Mapan iti linaonna

Ania ti Kuna ti Biblia Maipapan ken Birhen Maria?

Ania ti Kuna ti Biblia Maipapan ken Birhen Maria?

 Sungbat ti Biblia

Kuna ti Biblia a naaddaan ni Maria, nga ina ni Jesus, iti nagpaiduma a pribilehio a mangyanak kenkuana uray no birhen pay laeng. Impakpakauna ti Biblia daytoy a milagro iti libro nga Isaias ken naisurat ti pannakatungpalna iti Ebanghelio ni Mateo ken Lucas.

Iti padto maipapan iti pannakayanak ti Mesias, impakpakauna ni Isaias: “Agsikogto ti maysa a balasang ken mangyanak iti lalaki.” (Isaias 7:​14) Babaen ti panangiwanwan ti Dios, ti mannurat iti Ebanghelio a ni Mateo inyaplikarna ti padto ni Isaias iti panangisikog ni Maria ken ni Jesus. Kalpasan nga imbaga ni Mateo a simimilagro a nagsikog ni Maria, imbagana: “Naaramid amin dagitoy tapno matungpal ti imbaga ni Jehova babaen ti propetana: ‘Agsikogto ti birhen * ken mangyanak iti lalaki, ket panaganandanto iti Immanuel,’ a kayatna a sawen, ‘Adda Kadatayo ti Dios.’”​—Mateo 1:​22, 23.

Imbaga met ti mannurat iti Ebanghelio a ni Lucas ti simimilagro a panagsikog ni Maria. Insuratna nga imbaon ti Dios ni anghel Gabriel “iti maysa a birhen a naikari a mayasawa iti lalaki nga agnagan Jose, iti pamilia ni David. Maria ti nagan ti balasang.” (Lucas 1:​26, 27) Imbaga a mismo ni Maria nga isu ket maysa a birhen. Kalpasan a naibaga ken Maria nga isu ket agbalin nga ina ni Jesus, ti Mesias, insaludsodna: “Kasano a mapasamak daytoy idinto ta saannak a makidendenna iti lalaki?”​—Lucas 1:34.

 Kasano a makaipasngay ti maysa a birhen?

Nagsikog ni Maria babaen ti nasantuan nga espiritu, nga aktibo a puersa ti Dios. (Mateo 1:​18) Naibaga ken Maria: “Addanto kenka ti nasantuan nga espiritu, ket salaknibannakanto ti pannakabalin ti Kangatuan. Gapu iti dayta, ti mayanak nga ubing ket maawaganto iti nasantuan, Anak ti Dios.” * (Lucas 1:​35) Simimilagro nga inyakar ti Dios ti biag ti Anakna iti aanakan ni Maria isu a nagsikog.

 Ania ti panggep ti panagpasngay ti maysa a birhen?

Inusar ti Dios ti panagpasngay ti maysa a birhen tapno maaddaan ni Jesus iti perpekto a bagi ti tao ket maisalakanna ti amin a tao iti basol ken ipapatay. (Juan 3:16; Hebreo 10:5) Inyakar ti Dios ti biag ni Jesus iti aanakan ni Maria. Kalpasanna, nalawag a prinotektaran ti nasantuan nga espiritu ti Dios ti maisiksikog nga ubing tapno saan nga agbalin nga imperpekto.—Lucas 1:35.

Nayanak ngarud a perpekto ni Jesus, kas iti biag ni Adan sakbay a nagbasol. Ibaga ti Biblia maipapan ken Jesus: “Saan a nagbasol.” (1 Pedro 2:​22) Kas perpekto a tao, kabaelan ni Jesus a subboten ti amin a tao iti basol ken ipapatay.​—1 Corinto 15:21, 22; 1 Timoteo 2:5, 6.

 Nagtalinaed kadi a birhen ni Maria?

