Sungbat ti Biblia

 Impakpakauna ti Biblia nga iti maudi nga al-aldaw addanto dagiti makapapatay a sakit (nasaknap a saksakit, agraman dagiti pandemic). (Lucas 21:11) Dagitoy a pandemic ket saan a pannusa manipud iti Dios. Kinapudnona, asidegen a pagpatinggaen ti Dios babaen ti Pagarianna ti amin a problema iti salun-at, agraman dagiti pandemic.

•  Impakpakauna kadi ti Biblia dagiti pandemic?

•  Nangdusa kadi ti Dios kadagiti tattao babaen iti sakit?

•  Dusdusaen kadi ti Dios ita dagiti tattao babaen kadagiti pandemic?

•  Mapukawto ngata dagiti pandemic?

•  Dagiti bersikulo iti Biblia maipapan iti sakit

 Impakpakauna kadi ti Biblia dagiti pandemic?

 Awan ti espesipiko nga impakpakauna ti Biblia a pandemic wenno saksakit kas iti COVID-19, AIDS, wenno ti Spanish flu. Ngem impakpakaunana dagiti “makapapatay a saksakit” ken dagiti “makapapatay a didigra.” (Lucas 21:11; Apocalipsis 6:8) Dagitoy a pasamak ket paset ti seniales ti “maudi nga al-aldaw,” a maawagan met kas “ti panungpalan daytoy a sistema ti bambanag.”—2 Timoteo 3:1; Mateo 24:3.

 Nangdusa kadi ti Dios kadagiti tattao babaen iti sakit?

 Ibaga ti Biblia nga adda sumagmamano a gundaway a dinusa ti Dios dagiti tattao babaen ti sakit. Kas pagarigan, pinagsakitna ti dadduma iti kukutel (leprosy). (Numeros 12:1-16; 2 Ar-ari 5:20-27; 2 Cronicas 26:16-21) Ngem dagitoy a pasamak ket saan a kas kadagiti pandemic nga uray dagiti inosente a tattao ket makaptan. Imbes ketdi, dagitoy ket espesipiko a panangdusa ti Dios kadagiti tattao a nalawag a nagrebelde kenkuana.

 Dusdusaen kadi ti Dios ita dagiti tattao babaen kadagiti pandemic?

 Saan. Ibagbaga ti dadduma a tattao nga us-usaren ti Dios dagiti pandemic ken ti dadduma a sakit a mangdusa kadagiti tattao ita. Ngem saan a kasta ti ibaga ti Biblia. Apay a saan?

 Ngamin, nagsakit met uray ti dadduma nga agdaydayaw iti Dios—idi ken ita. Kas pagarigan, ti matalek a lalaki a ni Timoteo ket ‘masansan idi nga agsakit.’ (1 Timoteo 5:23) Ngem saan nga ibaga ti Biblia a dayta ket pakakitaan nga awan ti pabor ti Dios kenkuana. Kasta met ita, agsakit met wenno maakaran iti sakit ti dadduma a matalek nga adipen ti Dios. Masansan a dagitoy nga indibidual ket biktima laeng iti di ninamnama a pasamak.—Eclesiastes 9:11.

 Maysa pay, isursuro ti Biblia a saan pay nga ita ti oras a panangdusa ti Dios kadagiti dakes a tattao, no di ket agbibiagtayo iti “aldaw ti pannakaisalakan.” Iti daytoy a tiempo, aw-awisen ti Dios ti amin a tattao nga umasideg kenkuana tapno maisalakanda. (2 Corinto 6:2) Ti maysa a pamay-an nga aw-awisenna dagiti tattao ket babaen ti sangalubongan a trabaho a panangikasaba iti positibo a mensahe—ti “naimbag a damag maipapan iti Pagarian.”—Mateo 24:14.

 Mapukawto ngata dagiti pandemic?

 Wen. Ipakpakauna ti Biblia a dandanin ti tiempo nga awanton ti agsakit. Inton agturay ti Pagarian ti Dios, agasannanto ti amin a sakit. (Isaias 33:24; 35:5, 6) Ikkatennanto ti panagrigrigat, ut-ot, ken ipapatay. (Apocalipsis 21:4) Ken pagbiagennanto manen dagiti natay ket maaddaandanto iti nasayaat a salun-at ken agbiagdanto iti perpekto a kasasaad ditoy daga.—Salmo 37:29; Aramid 24:15.

 Dagiti bersikulo iti Biblia maipapan iti sakit

 Apocalipsis 6:8: “Adtoy! adda napusiaw a kabalio; ket Patay ti nagan ti nakasakay. Ken sumursurot ni Tanem iti asidegna. Naikkanda iti autoridad . . . tapno mangpapatayda babaen ti . . . makapapatay a didigra.”

 Kaipapananna: Ti padto maipapan iti uppat a kumakabalio iti Apocalipsis ipakitana a mapasamak dagiti pandemic iti tiempotayo.