasan la unay ti Gubat Sangalubongan I a mangtaginayon iti talna, ket dina nabaelan a lapdan dagiti panaglalaban dagiti pagilian. Nagsardeng ti panagandarna idi nangrugi ti Gubat Sangalubongan II idi 1939. Apaman a nagpatingga ti Gubat Sangalubongan II idi 1945, nabuangay ti United Nations. Dagiti panggep, pamay-an, ken pakabuklanna ket kapadpada la unay ti League of Nations.

^ par. 10 Sigun iti Vine’s Expository Dictionary of Old and New Testament Words, ti Griego a sao a naipatarus a “mangliwengliweng” ket tumukoy iti “di matukod a kauneg.” Impatarus ti King James Version dayta a sao kas “awan patingga ti kaunegna nga abut.” Iti Biblia, tumukoy dayta iti maysa a lugar wenno kasasaad a pannakaipupok ken naan-anay nga awan maaramidan.

^ par. 13 Kitaen ti Artikulo 2 iti Karta ti United Nations.

^ par. 16 Kas pagarigan, maysa a konsilio a mangibagi iti adu a denominasion ti Protestante idiay America ti nangideklara idi 1918 a ti League ket isu “ti napolitikaan a pannakabagi ti pagarian ti Dios ditoy daga.” Idi 1965, nagtataripnong dagiti pannakabagi ti Budismo, Katoliko, Eastern Orthodox, Hindu, Islam, Judaismo, ken Protestante idiay San Francisco tapno suportaran ken ikararaganda ti United Nations. Ken idi 1979, inyebkas ni Pope John Paul II ti panagtalekna a ti UN ket “agtalinaed a katan-okan nga organisasion para iti talna ken hustisia.”

^ par. 17 Kitaen ti Artikulo 1 iti Karta ti United Nations.

Ammuem ti Ad-adu Pay

Apay a Saan a Makiramraman iti Politika Dagiti Saksi ni Jehova?

Pangta kadi ida iti seguridad ti pagilian?

Maaddaantayto Kadi iti Maysa a Gobierno a Mangituray iti Intero a Lubong?

Panunotem ti talna ken talged nga iyeg ti maysa a gobierno a mangituray iti intero a lubong. Apay a mamatitayo iti kari ti Dios a mangipaay iti kasta a gobierno? Asino ti kasayaatan nga agturay?