Saan nga isursuro ti Biblia a nagtalinaed a birhen ni Maria iti intero a biagna. Imbes ketdi, ipakitana a naaddaan pay ni Maria iti annak.​—Mateo 12:46; Marcos 6:3; Lucas 2:7; Juan 7:5.

Isursuro ti Biblia a naaddaan ni Jesus iti kakabsat

 Ti kadi panangipasngay ti maysa a birhen ken ni Jesus ket ti “Immaculada Concepcion”?

Saan. Sigun iti New Catholic Encyclopedia, ti doktrina ti Immaculada Concepcion ket “ti panamati a ni Birhen Maria ket saan a naaddaan iti ORIHINAL A BASOL sipud pay idi nayanak wenno idi naisikog. Natawid ti amin a tao ti basol . . . Ngem gapu iti nagpaiduma nga ASI, saan a natawid ni Maria ti orihinal a basol.” *

Maikontra iti dayta, saan nga isursuro ti Biblia a saan a natawid ni Maria ti orihinal a basol. (Salmo 51:5; Roma 5:​12) Kinapudnona, nangted ni Maria iti ebidensia nga isu ket managbasol idi nangipaay iti daton a mangabbong iti basol nga indawat ti Mosaiko a Linteg kadagiti inna. (Levitico 12:2-8; Lucas 2:​21-24) Kuna ti New Catholic Encyclopedia: “Saan a nabatad nga isursuro ti Kasuratan ti maipapan iti Immaculada Concepcion . . . [Daytoy] ket pannursuro ti Simbaan.”

 Ania ti pangibilangantayo ken Maria?

Nangipaay ni Maria iti nasayaat nga ulidan ti pammati, panagtulnog, kinapakumbaba, ken nauneg a panagayat iti Dios. Isu ket maysa kadagiti matalek a tattao a nasayaat a tuladentayo.​—Hebreo 6:12.

Ngem uray no naaddaan iti nagpaiduma nga akem kas ina ni Jesus, saan nga isursuro ti Biblia a masapul nga agdaydayaw wenno agkararagtayo ken Maria. Saan a nangipakita ni Jesus iti espesial a panangidayaw iti inana, ken saanna met nga imbaga kadagiti adalanna nga aramidenda ti kasta. Kinapudnona, malaksid iti pannakadakamatna iti salaysay dagiti Ebanghelio ken ti naminsan a pannakadakamatna iti libro nga Aramid, saan a nadakamat ni Maria iti sabali pay a 22 a libro iti maaw-awagan a Baro a Tulag.​—Aramid 1:14.

Awan ti mabasa iti Kasuratan a naikkan ni Maria iti espesial nga atension wenno intan-ok pay ketdi dagiti Kristiano idi umuna a siglo. Imbes ketdi, isursuro ti Biblia a ti Dios laeng ti masapul a pagdaydayawan dagiti Kristiano.​—Mateo 4:​10.

^ par. 10 Ti Hebreo a sao a naipatarus kas “balasang” iti padto ni Isaias ket ʽal·mahʹ, a mabalin a tumukoy iti birhen wenno saan a birhen a babai. Ngem babaen ti panangiwanwan ti Dios, inusar ni Mateo ti mas espesipiko a Griego a sao a par·theʹnos, kayatna a sawen “birhen.”

^ par. 13 Saan a kayat nga usaren ti dadduma ti termino nga “Anak ti Dios” ta patienda a ti kayat a sawen dayta ket naaddaan iti seksual a relasion ti Dios iti maysa a babai. Ngem saan a kasta ti isursuro ti Kasuratan. Imbes ketdi, inawagan ti Biblia ni Jesus kas “Anak ti Dios” ken “ti inauna iti amin a parsua” ta isu ti immuna ken kakaisuna a direkta a pinarsua ti Dios. (Colosas 1:​13-​15) Inawagan met ti Biblia ti umuna a tao a ni Adan kas “anak ti Dios.” (Lucas 3:38) Ngamin, ni Adan ket pinarsua ti Dios.

^ par. 20 Second Edition, Volume 7, panid 331.