Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Ania ti Babilonia a Dakkel?

Ania ti Babilonia a Dakkel?

Sungbat ti Biblia

Ti Babilonia a Dakkel, a nadeskribir iti libro nga Apocalipsis, ket napagmaymaysa a bagi dagiti palso a relihion iti intero a lubong, a saan nga anamongan ti Dios. * (Apocalipsis 14:8; 17:5; 18:21) Nupay adu ti nagdudumaan dagita a relihion, iyad-adayoda dagiti tattao manipud iti panagdaydayaw iti pudno a Dios a ni Jehova.Deuteronomio 4:35.

Dagiti pakabigbigan ti Babilonia a Dakkel

  1. Ti Babilonia a Dakkel ket maysa a simbolo. Deskribiren ti Biblia daytoy kas “maysa a babai” ken “dakkel a balangkantis,” a ti naganna ket “maysa a misterio: ‘Babilonia a Dakkel.’” (Apocalipsis 17:1, 3, 5) Ti libro nga Apocalipsis ket naglaon “kadagiti pagilasinan,” isu a maibagatayo a ti Babilonia a Dakkel ket saan a literal a babai no di ket maysa a simbolo. (Apocalipsis 1:1) Maysa pay, isu ket “situtugaw iti adu a danum,” a mangirepresentar kadagiti ‘ili, bunggoy, nasion, ken pagsasao.’ (Apocalipsis 17:1, 15) Saan a kabaelan nga aramiden dayta ti literal a babai.

  2. Ti Babilonia a Dakkel irepresentarna ti maysa nga internasional nga organisasion. Isu ket maawagan “dakkel a siudad nga addaan pagarian iti ar-ari ti daga.” (Apocalipsis 17:18) Ngarud, internasional ti kalawa ti saklawen ken impluensiana.

  3. Ti Babilonia a Dakkel ket relihion, saan a politika wenno komersio. Ti nagkauna a Babilonia ket dakkel a narelihiosuan a siudad, a nalatak gapu iti espiritismo nga aramidna kas iti ‘panagilabeg’ ken “panagkulam.” (Isaias 47:1, 12, 13; Jeremias 50:1, 2, 38) Kinapudnona, sadiay ti ayan ti palso a relihion a kumonkontra iti pudno a Dios a ni Jehova. (Genesis 10:8, 9; 11:2-4, 8) Sipapangas nga itantan-ok dagiti agtuturay ti Babilonia ti bagbagida iti ngatuen ni Jehova ken ti panagdaydayaw kenkuana. (Isaias 14:4, 13, 14; Daniel 5:2-4, 23) Ti Babilonia a Dakkel ket pagaammo met kadagiti ‘espiritistiko nga aramidna,’ a mangipakita a dayta ket narelihiosuan nga organisasion.Apocalipsis 18:23.

    Saan a napolitikaan nga organisasion ti Babilonia a Dakkel gapu ta agsangit dagiti “ar-ari ti daga” iti pannakadadaelna. (Apocalipsis 17:1, 2; 18:9) Saan met a nabileg a komersio, agsipud ta isu ket iduma ti Biblia kadagiti “komersiante iti daga.”Apocalipsis 18:11, 15.

  4. Ni Ari Nabonido ti Babilonia iti kitikit a bato, nga addaan kadagiti simbolo ti tallo a didiosen a da Sin, Ishtar, ken Shamash

    Ti Babilonia a Dakkel ket maibagay iti pannakailadawan ti palso a relihion. Imbes a suruan ti palso a relihion dagiti tattao nga umadani iti pudno a Dios a ni Jehova, iturongna ketdi ida nga agdaydayaw kadagiti didiosen. Awagan ti Biblia daytoy kas ‘immoral a pannakidenna’ wenno naespirituan a prostitusion. (Levitico 20:6; Exodo 34:15, 16) Ti pammati a kas iti Trinidad ken immortal a kararua ken dagiti aramid a kas iti panagusar kadagiti imahen iti panagdaydayaw ket nangrugi iti nagkauna a Babilonia ken agtultuloy a nagsaknap iti palso a relihion. Paglalaoken met dagitoy a relihion ti panagdaydayawda ken ti panagayat iti lubong. Tukoyen ti Biblia daytoy a kita ti di kinamatalek kas naespirituan a pannakikamalala.—Santiago 4:4.

    Ti kinabaknang ken kinaparammag ti palso a relihion ket kapada ti panangiladawan ti Biblia iti Babilonia a Dakkel, a “nakawesan iti purpura ken eskarlata” ken “naarkosan iti balitok ken napateg a bato ken kadagiti perlas.” (Apocalipsis 17:4) Ti Babilonia a Dakkel ti pagtataudan “ti makarimon a bambanag iti daga,” wenno pannursuro ken ar-aramid a mangibabain iti Dios. (Apocalipsis 17:5) Dagiti miembro ti palso a relihion ket “dagiti ili ken dagiti bunggoy ken dagiti nasion ken dagiti pagsasao” a mangsupsuporta iti Babilonia a Dakkel.—Apocalipsis 17:15.

Ti Babilonia a Dakkel ti manungsungbat iti ipapatay dagiti “amin a napapatay ditoy daga.” (Apocalipsis 18:24) Iti intero a pakasaritaan, ti palso a relihion saanna laeng a sugsugsogan dagiti gubat ken rubrubroban dagiti aramid ti terorismo, no di ket saanna pay nga isursuro kadagiti tattao ti kinapudno maipapan ken Jehova, ti Dios ti ayat. (1 Juan 4:8) Nagbanag daytoy iti adu a panagibukbok iti dara. Adda naimbag a rason tapno dagidiay mayat a mangparagsak iti Dios ket masapul a ‘rummuar kenkuana,’ a pumanawda iti ulbod a relihion.Apocalipsis 18:4; 2 Corinto 6:14-17.

^ par. 3 Kitaem ti artikulo a “Kasanok a Masarakan ti Pudno a Relihion?”

Ammuem ti Ad-adu Pay

Kasanok a Masarakan ti Pudno a Relihion?

Apay a saan nga umdas ti panangibaga nga ‘umiso ti relihionko’?

Ania Dagiti Tulbek iti Panangtarus iti Biblia?

Aniaman ti kasasaadmo iti biag, posible a matarusam ti mensahe ti Dios a nailanad iti Nasantuan a Kasuratan.