Mapan iti linaonna

Mapan iti segundario a pagpilian

Dagiti Saksi ni Jehova

Iloko

Anianto ti Aramiden ti Pagarian ti Dios?

Anianto ti Aramiden ti Pagarian ti Dios?

Sungbat ti Biblia

Ti Pagarian ti Dios sukatannanto ti amin a gobierno ti tao ket agturayto iti intero a daga. (Daniel 2:44; Apocalipsis 16:14) Apaman a mapasamak dayta, ti Pagarian ti Dios . . .

  • Ikkatenna ti amin a nadangkes, a mangdangdangran kadatayo amin gapu iti kinamanagimbubukodanda. “No maipapan kadagiti nadangkes, magessatdanto iti mismo a daga.”—Proverbio 2:22.

  • Pagpatinggaenna amin a gubat. “[Ti Dios] pagsardengenna dagiti gubat agingga iti ungto ti daga.”—Salmo 46:9.

  • Mangyeg iti nam-ay ken kinatalged iti daga. “Agbiagto a sitatalna ti tunggal maysa iti kaubasanna ken kadagiti kayona nga igos, ket awanto ti pagbutnganna.”—Mikias 4:4, Ti Baro a Naimbag a Damag Biblia.

  • Pagbalinenna a paraiso ti daga. “Ti let-ang ken ti awanan danum a rehion agragsakdanto, ket ti desierto a tanap agrag-onto ken agsabong.”—Isaias 35:1.

  • Ipaayanna ti amin a tattao iti makapnek ken makaparagsak a trabaho. “Ti aramid dagiti bukodda nga ima usarento a naan-anay dagidiay [pinili ti Dios]. Saandanto nga agbannog iti awan kapapay-anna.”—Isaias 65:21-23.

  • Ikkatenna ti sakit. “Awanto ti agtataeng nga agkuna: ‘Masakitak.’”—Isaias 33:24.

  • Pagpatinggaenna ti panaglakay wenno panagbaket. “Ti lasagna agbalin a nasalsalibukag ngem iti kinaagtutubo; Isu agsubli kadagiti aldaw ti kired ti kinaagtutubona.”—Job 33:25.

  • Pagungarenna dagiti natay. “Amin dagidiay adda kadagiti pakalaglagipan a tanem mangngegdanto ti [timek ni Jesus] ket rummuarda.”—Juan 5:28, 29.