Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Ania ti Kararua?

Ania ti Kararua?

Sungbat ti Biblia

Ti Hebreo a sao a neʹphesh ken ti Griego a sao a psy·kheʹ ket naipatarus iti Biblia kas “kararua.” Ti Hebreo a sao literal a kaipapananna ti “agang-anges a parsua,” ket ti Griego a sao kaipapananna met ti “sibibiag a parsua.” * Ngarud, ti kararua isu ti sibibiag a parsua. Saan a banag dayta nga adda iti uneg ti bagi nga agtultuloy a sibibiag kalpasan a matay ti tao. Usigem no kasano nga ipakita ti Biblia a ti kararua ket isu ti tao a mismo:

Saan a naparsua ni Adan nga addaan iti kararua, imbes ketdi “nagbalin a kararua a sibibiag”

  • Idi pinarsua ni Jehova a Dios ti umuna a tao a ni Adan, kuna ti Biblia a ti “tao nagbalin a kararua a sibibiag.” (Genesis 2:7, Ti Biblia) Saan a naparsua ni Adan nga addaan iti kararua, imbes ketdi nagbalin a kararua a sibibiag, wenno tao.

  • Kuna ti Biblia a ti kararua agtrabaho, agtarigagay iti taraon, mangan, agtulnog kadagiti linteg, ken makasagid iti natay a bagi. (Levitico 5:2; 7:20; 23:30; Deuteronomio 12:20; Roma 13:1) Ar-aramiden dagita dagiti tattao.

Immortal kadi ti kararua?

Saan. Ti kararua ket matay. Adu a teksto iti Biblia ti mangipakita a matay ti kararua. Dagitoy ti sumagmamano:

  • “Ti cararua nga agbasol matayto.”—Ezequiel 18:4, 20, Ti Biblia.

  • Iti nagkauna nga Israel, ti dusa dagiti nadagsen a basol ket ti “kararua masapul a magessat.” (Exodo 12:15, 19; Levitico 7:20, 21, 27; 19:8) Dayta a tao “di bumurong a mapapatayto.”—Exodo 31:14.

  • No matay ti tao, ti termino a “natay a kararua” ket nausar para iti bangkay iti dadduma a teksto ti Biblia. (Levitico 21:11; Numeros 6:6, Ti Naimbag a Damag Biblia) Nupay adu a patarus ti nangusar iti “natay a bagi” wenno “natay a tao,” kadagita a teksto, ti orihinal a Hebreo inusarna ti sao a neʹphesh, wenno “kararua.”

Ti “kararua” kaipapananna ti “biag”

Usaren met ti Biblia ti sao a “kararua” a katupag ti “biag.” Kas pagarigan, iti Job 33:22 nausar ti sao a “kararua” (neʹphesh) a katupag ti sao a “biag.” Umasping iti dayta, ipakita ti Biblia a ti kararua ti maysa a tao, wenno biag, ket mabalin nga agpeggad wenno mapukaw.—Exodo 4:19; Uk-ukom 9:17; Filipos 2:30.

Ti pannakausar ti sao a “biag” para iti “kararua” ket tulongannatayo a mangtarus kadagiti teksto a ti kararua ket nadakamat a ‘pumanaw’ wenno “sumina.” (Genesis 35:18; King James Version) Ipakita dagita a piguratibo a sasao a nagpatinggan ti biag ti maysa a tao. Iti dadduma a Biblia, ipatarusda dayta a sao iti Genesis 35:18 kas ‘nauyosen ti angesna.’—Ti Baro a Naimbag a Damag Biblia.

Ti nagtaudan ti sursuro nga immortal a kararua

Dagiti denominasion ti Kakristianuan a mamati iti immortal a kararua, innalada daytoy a sursuro iti nagkauna a Griego a pilosopia, saan nga iti Biblia. Kuna ti Encyclopædia Britannica: “Ti panangdakamat ti Biblia iti kararua ket mainaig iti anges ken saanna nga ipakita ti pagdumaan ti naespirituan ken ti pisikal a bagi. Ti kapanunotan dagiti Kristiano a dakkel ti nagdumaan ti sumina a kararua ken bagi ket nagtaud kadagiti nagkauna a Griego.”

Saan nga anamongan ti Dios a dagiti pannursurona ket maitipon iti pilosopia ti tao, kas iti sursuro nga immortal a kararua. Ngem mamakdaar ti Biblia: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken ubbaw a panangallilaw maitunos iti tradision dagiti tattao.”—Colosas 2:8.

^ par. 3 Kitaem ti The New Brown, Driver, and Briggs Hebrew and English Lexicon of the Old Testament, panid 659, ken ti Lexicon in Veteris Testamenti Libros, panid 627. Adu a bersion ti Biblia ti naiduma ti patarusna iti sao a neʹphesh ken psy·kheʹ no ibatay kadagiti konteksto. Nagusarda kadagiti sasao kas iti “kararua,” “biag,” “persona,” “parsua,” wenno “bagi.”

Ammuem ti Ad-adu Pay

Imortal Kadi ti Kararua?

Ammuem no ania ti kunaen ti Biblia maipapan iti kararua.

Sadino ti Ayan Dagiti Natay?

Ammuem ti kuna ti Biblia no sadino ti ayan dagiti natay ken no apay a matay ti tao.

“Kararua” ken “Espiritu”—Ania a Talaga ti Kaipapanan Dagitoy a Sao?

Adu ti agkuna a no matay ti tao, adda sumina a di makita a paset ti bagina nga agtultuloy nga agbiag. Ania ti kuna ti Sao ti Dios?