Mapan iti linaonna

Mapan iti segundario a pagpilian

Dagiti Saksi ni Jehova

Iloko

Ania ti Kaipapanan ti 666?

Ania ti Kaipapanan ti 666?

Sungbat ti Biblia

Sigun iti maudi a libro ti Biblia ti 666 ket numero, wenno nagan, ti atap nga animal a pito ti ulona ken sangapulo ti sarana a rimkuas iti baybay. (Apocalipsis 13:1, 17, 18) Daytoy nga animal ti simbolo ti sangalubongan a napolitikaan a sistema a mangiturturay iti “tunggal tribu ken ili ken pagsasao ken nasion.” (Apocalipsis 13:7) Ti numero a 666 ipakitana a nakaro ti pannakapaay ti napolitikaan a sistema iti imatang ti Dios. Kasano?

Saan laeng a basta nagan. Adda kaipapanan dagiti nagan nga inted ti Dios. Kas pagarigan, ti lalaki a ni Abram a kaipapananna “Ni Ama ket Nangato (Natan-ok),” ket pinanaganan ti Dios iti Abraham a kaipapananna “Ama ti Maysa a Bunggoy (Umariwekwek)” idi inkari ti Dios a pagbalinenna ni Abraham nga ‘ama ti adu a nasion.’ (Genesis 17:5) Kasta met, ti Dios inawaganna ti animal a 666 kas simbolo a mangipakita iti galadna.

Ti numero a 6 kaipapananna ti pannakapaay. Iti Biblia, masansan a mausar dagiti numero kas simbolo. Ti numero a 7 irepresentarna ti kinakompleto wenno kinaperpekto. Ti 6, kurang iti 1 tapno 7, ipakitana a kurang wenno adda depektona iti imatang ti Dios ken inaigna iti kabusor ti Dios.—1 Cronicas 20:6; Daniel 3:1.

Namitlo a nadakamat tapno maipaganetget. No dadduma, ipaganetget ti Biblia ti maysa a banag no dakamatenna iti mamitlo. (Apocalipsis 4:8; 8:13) Gapuna, ti numero a 666 ipaganetgetna nga ibilang ti Dios ti natauan a napolitikaan a sistema a nakaro ti pannakapaayna. Napaay a mangyeg iti manayon a talna ken kinatalged—banag nga iyeg laeng ti Pagarian ti Dios.

Ti marka ti animal

Kuna ti Biblia a naaddan dagiti tattao iti “marka ti atap nga animal” gapu ta sursurotenda nga addaan “panagrukbab” nga uray la daydayawenda. (Apocalipsis 13:3, 4; 16:2) Ar-aramidenda daytoy babaen ti panangidayawda iti pagilianda, dagiti simbolona, wenno puersa militarna. Kas kuna ti The Encyclopedia of Religion: “Ti nasionalismo ket nagbalinen a kabilgan a porma ti relihion iti moderno a lubong.” *

Kasano a naikabil ti marka ti animal iti kannawan nga ima wenno muging ti maysa a tao? (Apocalipsis 13:16) Kastoy ti imbilin ti Dios iti nasion ti Israel: “Ibedbedyo ida kas pagilasinan iti imayo, ket masapul nga agserbida a kas bedbed iti muging iti baet dagiti matayo.” (Deuteronomio 11:18) Dina kayat a sawen a literal a imarka dagiti Israelita iti imada ken mugingda, no di ket ti sao ti Dios ti mangidalan iti amin nga ar-aramid ken pampanunotda. Kasta met, imbes a literal nga imarka ti 666, ti marka ti animal ket simboliko nga ipabigbigna dagidiay mangipalubos a ti napolitikaan a sistema ti mangituray iti biagda. Dagidiay addaan marka ti animal pagbalbalinenda ti bagida a kabusor ti Dios.—Apocalipsis 14:9, 10; 19:19-21.

^ par. 8 Kitaen met ti Nationalism in a Global Era, panid 134; ken Nationalism and the Mind: Essays on Modern Culture, panid 94.

Ammuem ti Ad-adu Pay

TI PAGWANAWANAN

Panungpalan ti Lubong—Nakabutbuteng, Makapagagar, ken Makapaupay

Mabalin a masdaawka no ania a talaga ti ibagbaga ti Biblia maipapan iti panungpalan ti lubong.

AGRIINGKAYO!

“Umayton ti Panungpalan”—Umiso a Padto ti Biblia

Impakpakauna ti Biblia ti panungpalan ti amin a kinadakes. Kasano ken kaano a mapasamak dayta?